ແຈ້ງເຕືອນ ເຝົ້າລະວັງລະດັບນໍ້າຂອງ ປະຈໍາວັນທີ 28 ສິງຫາ 2024, ເວລາ 12 ໂມງ 00

ຮ່ອງຄວາມກົດດັນອາກາດຕໍ່າໄດ້ພາດຜ່ານຢູ່ເຂດພາກເໜືອ ແລະ ພາກກາງຂອງປະເທດລາວ, ສົມທົບກັບລົມມລະສຸມຕາເວັນຕົກສ່ຽງໃຕ້ ພັດປົກຄຸມ. ເຊິ່ງຈະເຮັດໃຫ້ຈະມີຝົນຕົກ ຟ້າຮ້ອງ ຟ້າເຫລື້ອມ ໃນລະດັບຄ່ອຍ ຫາ ປານກາງຢູ່ໃນແຕ່ລະພາກ ແລະ ຈະຕົກໜັກ ຢູ່ບາງທ້ອງຖິ່ນ ພ້ອມມີລົມພັດແຮງເປັນບາງໂອກາດ.

ເນື່ອງຈາກໄດ້ມີຝົນຕົກໃນລະດັບປານກາງ ຫາ ໜັກຕິດຕໍ່ກັນຫລາຍມື້ ຜ່ານມາ ໄດ້ເຮັດໃຫ້ລະດັບນໍ້າຢູ່ບັນດາສະຖານີ ຕາມລໍານໍ້າຂອງ ໃນຂອບເຂດນະຄອນຫລວງວຽງຈັນ ເພີ່ມຂຶ້ນສງ, ໂດຍສະເພາະ ສະຖານີວຽງຈັນ ກິໂລແມັດ 4, ເມືອງສີສັດຕະນາກ, ແຂວງນະຄອນຫລວງ ວຽງຈັນ ໄດ້ຂຶ້ນຮອດລະດັບເຕືອນໄພ, ຊຶ່ງໃນ ເວລາ 07:00 ໂມງ ຂອງວັນທີ 28 ສິງຫາ 2024 ແທກໄດ້ 11.55 ແມັດ (ລະດັບນໍ້າເຂດເຕືອນໄພ 11.50 ແມັດ; ເຂດອັນຕະລາຍ 12.50 ແມັດ). ດັ່ງນັ້ນ ຈຶ່ງຂໍແຈ້ງເຕືອນເຖິງ ພໍ່ແມ່ປະຊົນ ແລະ ອໍານາດການປົກຄອງທຸກພາກສ່ວນທີ່ອາໄສຢູ່ໃກ້ ແມ່ນໍ້າຂອງ ຈຸດສະຖານີ ກິໂລແມັດ 4, ເມືອງສີສັດຕະນາກ, ນະຄອນຫລວງວຽງຈັນ ຈົ່ງມີສະຕິເຝົ້າລະວັງນໍ້າຖ້ວມ ແລະ ສະພາບຝົນຍັງຈະສືບຕໍ່ຕົກຕື່ມອີກ ທີ່ອາດຈະເຮັດໃຫ້ລະດັບນໍ້າຢູ່ສະຖານີ ດັ່ງກ່າວເພີ່ມຂື້ນ ໃນໄລຍະວັນທີ 28 – 30 ສິງຫາ 2024. ພ້ອມນີ້ໃຫ້ຂໍ ຕິດຕາມຂ່າວພະຍາກອນ ແລະ ແຈ້ງເຕືອນ ຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.