ທ່ານ ນາງ ພອນໄຊ ນະເມືອງເໜືອ ຫົວໜ້າຂະແໜງວັດທະນະທຳ, ພະແນກ ຖວທ ແຂວງໄຊສົມບູນ ໃຫ້ຮູ້ໃນໂອກາດລາຍງານຕໍ່ກອງປະຊຸມສະຫຼຸບວຽກງານ ການສ້າງຄອບຄົວ ແລະ ບ້ານວັດທະນະທຳຂອງແຂວງໄຊສົມບູນ ປະຈຳປີ 2023, ສະຫຼຸບ 5 ເດືອນຕົ້ນປີ ແລະ ທິດທາງແຜນການທ້າຍ ປີ 2024 ຈັດຂຶ້ນໃນຕອນເຊົ້າວັນທີ 14 ພຶດສະພານີ້ ທີ່ຫ້ອງປະຊຸມຂອງພະແນກດັ່ງກ່າວວ່າ: ທົ່ວແຂວງໄຊສົມບູນ ມີທັງໝົດ 89 ບ້ານ, ມີພົນລະເມືອງທັງໝົດ 99.800 ກວ່າຄົນ, ຍິງ 48.900 ກວ່າຄົນ, ມີບ້ານວັດທະນະທຳທັງໝົດ 71 ບ້ານ, ມີທັງໝົດ 17.500 ກວ່າຄອບຄົວ, ຄອບຄົວວັດທະນະທຳ 12.500 ກວ່າຄອບຄົວ ແລະ ກຳລັງສືບຕໍ່ສ້າງ ຈຳນວນ 6 ບ້ານ.
ໃນໄລຍະ 1 ປີຜ່ານມາ ສາມາດສ້າງ ແລະ ປະກາດຮັບຮອງເປັນບ້ານວັດທະນະທຳ ໄດ້ຈຳນວນ 4 ບ້ານ ລື່ນຄາດໝາຍ 1 ບ້ານ ແລະ ປະກາດຮັບຮອງເປັນບ້ານວັດທະນະທຳ ສະໄໝ ທີ 2 ໄດ້ 1 ບ້ານ, ມີຄອບຄົວວັດທະນະທຳໃໝ່ 600 ກວ່າຄອບຄົວ ລື່ນຄາດໝາຍ 100 ກວ່າຄອບຄົວ.
ນອກຈາກນີ້ ຍັງໄດ້ລົງຊຸກຍູ້ວຽງານການສ້າງຄອບຄົວ ແລະ ບ້ານວັດທະນະທຳ ໃຫ້ແກ່ຄະນະກຳມະການສ້າງຄອບຄົວ ແລະ ບ້ານວັດທະນະທຳ ຢູ່ເມືອງຮົ່ມ ແລະ ໄດ້ສົມທົບກັບສະຖາບັນສື່ມວນຊົນ ຈັດຊຸດຝຶກອົບຮົມການອະນຸລັກ ແລະ ສົ່ງເສີມວັດທະນະທຳບັນດາເຜົ່າ ໃຫ້ແກ່ບັນດາພະແນກການ, ອົງການອ້ອມຂ້າງແຂວງ ແລະ ຫ້ອງການ ຖວທ ທັງ 5 ເມືອງ ສຳເລັດ.
