ເນື່ອງຈາກ ຮ່ອງຄວາມດັນອາກາດຕໍ່າ ຫຼື ຮ່ອງຝົນໄດ້ພາດຜ່ານພາກເໜືອ ແລະ ພາກກາງ ຂອງປະເທດລາວ, ສົມທົບກັບກະແສລົມມໍລະສຸມຕາເວັນຕົກສ່ຽງໃຕ້ ພັດປົກຄຸມດ້ວຍກຳລັງປານກາງ, ຊຶ່ງໄດ້ເຮັດໃຫ້ມີຝົນຕົກເປັນບໍລິເວນກວ້າງຕິດຕໍ່ກັນຫຼາຍວັນ ໃນໄລຍະຜ່ານມາ ຢູ່ໃນເຂດພາກເໜືອ ແລະ ພາກກາງ ໄດ້ເຮັດໃຫ້ລະດັບນໍ້າຢູ່ຕາມແມ່ນໍ້າສາຂາຢູ່ ເຂດພາກກາງ ເພີ່ມຂຶ້ນສູງຢ່າງຕໍ່ເນື່ອງຮອດເຂດເຕືອນໄພ ໂດຍສະເພາະສະຖານີມະຫາໄຊ ເມືອງມະຫາໄຊ ແລະ ສະຖານີ ເຊບັ້ງໄຟ, ເມືອງ ເຊບັ້ງໄຟ, ແຂວງ ຄໍາມ່ວນ ເຊັ່ນ: ຈຸດສະຖານີ ມະຫາໄຊ ລະດັບນໍ້າ ເວລາ 07:00 ໂມງ ຂອງວັນທີ 31 ກໍລະກົດ 2024 ແທກໄດ້ 14.16 ແມັດ (ລະດັບນໍ້າເຂດເຕືອນໄພ 14.00 ແມັດ; ເຂດອັນຕະລາຍ 15.00 ແມັດ) ແລະ ສະຖານີ ເຊບັ້ງໄຟ ລະດັບນໍ້າແທກໄດ້ 17.96 ແມັດ ( ລະດັບນໍ້າເຂດເຕືອນໄພ 17.50 ແມັດ; ເຂດອັນຕະລາຍ 18:50 ແມັດ). ຄາດຄະເນວ່າ ສະພາບຝົນຍັງຈະສືບຕໍ່ຕົກໃນລະດັບປານກາງ ຫາ ໜັກຕື່ມອີກໃນໄລຍະ 1 ຫາ 3 ວັນຕໍ່ໜ້ານີ້ ຊຶ່ງ ຈະເຮັດໃຫ້ລະດັບນໍ້າສາຂາຈະສືບຕໍ່ເພີ່ມສູງຂຶ້ນ ອາດຮອດເຂດອັນຕະລາຍໃນໄລຍະວັນທີ 31 ກໍລະກົດ ຫາ 02 ສິງຫາ 2024 ນີ້.
ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນບັນດາເຜົ່າ, ອົງການປົກຄອງທ້ອງຖິ່ນ ແລະ ອົງການຈັດຕັ້ງທຸກພາກສ່ວນໃນ ບັນດາແຂວງ ພາກກາງ ໂດຍສະເພາະປະຊາຊົນທີ່ອາໄສຢູ່ລຽບຕາມນໍ້າເຊບັ້ງໄຟ ເມືອງ ເຊບັ້ງໄຟ ແຂວງ ເມືອງ ເຊບັ້ງໄຟ ແຂວງ ຄໍາມ່ວນ ຈົ່ງມີສະຕິ ລະມັດລະວັງ ແລະ ກຽມພ້ອມຮັບມື ຕໍ່ສະພາບນໍ້າຖ້ວມ ທີ່ອາດຈະເກີດຂຶ້ນ ພ້ອມທັງກະກຽມຍົກຍ້າຍວັນຖຸສິ່ງຂອງທີ່ມີຄ່າ ແລະ ສັດລ້ຽງໄປໄວ້ບ່ອນທີ່ປອດໄພ. ຂໍໃຫ້ຕິດຕາມຂ່າວພະຍາກອນອາກາດ ແລະ ລະດັບນໍ້າ ຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.
