ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ແຂວງ ໄຊຍະບູລີ ໄຂກອງປະຊຸມຄົບຄະນະ ບໍລິຫານງານພັກ ຄັ້ງທີ 15 ສະໄໝທີ VI

ກອງປະຊຸມຄົບຄະນະບໍລິຫານງານພັກ ແຂວງ ໄຊຍະບູລີ ຄັ້ງທີ 15 ສະໄໝທີ VI ໄດ້ໄຂຂຶ້ນໃນຕອນເຊົ້າຂອງວັນທີ 2 ກໍລະກົດ 2020 ທີ່ສະໂມສອນຫ້ອງວ່າການແຂວງ ໄຊຍະບູລີ, ໂດຍການເປັນປະທານຂອງ ສະຫາຍ ພົງສະຫວັນ ສິດທະວົງ, ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ, ມີ ບັນດາສະຫາຍ ກໍາມະການປະຈໍາພັກແຂວງ, ກໍາມະການພັກແຂວງ, ເລຂາພັກເມືອງ, ເຈົ້າເມືອງ 11 ເມືອງ, ເລຂາຄະນະພັກຮາກຖານ, ເລຂາໜ່ວຍພັກບັນດາພະ​ແນ​ກການ, ກົມ​ກອງ, ອົງການ, ລັດ​ວິ​ສາ​ຫະກິດ, ເຂົ້າຮ່ວມເກືອບ 100 ສະຫາຍ.

ໃນກອງປະຊຸມ ສະຫາຍ ພົງສະຫວັນ ສິດທະວົງ ໄດ້ກ່າວໃນໂອກາດໄຂກອງປະຊຸມຄັ້ງນີ້ວ່າ: ກອງປະຊຸມດັ່ງກ່າວແມ່ນຈະໄດ້ດໍາເນີນໄປເປັນເວລາ 1 ວັນເຄິ່ງ,  ກອງປະຊຸມຄັ້ງນີ້ແມ່ນຈະໄດ້ພ້ອມກັນ ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ X ຂອງພັກ, ສະຫຼຸບຕີລາຄາການຊີ້ນໍາ-ນໍາພາ ວຽກງານຮອບດ້ານໃນ 6 ເດືອນຕົ້ນປີ ແລະ ທິດທາງວຽກງານຈຸດສຸມ 6 ເດືອນທ້າຍປີ 2020, ປະກອບຄໍາເຫັນໃສ່ຮ່າງລາຍງານການເມືອງ ແລະ ຮ່າງແຜນພັດທະນາເສດຖະກິດ-ສັງຄົມ ຂອງກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ ເພື່ອເປັນພື້ນຖານສໍາຄັນ ແກ່ການກະກຽມ ແລະ ດໍາເນີນກອງປະຊຸມໃຫຍ່ອົງຄະນະພັກແຂວງຄັ້ງທີ VII ທີ່ຈະມາເຖິງໃນມໍ່ໆນີ້, ກອງປະຊຸມຍັງຈະໄດ້ພ້ອມກັນ ເບິ່ງບັນຫາຕ່າງໆ ແລະ ຕີລາຄາສະພາບເສດຖະກິດ-ສັງຄົມຂອງແຂວງໃນສະພາບປັດຈຸບັນໃຫ້ຖືກກັບຄວາມເປັນຈິງ ເຫັນໄດ້ດ້ານຕັ້ງໜ້າ ແລະ ດ້ານທີ່ຍັງອ່ອນຄົງຄ້າງ, ຮູ້ຈັກສາເຫດຕົ້ນຕໍທີ່ພາໃຫ້ມີດ້ານດີ-ດ້ານອ່ອນ, ໂດຍລວມແລ້ວແຂວງ ໄຊຍະບູລີ ແມ່ນຍັງສືບຕໍ່ຮັກສາສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ມີຄວາມເປັນລະບຽບຮຽບຮ້ອຍໂດຍພື້ນຖານ-ເສດຖະກິດ ຍັງສືບຕໍ່ຂະຫຍາຍຕົວ, ບັນຍາກາດການຜະລິດລະດູແລ້ງ ແລະ ການກະກຽມຜະລິດລະດູປີ ຂອງປະຊາຊົນຍັງສືບຕໍ່ເປັນຂະບວນການດີ, ບັນດາຄາດໝາຍສູ້ຊົນລະອຽດຂອງຂະແໜງການ, ຂອງບັນດາເມືອງ ໄດ້ຮັບການຈັດຕັ້ງປະຕິບັດ ແລະ ບັນລຸໄປແລ້ວຈໍານວນໜຶ່ງ, ບັນດາໂຄງການລົງທຶນຂອງລັດ ລວມທັງໂຄງການຂອງຂະແໜງການສູນກາງ ແລະ ໂຄງການລົງທຶນຂອງພາກເອກະຊົນທັງພາຍໃນ ແລະ ຕ່າງປະເທດ ໄດ້ດໍາເນີນໄປຕາມຂັ້ນຕອນຂອງກົດໝາຍ ມີຄວາມຄືບໜ້າ ແລະ ມີປະສິດທິຜົນເປັນສ່ວນຫຼາຍ, ພື້ນຖານໂຄງລ່າງຢູ່ຊົນນະບົດໄດ້ຮັບການພັດທະນາ ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງປົວແປງຍົກລະດັບດີຂຶ້ນ, ຜ່ານມາເຖິງວ່າຈະໄດ້ເອົາໃຈໃສ່ຢ່າງຕັ້ງໜ້າແລ້ວກໍ່ຕາມ ແຕ່ທຽບໃສ່ທ່າແຮງບົ່ມຊ້ອນຢູ່ພາຍໃນ, ທຽບໃສ່ຄວາມຮຽກຮ້ອງຕ້ອງການ ໃນການພັດທະນາແລ້ວ ເຫັນວ່າຍັງມີຂໍ້ຈໍາກັດ ແລະ ຈຸດອ່ອນຫຼາຍດ້ານ ບວກກັບບັນຫາຜົນກະທົບພະຍາດໂຄວິດ-19 ຊຶ່ງຄາດຄະເນໝົດປີ ບັນດາຄາດໝາຍຕ່າງໆຈໍານວນໜຶ່ງທີ່ວາງອອກຈະບໍ່ບັນລຸ, ປະກົດການຫຍໍ້ທໍ້ໃນສັງຄົມ, ຢາເສບຕິດ, ຂີ້ລັກ-ງັດແງະ, ອຸບັດຕິເຫດຕາມທ້ອງຖະໜົນ ແລະ ອື່ນໆ ຍັງມີທ່າອ່ຽງເພີ່ມຂຶ້ນ, ຮູບແບບການຈັດຕັ້ງການຜະລິດ, ຫົວໜ່ວຍທຸລະກິດ ຂະໜາດນ້ອຍ-ຂະໜາດກາງ ທີ່ມີຢູ່ຍັງບໍ່ທັນແຂງແຮງ, ຄວາມສາມາດໃນການແກ່ງແຍ້ງແຂ່ງຂັນບໍ່ທັນສູງ, ຕະຫຼາດສິນຄ້າກະສິກໍາຍັງມີຄວາມສ່ຽງ, ການຈັດເກັບລາຍຮັບເຂົ້າງົບ ປະມານ ບໍ່ທັນບັນລຸຕາມຄາດໝາຍ, ຕົວຊີ້ວັດການພັດທະນາແບບຍືນຍົງ ຈໍານວນໜຶ່ງ ມີຄວາມສ່ຽງຈະບໍ່ບັນລຸຄາດໝາຍວາງໄວ້.

ຂ່າວ: ອຸ່ນເຮືອນ ໂພທິລັກ