ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

   ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຕົວຈິງ

ແຂວງອຸບົນ ຣາຊະອານາຈັກໄທ ຊ່ວຍເຫຼືອແຂວງສາລະວັນ ແລະ ແຂວງຈຳປາສັກ ຕ້ານພະຍາດໂຄວິດ-19

ຈັງຫວັອຸບົນຣາຊະທານີ ຣາຊະອານາຈັກໄທ ມອບອຸປະກອນການແພດ ໃຫ້ແຂວງສາລະວັນ ແລະ ແຂວງຈຳປາສັກ ສປປ ລາວ ລວມມູນຄ່າ 217.300 ບາດ ຫຼື ປະມານ 71 ລ້ານກວ່າກີບ ເພື່ອຮັບໃຊ້ເຂົ້າໃນການສະກັດກັ້ນ ແລະ ປ້ອງກັນການແຜ່ລະບາດຂອງພະຍາດໂຄວິດ-19.
ພິທີ ມອບ-ຮັບ ການຊ່ວຍເຫຼືອດັ່ງກ່າວ ຈັດຂຶ້ນໃນວັນທີ 10 ມິຖຸນາ 2021 ທີ່ດ່ານສາກົນວັງເຕົ່າ-ຊ່ອງເມັກ ລະຫວ່າງ ແຂວງຈຳປາສັກ ກັບ ຈັງຫວັດອຸບົນຣາຊະທານີ. ຝ່າຍຈັງຫວັດອຸບົນ ນຳໂດຍ ທ່ານ ສະຣິດ ວິທູນ ຜູ້ວ່າຣາຊະການຈັງຫວັດອຸບົນຣາຊະທານີ, ແຂວງສາລະວັນ ນຳໂດຍ ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ແລະ ແຂວງຈຳປາສັກ ນຳໂດຍ ທ່ານ ວິໄລວົງ ບຸດດາຄຳ ເຈົ້າແຂວງຈໍາປາສັກ ແລະຄະນະ ເຂົ້າຮ່ວມ.
ເຄື່ອງທີ່ນໍາມາມອບໃນຄັ້ງນີ້, ແມ່ນຈັງຫວັດອຸບົນຣາຊະທານີ ຮ່ວມກັບ ບໍລິສັດອຸບົນ ໄບໂອເອທານອນ ຈຳກັດ (ມະຊາຊົນ) ປະເທດໄທ ປະກອບມີ: ອັງໂກນ ຈຳນວນ 2.000 ລິດ, ຖົງມືທາງການແພດ 100 ກ່ອງ ແລະ ຜ້າອັດປາກ-ດັງ ຈຳນວນ 6.000 ອັນ, ລວມມູນຄ່າ 217.300 ບາດ ຫຼື ປະມານ 71 ລ້ານກວ່າກີບ.
ໂອກາດນີ້, ທ່ານ ສະຣິດ ວິທູນ ຜູ້ວ່າຣາຊະການຈັງຫວັດອຸບົນຣາຊະທານີ ກ່າວວ່: ໃນປັດຈຸບັນສະຖານະການແຜ່ລະບາດຂອງພະຍາດໂຄວິດ-19 ມີຜົນກະທົບຕໍ່ຄວາມເປັນຢູ່ຂອງປະຊາຊົນທົ່ວປະເທດ ຮ່ວມທັງປະເທດເພື່ອນບ້ານ, ດັ່ງນັ້ນ ການມອບອຸປະກອນການແພດໃນຄັ້ງນີ້ ເປັນການສະແດງອອກເຖິງໄມຕີຈິດ ມິດຕິພາບ ແລະ ຄວາມຜູກພັນຫ່ວງໃຍ ຈາກລັດຖະບານ ແລະ ປະຊາຊົນຊາວໄທ ເພື່ອປະກອບສ່ວນໃນການສະກັດກັ້ນ ແລະ ປ້ອງກັນການແຜ່ລະບາດຂອງພະຍາດໂຄວິດ-19. ອີກທັງເປັນສ່ວນໜຶ່ງຂອງການສະເຫຼີມສະຫຼອງ ໂອກາດ ຄົບຮອບ 71 ປີ ຂອງການສ້າງສາຍພົວພັນການທູດລະຫວ່າງ ສປປ ລາວ ແລະ ຣາຊະອານາຈັກໄທ.
ທ່ານ ວິໄລວົງ ບຸດດາຄຳ ເຈົ້າແຂວງຈໍາປາສັກ ກ່າວສະແດງຄວາມຂອບໃຈ ນໍາຜູ້ວ່າຣາຊະການຈັງຫວັດີ ກໍຄືປະຊາຊົນຊາວຈັງຫວັດອຸບົນຣາຊະທານີ ໂດຍສະເພາະ ບໍລິສັດ ອຸບົນ ໄບໂອເອທານອນ ຈຳກັດ (ມະຊາຊົນ) ທີ່ໄດ້ໃຫ້ການຊ່ວຍເຫຼືອ ປະກອບສ່ວນໃຫ້ແກ່ແຂວງຈໍາປາສັກ ໃນການຄວບຄຸມການລະບາດຂອງພະຍາດໂຄວິດ-19 ຢູ່ແຂວງຈໍາປາສັກ ແລະ ຕີລາຄາສູງ ຕໍ່ສາຍພົວພັນມິດຕະພາບ ທີ່ມີມາແຕ່ດົນນານ ຂອງສອງຊາດ ລາວ-ໄທ, ກໍຄືອົງການປົກຄອງ, ປະຊາຊົນແຂວງຈໍາປາສັກ ແລະ ຈັງຫວັດອຸບົນຣາຊະທານີ ອັນໄດ້ເປັນການປະກອບສ່ວນ ໃຫ້ແກ່ການພັດທະນາເສດຖະກິດ-ສັງຄົມ, ພິເສດ ແມ່ນເປັນການພົບປະສ້າງສັນ ກ່ອນວັນຄົບຮອບ 71 ປີ ( 19 ທັນວາ 1950 – 19 ທັນວາ 2021 ) ຂອງການສ້າງສາຍພົວພັນການທູດລະຫວ່າງ ສປປ ລາວ ແລະ ຣາຊະອານາຈັກໄທ ໃນວັນທີ 19 ທັນວາ 2021 ທີ່ຈະມາເຖິງນີ້, .
(ຂ່າວ-ພາບ: ທັດຊະນະ ແສງດາລາ)