ຮ່ອງຄວາມກົດດັນອາກາດຕໍ່າ ຍັງພາດຜ່ານຢູ່ພາກເໜືອຂອງປະເທດລາວ, ສົມທົບກັບກະແສລົມມໍລະສຸມ ຕາເວັນຕົກສ່ຽງໃຕ້ພັດປົກຄຸມດ້ວຍກຳລັງປານກາງ. ຊຶ່ງຈະເຮັດໃຫ້ ຍັງຈະມີຝົນຕົກໃນລະດັບຄ່ອຍ ຫາ ປານກາງຢູ່ເກືອບທົ່ວໄປຢູ່ໃນແຕ່ລະພາກ ແລະ ຈະຕົກໜັກ ພ້ອມມີລົມພັດແຮງເປັນບາງໂອກາດຢູ່ບາງຖິ່ນແຂວງພາກເໜືອ ແລະ ພາກກາງ. ເນື່ອງ ຈາກໄດ້ມີຝົນຕົກໜັກໃນໄລຍະຫຼາຍມື້ຜ່ານມາ, ໄດ້ເຮັດໃຫ້ລະດັບນໍ້າຢູ່ຕາມແມ່ນໍ້າສາຂາຢູ່ເຂດພາກກາງ ເພີ່ມຂຶ້ນສູງຢ່າງຕໍ່ເນື່ອງ ໂດຍສະເພາະລະດັບນໍ້າຢູ່ສະຖານີ ມະຫາໄຊ ເວລາ 07:00 ໂມງ ຂອງວັນທີ 01 ສິງຫາ 2024 ແທກໄດ້ 14.39 ແມັດ (ລະດັບນໍ້າເຂດເຕືອນໄພ 14,00 ແມັດ; ເຂດອັນຕະລາຍ 15,00 ແມັດ), ສະຖານີ ເຊບັ້ງໄຟ ລະດັບນໍ້າແທກໄດ້ 18.38 ແມັດ ( ລະດັບນໍ້າເຂດເຕືອນໄພ 17.50 ແມັດ; ເຂດອັນຕະລາຍ 18.50 ແມັດ) ແລະ ສະຖານີ ຕົ້ນແຫນ ລະດັບນໍ້າແມ່ນ 12.25 ແມັດ (ເຂດເຕືອນໄພ 12.00 ແມັດ; ເຂດອັນຕະລາຍ 18.00 ແມັດ).
ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນ ບັນດາເຜົ່າ, ອົງການປົກຄອງທ້ອງຖິ່ນ ແລະ ອົງການຈັດຕັ້ງທຸກພາກສ່ວນໃນບັນດາແຂວງ ພາກກາງ ໂດຍສະເພາະປະຊາຊົນທີ່ອາໄສຢູ່ລຽບຕາມນໍ້າເຊບັ້ງໄຟ, ຈົ່ງມີສະຕິລະມັດລະວັງ ແລະ ກຽມພ້ອມຮັບມື ຕໍ່ສະພາບນໍ້າຖ້ວມ ທີ່ອາດຈະເກີດຂຶ້ນ ພ້ອມທັງກະກຽມຍົກຍ້າຍວັດຖຸສິ່ງຂອງທີ່ມີຄ່າ ແລະ ສັດລ້ຽງໄປໄວ້ບ່ອນທີ່ປອດໄພ ໃນໄລຍະວັນທີ 01 ສິງຫາ ຫາ 02 ສິງຫາ 2024 ນີ້. ຂໍໃຫ້ຕິດຕາມຂ່າວພະຍາກອນອາກາດ ແລະ ລະດັບນໍ້າ ຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.
