ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ແຂວງ ໄຊຍະບູລີ ແຕ່ງຕັ້ງຄະນະຮັບຜິດຊອບ ກະກຽມ ການສະເຫຼີມສະຫຼອງ ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ

ເພື່ອເປັນການກຽມຄວາມພ້ອມໃຫ້ແກ່ການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ທີ່ຈະມາເຖິງໃນມໍ່ໆນີ້ ໃຫ້ມີບັນຍາກາດອັນຄຶກຄື້ນນັ້ນ, ແຂວງ ໄຊຍະບູລີ ຈຶ່ງໄດ້ຈັດກອງປະຊຸມແຕ່ງຕັ້ງຄະນະຮັບຜິດຊອບກະກຽມການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີຂຶ້ນ, ທີ່ຫ້ອງປະຊຸມ ຫ້ອງວ່າການແຂວງ, ເຂົ້າຮ່ວມມີ ທ່ານ ປອ ສົມລິດ ເປືອກແກ້ວ ຮອງເລຂາພັກແຂວງ, ປະທານສະພາປະຊາຊົນແຂວງ, ມີບັນດາຫົວໜ້າພະແນກການ, ຫົວໜ້າກອງບັນຊາການທະຫານແຂວງ, ປກສ ແຂວງ ແລະ ກອງພົນທະຫານຮາບທີ 2 ເຂົ້າຮ່ວມຢ່າງພ້ອມພຽງ.

ກອງປະຊຸມດັ່ງກ່າວ ທ່ານ ເພັດພິໄຊ ສູນວິໄລ ຫົວໜ້າຫ້ອງວ່າການແຂວງ ໄຊຍະບູລີ ໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າແຂວງ ໄຊຍະບູລີ, ສະບັບເລກທີ 695/ຈຂ.ຊຍ ລົງວັນທີ 26 ມິຖຸນາ 2018 ວ່າດ້ວຍການແຕ່ງຕັ້ງຄະນະຮັບຜິດຊອບກະກຽມການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ, ໂດຍປະຕິບັດຕາມຄຳສັ່ງແນະນຳສະບັບເລກທີ 1520/ກປທ ລົງວັນທີ 4 ເມສາ 2018 ຂອງກະຊວງປ້ອງກັນປະເທດ ວ່າດ້ວຍການກະກຽມ ແລະ ຈັດຕັ້ງສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ, ເຈົ້າແຂວງ ໄຊຍະບູລີ ຕົກລົງແຕ່ງຕັ້ງຄະນະຮັບຜິດຊອບຊີ້ນຳລວມ ມີ 15 ທ່ານ, ອານຸກຳມະການຮັບຜິດຊອບເນື້ອໃນມີ 10 ທ່ານ, ເຊິ່ງມີໜ້າທີ່ກະກຽມເອກະສານເນື້ອໃນຕ່າງໆເຊັ່ນ: ບົດປາໄສ, ຕາຕະລາງການເຄື່ອນໄຫວ, ເນື້ອໃນບັດເຊີນ, ຄຳແນະນຳ ແລະ ອື່ນໆ, ອານຸກຳມະການຮັບຜິດຊອບເສດຖະກິດມີ 12 ທ່ານ, ມີໜ້າທີ່ສັງລວມແຜນງົບປະມານ, ລະດົມການອຸປະຖຳຂອງຫົວໜ່ວຍທຸລະກິດ, ບໍລິສັດຫ້າງຮ້ານ ແລະ ເອກະຊົນ, ອານຸກຳມະການຂະບວນການ ແລະ ກ້ອນກຳລັງ ມີ 11 ທ່ານ, ມີໜ້າທີ່ ສ້າງແຜນຊີ້ນຳຊຸກຍູ້ປຸກລະດົມຂະບວນການແຂ່ງຂັນສ້າງຜົນງານໃຫ້ມີບັນຍາກາດຟົດຟື້ນ, ອານຸກຳມະການ ຮັບຜິດຊອບຍ້ອງຍໍຂອງຂັວນ ມີ 9 ທ່ານ, ມີໜ້າທີ່ສ້າງແຜນການເກັບກຳສັງລວມບັນດາວິລະຊົນ, ນັກຮົບແຂ່ງຂັນ, ພະນັກງານບຳນານ ແລະ ຄອບຄົວອາດີດການນຳ,  ອານຸກຳມະການຝຶກແອບສະແດງກຳລັງສວນສະໜາມ ມີ 12 ທ່ານ, ມີໜ້າທີ່ ສ້າງແຜນການ, ການເຄື່ອນໄຫວລາຍການສວນສະໜາມ, ຄາດກະກ້ອນກຳລັງທີ່ເຂົ້າຮ່ວມ, ອານຸກຳມະການ ສະຖານທີ່, ພິທີການ, ປະດັບປະດາ-ແສງສຽງ ມີ 12 ທ່ານ, ມີໜ້າທີ່ສ້າງແຜນການຮັບປະກັນໃຫ້ແກ່ພິທີຮ່ວມມິດຕິ່ງ, ເດີນຂະບວນສວນສະໜາມ, ອານຸກຳມະການ ຮັບແຂກ ມີ 15 ທ່ານ ມີໜ້າທີ່ກະກຽມສະຖານທີ່ພັກເຊົາຂອງແຂກ, ສະຖານທີ່ງານລ້ຽງ ແລະ ອື່ນໆ, ອານຸກຳມະການ ປ້ອງກັນ ມີ 9 ທ່ານ ມີໜ້າທີ່ສ້າງແຜນການ ແລະ ຊີ້ນຳກົມກອງເຄື່ອນໄຫວຕາມຂອບເຂດຄວາມຮັບຜິດຊອບໃຫ້ມີຄວາມສະຫງົບປອດໄພ ແລະ ອານຸກຳມະການ ຮັກສາສຸຂະພາບ ມີ 8 ທ່ານ ມີໜ້າທີ່ ລົງຕິດຕາມກວດກາສຸຂະພາບຢູ່ສະໜາມ.