ເພື່ອເປັນການປັບປຸງກົງຈັກການຈັດຕັ້ງ ຢູ່ດ່ານຊາຍແດນສາກົນ ແລະ ດ່ານຊາຍແດນປະເພນີ ພາຍໃນແຂວງ ໄຊຍະບູລີ ໃຫ້ເຂົ້າສູ່ລະບົບ ແລະ ມີຄວາມເປັນລະບຽບຮຽບຮ້ອຍ, ແນ່ໃສ່ເພື່ອເຮັດໃຫ້ການຈັດຕັ້ງປະຕິບັດໜ້າທີ່ວຽກງານຂອງແຕ່ລະຂະແໜງການພາຍໃນດ່ານໃຫ້ມີປະສິດທິຜົນສູງ, ໃນການອໍານວຍຄວາມສະດວກຕໍ່ການບໍລິການ, ການແລກປ່ຽນສິນຄ້າ, ການເຂົ້າ-ອອກຂອງຜູ້ໂດຍສານ ໃຫ້ມີຄວາມສະດວກວ່ອງໄວ, ຖືກຕ້ອງໂປ່ງໃສ ແລະ ເພື່ອເປັນການປະກອບໃນການສ້າງສາຍພົວພັນ ການຮ່ວມມືມິດຕະພາບທີ່ດີກັບ ບັນດາປະເທດໃນພາກພື້ນ ແລະ ສາກົນ, ເວົ້າລວມ, ເວົ້າສະເພາະແມ່ນປະເທດເພື່ອນບ້ານທີ່ມີຊາຍແດນຕິດຈອດກັບແຂວງ ໄຊຍະບູລີ,  ເພື່ອເຮັດໃຫ້ການພັດທະນາເສດຖະກິດ-ສັງຄົມຂອງແຂວງໃຫ້ມີການຂະຫຍາຍຕົວຢ່າງຕໍ່ເນື່ອງ ແລະ ຍືນຍົງ.

ໃນຕອນເຊົ້າຂອງວັນທີ 21 ພຶດສະພາ ປີນີ້, ທີ່ສະໂມສອນຫ້ອງວ່າການແຂວງ ໄຊຍະບູລີ ໄດ້ຈັດກອງປະຊຸມປຶກສາຫາລື ແລະ ກຽມຄວາມພ້ອມໃນການ ປັບປຸງກົງຈັກການຈັດຕັ້ງ, ການກໍານົດຕໍາແໜ່ງງານ ແລະ ບຸກຄະລາກອນ ພາຍໃນດ່ານຊາຍແດນສາກົນ ແລະ ດ່ານຊາຍແດນ ປະເພນີ, ໂດຍການເຂົ້າຮ່ວມ ແລະ ເປັນປະທານຂອງ ທ່ານ ເພັດພິໄຊ ສູນວິໄລ ກໍາມະການປະຈໍາພັກແຂວງ, ຮອງເຈົ້າແຂວງ ໄຊຍະບູລີ, ເຂົ້າຮ່ວມມີ ຄະນະຈັດຕັ້ງແຂວງ, ພະແນກ ພາຍໃນ, ກອງຄຸ້ມຄອງພາສີ 3, ຫ້ອງວ່າການແຂວງ, ປກສ ແລະ ຫົວໜ້າຂະແໜງຈັດຕັ້ງ-ກວດກາພາຍໃນພະແນກການທີ່ກ່ຽວຂ້າງເຂົ້າຮ່ວມ, ທ່ານ ສີລິວັດທະນາ ສົມພັນ ຫົວໜ້າພະແນກ ພາຍໃນແຂວງ ໄດ້ຂຶ້ນຜ່ານ ຂໍ້ຕົກລົງຂອງທ່ານເຈົ້າແຂວງ, ສະບັບເລກທີ 672/ຈຂ.ຊຍ, ລົງວັນທີ 19 ພຶດສະພາ 2021 ວ່າດ້ວຍ ການແຕ່ງຕັ້ງຄະນະຮັບຜິດຊອບຄົ້ນຄົ້ວ-ປັບປຸງກົງຈັກການຈັດຕັ້ງ, ການກໍານົດຕໍາແໜ່ງງານ ແລະ ບຸກຄະລາກອນ ພາຍໃນດ່ານຊາຍແດນສາກົນ ແລະ ດ່ານຊາຍແດນ ປະເພນີຕ່າງໆໃນຂອບເຂດແຂວງ ໄຊຍະບູລີ, ໂດຍໄດ້ແຕ່ງຕັ້ງ ທ່ານ ເພັດພິໄຊ ສູນວິໄລ ຮອງເຈົ້າແຂວງ ໄຊຍະບູລີ ເປັນຫົວໜ້າຄະນະຮັບຜິດຊອບປັບປຸງກົງຈັກການຈັດຕັ້ງ ພ້ອມດ້ວຍຄະນະອີກຈໍານວນໜຶ່ງ, ຈາກນັ້ນກອງປະຊຸມກໍ່ໄດ້ປຶກສາຫາລືກັນເພື່ອວາງແຜນ ແລະ ກໍານົດຕາງຕະລາງ, ວັນ-ເວລາເພື່ອຈະລົງປັບປຸງກັງຈັກການຈັດຕັ້ງດັ່ງກ່າວ, ໂດຍໄດ້ກໍານົດໂຄງປະກອບກົງຈັກຂອງດ່ານຊາຍແດນເປັນ 4 ໜ່ວຍງານຄື: ໜ່ວຍງານບໍລິຫານ, ຈັດຕັ້ງ ແລະ ກວດກາ, ໜ່ວຍງານ ກວດຄົນເຂົ້າ-ອອກເມືອງ, ໜ່ວຍງານ ພາສີ ແລະ ໜ່ວຍງານ ກັກກັນພືດ-ສັດ, ອາຫານ, ຢາ ແລະ ຄວບຄຸມພະຍາດຕິດຕໍ່, ພ້ອມດຽວກັນກໍ່ໄດ້ແບ່ງອອກເປັນ 2 ທີມງານ ແລະ ຈະໄດ້ເລີ່ມລົງເຮັດວຽກຕົວຈິງໃນທ້າຍເດືອນພຶດສະພານີ້ເປັນຕົ້ນໄປ.

ຂ່າວ-ພາບ: ອຸ່ນເຮືອນ ໂພທິລັກ

Loading...