ໃນຕອນເຊົ້າຂອງວັນທີ 5 ທັນວາ 2020 ແຂວງ ໄຊຍະບູລີ ໄດ້​ຈັດ​ພິທີ ປາຖະກະຖາເລົ່າຄືນມູນເຊື້ອ​ວັນ​ສໍາ​ຄັນ​ຂອງ​ພັກ​-​ຂອງ​ຊາດ ຄື: ວັນຊາດ​ທີ 2 ທັນວາ ຄົບຮອບ 45 ປີ(2/12/1975-2/12/2020) ແລະ ວັນ​ຄ້າຍວັນເກີດ​ປະທານໄກສອນ ພົມວິຫານຄົບຮອບ 100 ປີ(13/12/1920-13/12/2020) ຂຶ້ນ ທີ່​ຫ້ອງ​ປະຊຸມ​ໃຫຍ່ຂອງແຂວງ, ເປັນກຽດເຂົ້າຮ່ວມ ແລະ ເລົ່າຄືນມູນເຊື້ອ​ໂດຍ ທ່ານ ສົມ​ສະຫວາດ ເລັ່ງ​ສະ​ຫວັດ ອາດີດ​ກໍາ​ມະ​ການ​ກົມ​ການເມືອງ​ສູນ​ກາງ​ພັກ ອາດີດ​ຮອງ​ນາຍົກລັດຖະມົນຕີ, ​ເຂົ້າ​ຮ່ວມຮັບຟັງມີ​ ທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ, ມີບັນດາການນໍາທຸກພາກສ່ວນຂອງແຂວງ ພ້ອມດ້ວຍພະນັກງານຫຼັກແຫຼ່ງອ້ອມຂ້າງແຂວງເຂົ້າຮ່ວມຢ່າງຫຼວງຫຼາຍ.

ກ່ອນອື່ນຜູ້ເຂົ້າຮ່ວມແມ່ນໄດ້ຮັບຊົມການສະແດງສິລະປະ-ວັນນະຄະດີ 4 ລາຍການ, ຈາກນັ້ນ ທ່ານ ສົມ​ສະຫວາດ ເລັ່ງ​ສະ​ຫວັດ ກໍ່ໄດ້ໃຫ້ກຽດຂຶ້ນເລົ່າຄືນມູນເຊື້ອ 2 ວັນປະຫວັດສາດ, ທ່ານໄດ້​ຍົກ​ໃຫ້​ເຫັນເຖິງ ການ​ຕໍ່​ສູ້​ຢ່າງ​ພິ​ລະ​ອາດ​ຫານ​ຂອງກອງ​ທັບ ແລະ ປະ​ຊາ​ຊົນ​ລາວ​ບັນ​ດາ​ເຜົ່າ​ພາຍ​ໃຕ້​ການ​ນຳ​ພາ​ຂອງ​ພັກ ​ຈົນສາມາດ​ປົດ​ປ່ອຍປະ​ເທດ​ຊາດ​ຢ່າງ​ມີ​ໄຊແລະ ສະຖາປະນາ​ສາທາລະນະ​ລັດ ປະຊາທິປະໄຕ ປະຊາຊົນ​ລາວ ຂຶ້ນ​ຢ່າງ​ສະຫງ່າ​ຜ່າເຜີຍ ໃນ​ວັນ​ທີ 2/12/ 1975, ພາຍຫຼັງ​ປະເທດ​ຊາດ​ໄດ້​ຮັບ​ການສະຖາປະນາ ພັກ​ປະຊາຊົນ​ປະ ຕິວັດ​ລາວ ໄດ້​ນໍາ​ພາ​ທົ່ວ​ປວງ​ຊົນ​ລາວ​ບັນດາເຜົ່າ ປະຕິບັດ​ສອງ​ໜ້າທີ່​ຍຸດທະສາດ​ຄື: ປົກ​ປັກ​ຮັກສາ​ປະເທດ​ຊາດ ແລະ ກໍ່ສ້າງ​ລະບອບ​ປະຊາທິປະໄຕ ປະຊາຊົນ ຕາມ​ຈຸດໝາຍ​ສັງຄົມ​ນິຍົມ, ພ້ອມ​ດຽວ​ກັນ​ ທ່ານ ສົມ​ສະຫວາດ ເລັ່ງ​ສະ​ຫວັດ ຍັງ​ໄດ້​ເລົ່າຄືນ​​ວັນຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 100 ປີ ຕື່ມອີກ, ເຊິ່ງທ່ານໄດ້ຍົກໃຫ້ເຫັນເຖິງຄວາມເປັນ​ແບບຢ່າງ​ອັນ​ປະເສີດ​ເລີດ​ລໍ້າ​ດ້ານ​ຄຸນ​ທາດ​ການເມືອງ, ຄຸນສົມບັດ​ສິນ​ທໍາ​ປະຕິວັດ, ແບບແຜນ​ປະຕິວັດ ກໍ​ຄື​ແບບແຜນ​ການ​ດໍາ​ລົງ​ຊີວິດ​ຂອງ ປະທານ ໄກສອນ ພົມວິຫານ ຕະຫຼອດໄລຍະຜ່ານມາ, ການເຜີຍແຜ່ເຊື່ອມຊຶມຄັ້ງນີ້ເພື່ອເປັນການໂຄສະນາ-ສຶກສາອົບຮົມ ການເມືອງ-ແນວຄິດ ໃຫ້ສະມາຊິກພັກ, ພະນັກງານຫລັກແຫລ່ງຂອງແຂວງ ໄຊຍະບູລີໃຫ້ມີຄວາມຮັບຮູ້, ຄວາມເຂົ້າໃຈກ່ຽວກັບຄວາມໝາຍ, ຄວາມສໍາຄັນຂອງວັນຊາດ ຄົບຮອບ 45 ປີ ແລະ ວັນຄ້າຍວັນເກີດຂອງ ປະທານ ໄກສອນ ພົມວິຫານ ຄົບຮອບ 100 ປີ ຢ່າງເລິກເຊິ່ງ, ອັນໄດ້ເຮັດໃຫ້ພະນັກງານສະມາຊິກພັກໄດ້ຮັບຮູ້ ແລະ ຮໍ່າຮຽນເອົາແບບຢ່າງອັນໃສແຈ້ງດີເດັ່ນຂອງເພິ່ນມາຝຶກຝົນຫລໍ່ຫລອມຕົນເອງ ເພື່ອຮັບໃຊ້ຊາດ, ຮັບໃຊ້ປະຊາຊົນດ້ວຍຄວາມບໍລິສຸດຜຸດຜ່ອງ, ພ້ອມກັນຈັດຕັ້ງປະຕິບັດແນວທາງແຜນນະໂຍບາຍຂອງພັກ-ລັດໃຫ້ປະກົດຜົນເປັນຈິງ.

ຂ່າວ-ພາບ: ອຸ່ນເຮືອນ ໂພທິລັກ

Loading...