ໃນໂອກາດມີຄໍາເຫັນໂອ້ລົມຕໍ່ພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງແຂວງເຊກອງ ຄົບຮອບ 40 ປີ (14/4/1984-14/4/2024) ຈັດຂຶ້ນເມື່ອບໍ່ດົນມານີ້ ທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກ, ນາຍົກລັດຖະມົນຕີ ໄດ້ຍົກໃຫ້ເຫັນວ່າ: ພັກ-ລັດຖະບານ ເວລາໃດກໍເອົາໃຈໃສ່ການພັດທະນາເຂດແຄ້ວນ ເວົ້າລວມ, ກໍ່ຄືແຂວງເຊກອງວິລະຊົນ ເວົ້າສະເພາະ, ເນື່ອງຈາກເປັນແຂວງໜຶ່ງດຽວດໃນພາກໃຕ້ຂອງລາວ ທີ່ໄດ້ຮັບນາມມະຍົດເປັນແຂວງວິລະຊົນ. ສະນັ້ນ, ໃນໄລຍະຜ່ານມາ ພັກ-ລັດຖະບານ ໄດ້ຖືເປັນບູລິມະສິດສຳຄັນໃນການພັດທະນາເຂດຫ່າງໄກສອກຫຼີກ, ບ້ານ, ເມືອງ ແລະ ແຂວງວິລະຊົນ, ໂດຍໄດ້ນຳໃຊ້ຮູບການດຶງດູດການລົງ ທຶນຂອງລັດ ແລະ ພາກເອກະຊົນພາບໃນ ແລະ ຕ່າງປະເທດ ເຂົ້າມາພັດທະນາເຂດດັ່ງກ່າວໃຫ້ຫຼາຍຂຶ້ນ ແລະ ອື່ນໆ.
ຢ່າງໃດກໍຕາມ, ເພື່ອເຮັດໃຫ້ແຂວງເຊກອງ ສືບຕໍ່ພັດທະນາວ່ອງໄວ ແລະຍືນຍົງ, ທ່ານ ສອນໄຊ ສີພັນດອນ ໄດ້ເນັ້ນໜັກໃຫ້ຄະນະພັກ-ອົງການປົກຄອງ, ອົງການຈັດ ຕັ້ງມະຫາຊົນ ແລະ ແນວລາວສ້າງທຸກຂັ້ນ ພາຍໃນແຂວງເຊກອງ ເອົາໃຈໃສ່ 6 ວຽກຈຸດສຸມທີ່ສໍາຄັນ ດັ່ງນີ້:
ໜຶ່ງ: ສືບຕໍ່ບູລະນະລະບອບປະຊາທິປະໄຕ ປະຊາຊົນ ໃຫ້ສົມບູນຍິ່ງຂຶ້ນ, ສ້າງການຫັນປ່ຽນແຂງແຮງ, ເລິກເຊິ່ງແລະຮອບດ້ານ ເພື່ອກ້າວຂຶ້ນສູ່ຈຸດໝາຍສັງຄົມນິຍົມ, ປັບປຸງລະບົບການຈັດຕັ້ງ, ກົງຈັກ ແລະ ກົນໄກເຄື່ອນໄຫວຂອງບັນດາອົງການອໍານາດລັດແຕ່ລະຂັ້ນໃຫ້ເຂັ້ມແຂງ ແລະ ມີປະສິດທິພາບ, ມີພາລະບົດບາດຈະແຈ້ງ ແລະ ຮັດກຸມ, ກົງຈັກບໍ່ໃຫຍ່ໂຕ, ກະທັດລັດ, ເປັນລະບົບ ແລະ ກ້າວສູ່ການ ເຊື່ອມຕໍ່ດ້ວຍອຸປະກອນທີ່ທັນສະໄໝ ຄຽງຄູ່ກັບການເຮັດໃຫ້ຈໍານວນລັດຖະກອນໜ້ອຍລົງ, ຄຸນນະພາບເພີ່ມຂຶ້ນ, ໃຊ້ຈ່າຍປະຢັດ, ຂັບເຄື່ອນຕາມກົດໝາຍຢ່າງມີປະສິດທິພາບ; ປັບປຸງກົນໄກຄຸ້ມຄອງໃຫ້ເປັນລະບົບເອກະພາບ ແລະ ເຂັ້ມແຂງ ຄຽງຄູ່ກັບການຮັບ ປະກັນແບບແຜນໃຫ້ປະຊາຊົນໄດ້ຮູ້, ໄດ້ປຶກສາຫາລື ແລະ ເຂົ້າຮ່ວມຈັດຕັ້ງປະຕິບັດ ບົນຈິດໃຈຮັບປະກັນທາດແທ້ຂອງລັດ ທີ່ມາຈາກປະຊາຊົນ ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນຍ່າງແທ້ຈິງ.
ສອງ: ເສີມຂະຫຍາຍທຸກຄວາມອາດສາມາດ ແລະ ທ່າແຮງບົ່ມຊ້ອນ, ສ້າງການຜະລິດ ແລະ ບໍລິການໃຫ້ເຂັ້ມແຂງ, ຮັບປະກັນການພັດທະນາແບບຍືນຍົງ ແລະ ເປັນເຈົ້າຕົນເອງ; ຕັ້ງໜ້າພັດທະນາຄວາມອາດສາມາດ ແລະ ທ່າແຮງບົ່ມຊ້ອນໃຫ້ເປັນຂະແໜງເສດຖະກິດປາຍແຫຼມ, ສົ່ງເສີມພັດທະນາວິສາຫະກິດພາຍໃນໃຫ້ຂະຫຍາຍຕົວ ແລະ ເຂັ້ມແຂງ; ດໍາເນີນການປັບປຸງ ແລະ ສ້າງສະພາບຄ່ອງໃຫ້ແກ່ງົບປະມານ; ສ້າງການຫັນປ່ຽນອັນເປັນພື້ນຖານ ແລະ ແຂງແຮງໃນການດຶງດູດການລົງທຶນຈາກພາຍໃນ ແລະ ຕ່າງປະເທດ; ພັດທະນາພື້ນຖານໂຄງລ່າງ, ລະບົບສາທາລະນຸປະໂພກ ແລະ ການຈັດສັນອາຊີບຂອງປະຊາຊົນຢູ່ຊົນນະບົດ; ເພີ່ມທະວີການປົກປັກຮັກສາ ແລະ ແກ້ໄຂບັນຫາດ້ານສິ່ງແວດລ້ອມ ໃຫ້ມີຄວາມຍືນຍົງ.
ສາມ: ພັດທະນາຊັບພະຍາກອນມະນຸດຢ່າງແຂງແຮງ, ສ້າງສັງຄົມ ທີ່ປະຊາຊົນເປັນເຈົ້າ, ມີປະຊາທິປະໄຕ, ສະເໝີພາບ ແລະ ຍຸຕິທໍາ, ພັດທະນາຄົນ ໃຫ້ສາມາດຕອບສະໜອງຄວາມຮຽກຮ້ອງຕ້ອງການ ຂອງການພັດທະນາທ້ອງຖິ່ນໃນໄລຍະໃໝ່, ຍົກລະດັບການປະຕິບັດສິດເປັນເຈົ້າອັນແທ້ຈິງຂອງປະຊາຊົນ ຕິດພັນກັບການສ້າງຄວາມເຂັ້ມແຂງໃຫ້ລະບົບນິຕິກໍາ, ຮັບປະກັນການບັງຄັບໃຊ້ກົດໝາຍຢ່າງຖືກຕ້ອງ ແລະ ເປັນທໍາ; ສະກັດກັ້ນການສວຍໃຊ້ສິດອໍານາດຈາກເຈົ້າໜ້າທີ່ລັດທຸກຂັ້ນ; ເສີມຂະຫຍາຍຄຸນຄ່າວັດທະນະທໍາ ທີ່ເປັນເອກະລັກຂອງຊາດ ແລະ ພັດທະນາຄວາມສີວິ ໄລດ້ານຈິດໃຈຂອງສັງຄົມຢ່າງບໍ່ຢຸດຢັ້ງ; ສືບຕໍ່ດໍາເນີນການແກ້ໄຂຄວາມທຸກຍາກຢ່າງເປັນລະບົບ ຕິດພັນກັບການສ້າງອາຊີບ ແລະ ເພີ່ມທະວີການຝຶກສີມືແຮງງານ ເພື່ອຮັບປະກັນຜົນປະໂຫຍດຂອງຜູ້ອອກແຮງງານລາວ.
ສີ່: ຕັ້ງໜ້າປະຕິບັດແນວທາງຍຸດທະສາດປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ, ປັບປຸງ, ກໍ່ສ້າງກໍາລັງ ປກສ-ປກຊ ໃຫ້ກະທັດລັດ, ມີຄຸນນະ ພາບ, ຮັບປະກັນຄວາມເຂັ້ມແຂງດ້ານການຈັດຕັ້ງ, ລະບຽບວິໄນ, ຍົກສູງຄວາມສາ ມາດໃນການສະກັດກັ້ນ ແລະ ແກ້ໄຂປະກົດການຫຍໍ້ທໍ້, ບັນຫາອາດຊະຍາກໍາຕ່າງໆ ໃຫ້ທັນການ, ສ້າງຕາໜ່າງປ້ອງກັນຄວາມສະຫງົບຢູ່ຂັ້ນຮາກຖານ ແລະ ຂະແໜງການຕ່າງໆ ໃຫ້ກວ້າງຂວາງ ເພື່ອຮັບປະກັນໃຫ້ແຂວງ ແລະ ຮາກຖານມີສະຖຽນລະພາບດ້ານການເມືອງ, ຄວາມສະຫງົບ ແລະ ປອດໄພທາງດ້ານສັງຄົມ, ເຮັດໃຫ້ການປະຕິບັດແຜນພັດທະນາເສດຖະກິດ-ສັງຄົມຂະຫຍາຍຕົວຢ່າງຕໍ່ເນື່ອງ.
ຫ້າ: ເພີ່ມທະວີວຽກງານແນວໂຮມ ແລະ ວຽກງານມະຫາຊົນຂອງພັກ ໃຫ້ຕອບສະໜອງການຜັນ ຂະຫຍາຍແນວທາງຂອງພັກ ໃນການເຕົ້າໂຮມກໍາລັງແຮງສັງ ລວມ ເພື່ອພັດທະນເສດຖະກິດ-ສັງຄົມ, ປະຕິບັດບັນດາກົນໄກທາງການ ເມືອງ-ສັງ ຄົມຂອງລະບອບປະຊາທິປະໄຕ ປະຊາຊົນໃຫ້ເຂັ້ມແຂງ, ຮັບປະກັນສິດເປັນເຈົ້າປະ ຊາທິປະໄຕ ແລະ ຍຸຕິທໍາ ໃນສັງຄົມ.
ເພື່ອສືບຕໍ່ພັດທະນາປະເທດຊາດ ແລະ ທ້ອງຖິ່ນແຂວງເຊກອງ ໃຫ້ຫຼຸດພົ້ນອອກຈາກສະຖານະພາບດ້ອຍພັດທະນາ ຕາມຈຸດໝາຍປາຍທາງ ທີ່ໄດ້ກໍານົດໄວ້ນັ້ນ, ບັນ ດາສະຫາຍສະມາຊິກພັກ, ພະນັກງານ-ລັດຖະກອນ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ, ນັກຮຽນຮູ້ປັນຍາຊົນ, ຜູ້ຊົງຄຸນ ວຸດທິ, ນັກທຸລະກິດທຸກຖ້ວນໜ້າ ແລະ ປະຊາຊົນບັນດາເຜົ່າຊາວແຂວງເຊກອງ ຈົ່ງເພີ່ມທະວີຄວາມສາມັກຄີເປັນຈິດໜຶ່ງໃຈດຽວກັນ, ພ້ອມກັນສືບທອດ ແລະ ເສີມຂະຫຍາຍມູນເຊື້ອຮັກຊາດ, ຮັກບ້ານເກີດເມືອງນອນອັນດູດດື່ມ, ເປັນເຈົ້າການເຂົ້າຮ່ວມສ້າງສາ ແລະ ພັດທະ ນາປະເທດຊາດ-ທ້ອງຖິ່ນແຂວງເຊກອງ ໃຫ້ເປັນຂະບວນຟົດຟື້ນ, ແຂງແຮງ ແລະ ຕໍ່ເນື່ອງ.
ຫົກ: ເພີ່ມທະວີການປັບປຸງພັກ-ພະນັກງານ ຕາມທິດກໍ່ສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ, ເດັດດ່ຽວແກ້ໄຂຈຸດອ່ອນ-ຄົງຄ້າງພາຍໃນພັກ, ຮັບ ປະກັນບົດບາດການເຄື່ອນໄຫວນໍາພາຕົວຈິງ ທີ່ເຂັ້ມແຂງຂອງການຈັດຕັ້ງພັກທຸກຂັ້ນ; ສ້າງການຫັນປ່ຽນໃໝ່ດ້ານຈິນຕະນາການ, ຍົກລະດັບຄຸນນະພາບວຽກງານການເມືອງ-ແນວຄິດ ແລະ ທິດສະດີຂອງພັກ; ສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງໃນວຽກງານພະນັກງານ ໂດຍສຸມໃສສ້າງ ແລະ ປະຕິບັດແຜນກໍານົດພະນັກງານຢ່າງເປັນລະບົບ, ປັບປຸງລະບອບເລືອກເຟັ້ນ ແລະ ສັບຊ້ອນພະນັກງານໃຫ້ຖືກຕ້ອງ, ສອດຄ່ອງກັບໜ້າທີ່ການເມືອງໃນໄລຍະໃໝ່, ພ້ອມກັນນັ້ນ ກໍປະຕິບັດລະບອບຄຸ້ມຄອງ, ຕິດຕາມ, ກວດກາ ແລະ ບັນດາມາດຕະການທາງວິໄນຕໍ່ພະນັກ ງານຢ່າງເຂັ້ມງວດ.
