ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ແຂວງໄຊຍະບູລີ ສະເຫຼີມສະຫຼອງວັນແຫ່ງຊາດ ຕ້ານຢາເສບຕິດຄົບຮອບ 19 ປີ

ຕອນເຊົ້າວັນທີ 12 ຕຸລາ 2020 ນີ້, ຄະນະພັກ – ອໍານາດການປົກຄອງ ແຂວງໄຊຍະບູລີ ໄດ້ຈັດພິທີສະເຫຼີມສະຫຼອງ ວັນແຫ່ງຊາດຕ້ານຢາເສບຕິດຄົບຮອບ 19 ປີ ( ວັນທີ 12 ຕຸລາ 2001 – 12 ຕຸລາ 2020 ) ຂຶ້ນຢູ່ທີ່ເດີ່ນກິລາຂອງແຂວງ ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ເພັງນິລັນ ຄໍາພັນເພັງ ຮອງເລຂາພັກແຂວງ ຮອງເຈົ້າແຂວງໄຊຍະບູລີ , ມີບັນດາການນໍາຂອງແຂວງ, ການນໍາຂອງເມືອງໄຊຍະບູລີ, ຕາງໜ້າຈາກບັນດາພະແນການ, ອົງການ, ກົມກອງ, ລັດວິສາຫະກິດອ້ອມຂ້າງແຂວງ, ນັກຮຽນ – ນັກສຶກສາ, ຕະຫຼອດຮອດອໍານາດການປົກຄອງບ້ານອ້ອມຂ້າງເທດສະບານແຂວງເຂົ້າຮ່ວມຢ່າງຫຼວງຫຼາຍ.

ທ່ານ ເພັງນິລັນ ຄໍາພັນເພັງ ໃຫ້ກຽດຂຶ້ນກ່າວຄໍາປາໄສຕໍ່ພິທີໂຮມຊຸມນຸມຄັ້ງນີ້ວ່າ: ໃນໄລຍະຜ່ານມາ, ພັກ ແລະ ລັດຖະບານ; ອໍານາດການປົກຄອງທຸກຂັ້ນ, ກໍຄືກໍາລັງປ້ອງກັນຄວາມສະຫງົບທົ່ວແຂວງ ໄດ້ຖືເອົາວຽກງານສະກັດກັ້ນ. ຕ້ານ ແລະ ແກ້ໄຂບັນຫາຢາເສບຕິດເປັນບູລິມະສິດໜຶ່ງທີ່ສໍາຄັນ ແລະ ໄດ້ຈັດຕັ້ງປະຕິບັດຢ່າງຈິງຈັງຕະຫຼອດມາ. ຕົ້ນຕໍແມ່ນໄດ້ເອົາໃຈໃສ່ສຶກສາອົບຮົມໃຫ້ປະຊາຊົນບັນດາເຜົ່າໄດ້ຮັບຮູ້, ເຂົ້າໃຈຢ່າງຖືກຕ້ອງກ່ຽວກັບພິດໄພ ແລະ ຜົນຮ້າຍຂອງຢາເສບຕິດ, ໂດຍການລົງໂຄສະນາເຜີຍແຜ່ແນວທາງນະໂຍບາຍ, ລະບຽບກົດໝາຍ ແລະ ມະຕິຄໍາສັ່ງຂອງພັກ – ລັດ ກ່ຽວກັບບັນຫາຢາເສບຕິດ, ເຊິ່ງໄດ້ຊ່ວຍເຫຼືອ ແລະ ສ້າງເງື່ອນໄຂໃຫ້ປະຊາຊົນບັນດາເຜົ່າຫັນໄປປະກອບອາຊີບອື່ນທີ່ໝັ້ນຄົງ, ທົດແທນການປູກຝິ່ນ, ພ້ອມທັງໄດ້ປິ່ນປົວ, ຟື້ນຟູສຸຂະພາບ ແລະ ຝຶກວິຊາຊີບຜູ້ຖືກເຄາະຮ້າຍຈາກຢາເສບຕິດປະເພດຕ່າງໆ: ເອົາໃຈໃສ່ສ້າງບ້ານ, ສະຖາບັນການສຶກສາ, ກົມກອງ, ຫົວໜ່ວຍທຸລະກິດ ແລະ ການບໍລິການທັງພາກລັດ ແລະ ເອກະຊົນຢູ່ຕາມທ້ອງຖິ່ນຕ່າງໆໃຫ້ປອດຈາກຢາເສບຕິດ. ປັດຈຸບັນທົ່ວແຂວງໄຊຍະບູລີ ມີສູນບໍາບັດປິ່ນປົວຜູ້ຕິດຢາເສບຕິດ 02 ແຫ່ງ, ປີຜ່ານມາມີຜູ້ເຂົ້າບໍາບັດປິ່ນປົວ 409 ເທື່ອຄົນ, ປິ່ນປົວດີສົ່ງຄືນສູ່ຄອບຄົວແລ້ວ 165 ຄົນ, ມີໂຮງຮຽນສຶກສາອົບຮົມພົນລະເມືອງດີ 10 ແຫ່ງ ມີນັກຮຽນເຂົ້າສຶກສາອົບຮົມທັງຫມົດ 1.657 ຄົນ, ຍິງ 55 ຄົນ, ອອກຄືນສູ່ຄອບຄົວແລ້ວ 656 ຄົນ, ຍິງ 24 ຄົນ, ໄດ້ເປີດໜ່ວຍບໍລິການໂຮງໝໍຊຸມຊົນປິ່ນປົວຜູ້ຕິດຢາເສບຕິດ 3 ແຫ່ງ ໃນນີ້ມີ ໂຮງໝໍນ້ອຍນາຫຼາ ເມືອງໄຊຍະບູລີ, ໂຮງໝໍ ເມືອງຊຽງຮ່ອນ ແລະ ໂຮງໝໍ ເມືອງປາກລາຍ ມີຜູ້ມາໃຊ້ບໍລິການ 28 ຄົນ, ມີໂຮງຮຽນປອດຢາເສບຕິດ  48 ແຫ່ງ ແລະ ບ້ານປອດຢາເສບຕິດ 248 ບ້ານ; ພ້ອມນີ້ຍັງໄດ້ຕັ້ງໜ້າປະຕິບັດມາດຕະການດ້ານກົດໝາຍຕໍ່ຜູ້ກະທໍາຜິິດໃນການຄ້າ – ຂາຍ, ຂົນສົ່ງຢາເສບຕິດໃນປີ 2020 ສາມາດມ້າງລາຍຄະດີໄດ້ 206 ເລື່ອງ, ມີຜູ້ຖືກຫາ 247 ຄົນ, ຍິງ 24 ຄົນ, ຍຶດຂອງກາງຢາບ້າ 235.154 ເມັດ, ຢາໄອ້ 2.904,54 ກຼາມ.

ທ່ານ ບຸນລຽງ ດວງສົມພອນ ຮອງຫົວໜ້າພະແນກຍຸດຕິທໍາແຂວງ ຕາງໜ້າຄະນະກໍາມະການກວດກາຂອງກາງ ທີ່ຮີບໄດ້ຈາກຄະດີຢາເສບຕິດ ຂຶ້ນລາຍງານຕໍ່ພິທີຄັ້ງນີ້ວ່າ: ໃນປີ 2020 ນີ້, ສານປະຊາຊົນ ແຂວງໄຊຍະບູລີ ຕັດສິນຄະດີຢາເສບຕິດທີ່ໃຊ້ໄດ້ຢ່າງເດັດຂາດ ນັບແຕ່ວັນທີ 26 ມິຖຸນາ 2019 ຫາ 12 ຕຸລາ 2020  ມີທັງໝົດ 254 ເລື່ອງ, ມີນັກໂທດ 330 ຄົນ, ຍິງ 51 ຄົນ, ຕ່າງປະເທດ 1 ຄົນ ສ່ວນວັດຖຸຂອງກາງຢາເສບຕິດທີ່ສານ ປະຊາຊົນ ແຂວງ ຕັດສິນໃຊ້ໄດ້ຢ່າງເດັດຂາດ ແລະ ນໍາມາຈູດທໍາລາຍຖິ້ມໃນຄັ້ງນີ້ມີຢາບ້າ 110.455 ເມັດ, ນໍ້າໜັກ 11.529,7 ກຼາມ, ຢາຝິ່ນ 33,2 ກຼາມ ແລະ ຢາໄອ້ 15,5 ກຼາມ ຖ້າທຽບໃສ່ປີຜ່ານມາແມ່ນມີຈໍານວນຫຼຸດລົງ.

ທ່ານ ເພັງນິລັນ ຄໍາພັນເພັງ ຍັງໄດ້ຮຽກຮ້ອງຄະນະພັກ, ອໍານາດການປົກຄອງທຸກຂັ້ນ, ພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າທຸກຊັ້ນຄົນ ຈົ່ງພ້ອມກັນເປັນເຈົ້າການເຂົ້າຮ່ວມຂະບວນການສະກັດກັ້ນ ແລະ ຕ້ານຢາເສບຕິດໃຫ້ໝົດໄປຈາກສັງຄົມເທື່ອລະກ້າວ ເພື່ອປະກອບສ່ວນເຮັດໃຫ້ປະຊາຊົນບັນດາເຜົ່າໄດ້ດໍາລົງຊີວິດຢູ່ໃນຜືນແຜ່ນດິນອັນແສນຮັກຂອງຕົນຢ່າງມີຄວາມສຸກ, ສະຫງົບ ແລະ ປອດໄພທຸກປະການ.

 

ຂ່າວ: ສາຄອນ ໄຊສົມຮັກສາ