ກອງປະຊຸມ ສະໄໝວິສາມັນ ຂອງສະພາປະຊາຊົນແຂວງ ໄຊຍະບູລີ ຊຸດທີ I ໄດ້ຈັດຂຶ້ນໃນຕອນເຊົ້າຂອງວັນທີ 21 ຕຸລາ 2020 ທີ່ຫ້ອງປະຊຸມໃຫຍ່ຂອງແຂວງ, ພາຍໃຕ້ການເປັນປະທານຂອງ ທ່ານ ປອ ສົມລິດ ເປືອກແກ້ວ ປະທານສະພາປະຊາຊົນແຂວງ, ເຂົ້າຮ່ວມເປັນກຽດມີ ທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ, ມີສະມາຊິກສະພາປະຈໍາເຂດເລືອກຕັ້ງ, ມີຫົວໜ້າ-ຮອງຫົວໜ້າພະແນກການ, ກົມກອງອ້ອມຂ້າງແຂວງ ແລະ ລັດວິສາຫະກິດເຂົ້າຮ່ວມ 100 ກວ່າຄົນ.

ທ່ານ ປອ ສົມລິດ ເປືອກແກ້ວ ປະທານສະພາປະຊາຊົນແຂວງ ໄດ້ກ່າວວ່າ: ກອງປະຊຸມສະໄໝວິສາມັນຄັັ້ງນີ້ ຈະໄດ້ສຸມໃສ່ພິຈາລະນາ, ຮັບຮອງ ແລະ ຕົກລົງ ບາງບັນຫາສໍາຄັນຄື: ພິຈາລະນາຮັບຮອງເອົາການເລືອກຕັັ້ງເຈົ້າແຂວງຜູ້ໃໝ່, ພິຈາລະນາຮັບຮອງເອົາ ການສະເໜີຂອງທ່ານເຈົ້າແຂວງ ວ່າດ້ວຍການແຕ່ງຕັັ້ງຮອງເຈົ້າແຂວງ, ຫົວໜ້າພະແນກການ, ອົງການທຽບເທົົ່າ ຂອງແຂວງ, ພິຈາລະນາຮັບຮອງເອົາການແຕ່ງຕັັ້ງ ຫົວໜ້າອົງການໄອຍະການປະຊາຊົນແຂວງຜູ້ໃໝ່ ແລະພິຈາລະນາຮັບຮອງເອົາການແຕ່ງຕັັ້ງ ປະທານສານປະຊາຊົນແຂວງຜູ້ໃໝ່, ຈາກນັ້ນ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ກໍ່ໄດ້ຂຶ້ນຜ່ານ ບົດລາຍງານການເຄື່ອນໄຫວວຽກງານ 5 ປີຂອງແຂວງໂດຍຫຍໍ້, ພ້ອມທັງກ່າວລາໜ້າທີ່, ບາງຕອນທ່ານໄດ້ກ່າວວ່າ: ດ້ວຍຄວາມຮັບຜິດຊອບໂດຍກົງຂອງອົງການປົກຄອງແຂວງ ແລະ ການຫັນເອົາພະນັກງານລົງກໍ່ສ້າງຮາກຖານການເມືອງຕາມ​ທິດ​ນໍາ​ 3 ສ້າງ ຕິດພັນກັບການຈັດຕັ້ງປະຕິບັດແນວທາງ ວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ, ການສ້າງບ້ານປ້ອມໝັ້ນ, ກຸ່ມບ້ານສູ້ຮົບຕິດລຽນ, ການສ້າງແຜນປ້ອງກັນບໍລິເວນ ແລະການສ້າງບ້ານປ້ອງກັນຊາດ, ປ້ອງກັນຄວາມສະຫງົບໃຫ້ເຂັ້ມແຂງຈຶ່ງເຮັດໃຫ້ແຂວງສືບຕໍ່ມີສະຖຽນລະພາບທາງດ້ານການເມືອງ, ຮັກສາໄດ້ຄວາມສະຫງົບ ແລະຄວາມເປັນລະບຽບຮຽບຮ້ອຍໃນສັງຄົມໂດຍພື້ນຖານ,ຮັບປະກັນໃຫ້ແກ່ການພັດທະນາເສດຖະກິດ-ສັງຄົມ ໃຫ້ມີການຂະຫຍາຍຕົວຢ່າງຕໍ່ເນື່ອງ ແລະມີຜົນງານອັນພົ້ນເດັ່ນຫຼາຍດ້ານເຊັ່ນ: ເສດຖະກິດຂອງແຂວງໄດ້ສືບຕໍ່ຂະຫຍາຍຕົວສະເລ່ຍໃນລະດັບ 6,7 % ລວມຍອດຜະລິດຕະພັນພາຍໃນບັນລຸໄດ້ 10.706 ຕື້ກີບ, ສະເລ່ຍໃສ່ຫົວຄົນໄດ້ 3.031 ໂດລາທຽບໃສ່ ປີ 2015 ​ເພີ່ມຂຶ້ນ 618 ໂດລາສະຫະລັດ, ການຜະລິດສະບຽງອາຫານສາມາດກຸ້ມກິນ ແລະມີສ່ວນແຮໄວ້ເປັນສິນຄ້າ, ການຜະລິດເປັນສິນຄ້າໄດ້ມີການຂະຫຍາຍຕົວເພີ່ມຂຶ້ນເປັນຕົ້ນແມ່ນການປູກມັນຕົ້ນ, ສາລີ, ໝາກເດືອຍ, ພືດຕະກຸນຖົ່ວ, ຕິດພັນກັບການປຸງແຕ່ງ, ການລ້ຽງສັດໃຫຍ່ປະເພດ (ງົວ,ຄວາຍ) ແມ່ນຫັນມາລ້ຽງແບບເປັນຟາມຂອງຄອບຄົວຕິດພັນກັບການປູກຫຍ້າ, ພື້ນຖານໂຄງລ່າງເສັ້ນທາງ, ໂທລະຄົມມະນາຄົມ, ນ້ຳປະປາ, ໄຟຟ້າແລະ ສິ່ງສາທາລະນະປະໂຫຍດອື່ນໆສືບຕໍ່ໄດ້ຮັບການພັດທະນາ, ກອງປະຊຸມແມ່ນໄດ້ມີການປະກອບຄໍາເຫັນ ແລະ ລົງຄະແນນສຽງຮັບຮອງເອົາເຈົ້າແຂວງ, ຮອງເຈົ້າແຂວງ, ຫົວໜ້າພະແນກການອ້ອມຂ້າງແຂວງ.

ຂ່າວ-ພາບ: ອຸ່ນເຮືອນ ໂພທິລັກ

Loading...