ໃນຕອນບ່າຍຂອງວັນທີ 14 ມັງກອນ ປີນີ້, ທີ່ສະໂມສອນຫ້ອງວ່າການແຂວງ ໄຊຍະບູລີ ໄດ້ຈັດກອງປະຊຸມ ປຶກສາຫາລືກ່ຽວກັບ ການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19, ໂດຍໃຫ້ກຽດເຂົ້າຮ່ວມເປັນປະທານໂດຍ ທ່ານ ເພັງນິລັນ ຄໍາພັນເພັງ ຮອງເລຂາພັກແຂວງ, ເຂົ້າຮ່ວມມີບັນດາຫົວໜ້າ, ຮອງຫົວໜ້າພະແນກການ, ກົມກອງອ້ອມຂ້າງແຂວງ, ມີຮອງເຈົ້າເມືອງ 11 ເມືອງ, ມີຕາງໜ້າ 4 ດ່ານສາກົນ, 2 ໂຄງການໄຟຟ້າ ແລະ ຄະນະຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ຂັ້ນແຂວງເຂົ້າຮ່ວມ.

ໃນກອງປະຊຸມ ດຣ ນາງ ໄກຍະສອນ ສີດາ ຫົວໜ້າພະແນກ ສາທາລະນະສຸກແຂວງ ໄດ້ຂຶ້ນຜ່ານບົດສະຫຼຸບ ແລະ ແຜນການຈັດຕັ້ງປະຕິບັດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ເຊິ່ງທ່ານໄດ້ກ່າວວ່າ: ສະເພາະແຕ່ວັນທີ 1-13 ມັງກອນ 2021 ນີ້, ມີຄົນເຂົ້າເມືອງຜ່ານດ່ານຕ່າງໆພາຍໃນແຂວງທີ່ຖືກຕ້ອງມີທັງໝົດ 1.763 ຄົນ, ຍິງ 130 ຄົນ, ໃນນີ້: ຄົນລາວ 390 ຄົນ, ຄົນໄທ 1.373 ຄົນ, ຍິງ 130 ຄົນ, ຜ່ານດ່ານ ສາກົນນໍ້າເຫືອງ ຈໍານວນ 626 ຄົນ, ຍິງ 70 ຄົນ, ຜ່ານດ່ານ ນໍ້າເງິນ ຈໍານວນ 929 ຄົນ, ຍິງ 60 ຄົນ, ຜ່ານ ດ່ານພູດູ່ ຈໍານວນ 63 ຄົນ ແລະ ຜ່ານ ດ່ານປາງມອນ ຈໍານວນ 145 ຄົນ, ຄົນລັກລອບເຂົ້າເມືອງບໍ່ຖືກຕ້ອງຈໍານວນທັງໝົດ 98 ຄົນ, ສັງລວມແລ້ວ ແຮງງານລາວ ແລະ ຕ່າງປະເທດທີ່ເດີນທາງເຂົ້າມາແຂວງ ໄຊຍະບູລີ ທີ່ຖືກຕ້ອງ ແລະ ບໍ່ຖືກຕ້ອງນັ້ນ ທາງຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ຂັ້ນແຂວງແມ່ນໄດ້ປະຕິບັດຕາມມາດຕະການຢ່າງເຂັ້ມງວດຄື: ວັດແທກອຸນຫະພູມ ແລະ ກັກຕົວ 14 ວັນ, ປະຈຸບັນທົ່ວແຂວງ ໄຊຍະບູລີ ມີສູນກັກກັນບໍລິເວນຢູ່ຂັ້ນບ້ານ 2 ແຫ່ງ, ຢູ່ໂຮງແຮມ-ບ້ານພັກ 33 ແຫ່ງ, ໄດ້ເກັບຕົວຢ່າງໄປກວດຢູ່ສູນກາງ ແລະ ໂຮງໝໍແຂວງ ແຕ່ວັນທີ 1 ພຶດສະພາ 2020 ຫາ ວັນທີ 13 ມັງກອນ 2021 ທັງໝົດ 4,515 ຕົວຢ່າງ, ຜົນກວດ ບໍ່ພົບເຊື້ອ 4,509 ຕົວຢ່າງ, ຍັງບໍ່ທັນໄດ້ຜົນກວດ 6 ຕົວຢ່າງ, ສໍາລັບແຜນການຕໍ່ໜ້າແມ່ນຈະສືບຕໍ່ຈັດຕັ້ງປະຕິບັດບັນດາມາດຕະການຜ່ອນຜັນ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19, ກະກຽມຄວາມພ້ອມໃນການຮັບມືກັບການລະບາດທີ່ອາດຈະເກີດຂຶ້ນເຊັ່ນ: ສະຖານທີ່ໂຮງໝໍ, ສູນກັກກັນບໍລິເວນ, ບຸກຄະລາກອນແພດໝໍ, ຢາ ແລະ ອຸປະກອນການແພດ, ອຸປະກອນຮັບໃຊ້ຕ່າງໆ.

ຂ່າວ-ພາບ: ອຸ່ນເຮືອນ ໂພທິລັກ

Loading...