ພິທີໄຂສົກຮຽນໃໝ່ສົກ 2022-2023 ໄດ້ຈັດຂຶ້ນໃນຕອນເຊົ້າຂອງວັນທີ 1 ກັນຍາ 2022, ທີ່ສະໂມສອນພະແນກ ສືກສາທິການ ແລະ ກິລາ ແຂວງ ໄຊຍະບູລີ, ເຂົ້າຮ່ວມເປັນກຽດມີ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ, ມີທ່ານ ບຸນແທນ ທີແກ້ວ ເຈົ້າເມືອງ ໄຊຍະບູລີ, ມີບັນດາການນໍາຂອງແຂວງ, ເມືອງ ໄຊຍະບູລີ, ມີອໍານວຍການໂຮງຮຽນທັງພາກລັດ ແລະ ອກະຊົນ, ມີນັກທຸລະກິດ, ນາຍບ້ານເທດສະບານເມືອງ, ມີຄູ-ອາຈານ ແລະ ນ້ອງນັກຮຽນເຂົ້າຮ່ວມຢ່າງຫຼວງຫຼາຍ.
ໃນພິທີ ໄດ້ຮັບຊົມການສະແດງ ສິລະ ປະ-ວັນນະຄະດີຂອງນ້ອງນັກຮຽນ 5 ລາຍການ, ຈາກນັ້ນ ທ່ານ ອ່ອນຕາ ພົມມະຈິດ ຫົວໜ້າພະແນກ ສືກສາທິການ ແລະ ກິລາແຂວງ ໄດ້ຂຶ້ນລາຍງານການກຽມຄວາມພ້ອມໃຫ້ແກ່ການໄຂສົກຮຽນໃໝ່ເຊິ່ງທ່ານໄດ້ກ່າວວ່າ: ກ່ອນໄຂສົກຮຽນໃໝ່ແມ່ນໄດ້ປຸກລະດົມພໍ່ແມ່ຜູ້ປົກຄອງນຳເອົາເດັກນັກຮຽນມາເຂົ້າຮຽນໃຫ້ໄດ້ຕາມຄາດໝາຍ, ພ້ອມທັງບູລະນະສ້ອມແປງອາຄານສະຖານທີ່ຮໍ່າຮຽນໃຫ້ສະອາດ ແລະ ພຽງພໍ ພ້ອມທັງໃຫ້ເລີ່ມຮັບນັກຮຽນແຕ່ວັນທີ 25 ສິງຫາ 2022 ເປັນຕົ້ນໄປ, ສໍາລັບສົກຮຽນນີ້ທົ່ວແຂວງ ມີໂຮງຮຽນອະນຸບານ-ລ້ຽງເດັກ 321 ແຫ່ງ ໃນນີ້ພາກເອກະຊົນ 19 ແຫ່ງ, ຄາດວ່າມີນັກຮຽນລ້ຽງເດັກ 1.508 ຄົນ, ຍິງ 701 ; ລ້ຽງເດັກເອກະຊົນ 444 ຄົນ ຍິງ 195 ຄົນ ; ນັກຮຽນອະນຸບານ 16.220 ຄົນ, ຍິງ 5948 ຄົນ , ນັກຮຽນອະນຸບານເອກະຊົນ 1.499 ຄົນ ຍິງ 710 ຄົນ, ມີໂຮງຮຽນປະຖົມສຶກສາທັງໝົດ 398 ແຫ່ງ ໃນນີ້ພາກເອກະຊົນ 13 ແຫ່ງ, ຄາດວ່າມີນັກຮຽນ 37.633 ຄົນ ຍິງ 18.498 ຄົນ , ໂຮງຮຽນມັດທະຍົມທັງໝົດ 102 ແຫ່ງ ໃນນີ້້ມີຊັ້ນມັດທະຍົມຕອນຕົ້ນ 38 ແຫ່ງ ມັດທະຍົມສົມບູນ 64 ແຫ່ງ( ເປັນໂຮງຮຽນມັດທະຍົມສົງ 6 ແຫ່ງຕອນຕົ້ນ 4 ແຫ່ງ) , ຄາດວ່າມີນັກຮຽນ 33.871 ຄົນ ຍິງ 16.948 ຄົນ, ໂອກາດດັ່ງກ່າວ ທ່ານ ພົງສະຫວັນ ສິດທະວົງ ໄດ້ກ່າວວ່າ: ວັນທີ 1 ກັນຍາ 2022 ແມ່ນວັນໄຂສົກຮຽນໃໝ່ສົກຮຽນ 2022-2023 ຈຸດປະສົງກໍເພື່ອປະກາດໃຫ້ທົ່ວສັງຄົມຮັບຮູ້ວ່າ ແຂວງໄຊຍະບູລີ ກໍຄືເມືອງໄຊຍະບູລີ ໄດ້ເລີ່ມຕົ້ນດໍາເນີນການຮຽນ-ການສອນຢ່າງເປັນທາງການ, ສ້າງທຸກເງື່ອນໄຂເພື່ອຈັດການຮຽນ-ການສອນ ໃຫ້ທ່ວງທັນກໍານົດເວລາ ແລະ ຖືກຕ້ອງຕາມກົດໝາຍການສຶກສາວາງອອກ, ດ້ານໜຶ່ງກໍເພື່ອເປັນການສ້າງເງື່ອນໄຂກະຕຸກຊຸກຍູ້ໃຫ້ຜູ້ບໍລິຫານການສຶກສາ-ກິລາ, ຄູ-ອາຈານ, ທຸກການຈັດຕັ້ງ, ທຸກພາກສ່ວນເສດຖະກິດ-ສັງຄົມ ເອົາໃຈໃສ່ເຮັດໜ້າທີ່ຂອງຕົນດ້ວຍຄວາມຮັບຜິດຊອບ ຮັບປະກັນໃຫ້ນັກຮຽນ-ນັກສຶກສາ ໄດ້ເຂົ້າຮຽນ ນັບແຕ່ວັນໄຂສົກຮຽນໃໝ່ນີ້ເປັນຕົ້ນໄປ, ຕອນທ້າຍຂອງພິທີແມ່ນໄດ້ຕັດແຖບຜ້າ, ປ່ອຍປູມເປົ້າ ເພື່ອເປັນການເປີດການຮຽນ-ການສອນຢ່າງເປັນທາງການ.
ຂ່າວ-ພາບ: ອຸ່ນເຮືອນ ໂພທິລັກ
