ພິທີປະກາດແຕ່ງຮອງເລຂາຄະນະບໍລິຫານງານພັກແຂວງ, ຮອງເຈົ້າແຂວງວຽງຈັນ ໄດ້ມີຂຶ້ນໃນວັນທີ 16 ກັນຍາ 2024 ຢູ່ທີ່ຫ້ອງວ່າການປົກແຂວງວຽງຈັນ ເຊິ່ງທ່ານທີ່ຖືກແຕ່ງຕັ້ງຄັ້ງນີ້ແມ່ນ ທ່ານ ພູທະນູເພັດ ໄຊສົມບັດ ໂດຍການເຂົ້າຮ່ວມຂອງ ທ່ານ ນ. ສີໃສ ລືເດດມູນສອນ ກຳມະການກົມການເມືອງສູນກາງພັກ ເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ, ມີ ສະຫາຍ ຄໍາພັນ ສິດທິດໍາພາກຳມະການສູນກາງພັກ ເລຂາຄະນະບໍລິຫານງານພັກແຂວງ, ເຈົ້າແຂວງວຽງຈັນ ພ້ອມດ້ວຍບັນດາທ່ານໃນຄະນະບໍລິຫານງານພັກແຂວງ, ບັນດາເຈົ້າເມືອງ, ຮອງເຈົ້າເມືອງ, ຫົວໜ້າພະແນກການຮອງພະແນກການກົມກອງ ແລະພະນັກງານຫຼັກແຫຼ່ງພາຍໃນແຂວງເຂົ້າຮ່ວມຢ່າງພ້ອມພຽງ.
ສະຫາຍ ຄຳພັນ ສິດທິດຳພາ ໄດ້ລາຍງານສະພາບການກະກຽມກອງປະຊຸມໃຫຍ່3ຂັ້ນວ່າ: ປັດຈຸບັນແຂວງວຽງຈັນ ມີຄະນະບໍລິຫານງານພັກແຂວງ 33 ສະຫາຍ, ຍິງ 4 ສະຫາຍ, ມີ 1.414 ການຈັດຕັ້ງຮາກຖານພັກ ໃນນັ້ນ, ມີ 106 ຄະນະພັກຮາກຖານ ແລະ 1.308 ໜ່ວຍພັກ,ໃນນີ້ເປັນໜ່ວຍພັກຮາກຖານ 598 ໜ່ວຍ. ທົ່ວແຂວງ ມີຈໍານວນສະມາຊິກພັກທັງໝົດ 22.260 ສະຫາຍ, ເປັນຍິງ 6.958 ສະຫາຍ ໃນນັ້ນ, ມີສະມາຊິກພັກສໍາຮອງ 921 ສະຫາຍ, ເປັນຍິງ 334 ສະຫາຍ.
ໃນ 11 ເມືອງທົ່ວແຂວງ ມີການຈັດຕັ້ງຮາກຖານພັກ 1.202 ຮາກຖານພັກ, ມີ 74 ຄະນະພັກຮາກຖານ, ມີ 1.128 ໜ່ວຍພັກ, ມີ 559 ໜ່ວຍພັກຂຶ້ນກັບ, ມີ 569 ໜ່ວຍພັກຮາກຖານ. ທົ່ວແຂວງມີຈໍານວນບ້ານທັງໝົດ 431 ບ້ານ ເຊິ່ງປະກອບດ້ວຍ 447 ໜ່ວຍພັກ.
ທ່ານ ສຸລິຍາ ພົມມີສິດ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຜ່ານຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 222/ຄລສພ, ລົງວັນທີ 29 ສິງຫາ 2022 ວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ຢູ່ແຂວງວຽງຈັນ, ຄຳສັ່ງຂອງນາຍົກລັດຖະມົນຕີ ສະບັບເລກທີ 15/ນຍ, ລົງວັນທີ 30 ສິງຫາ 2024 ວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ໂດຍໄດ້ຍົກຍ້າຍ ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນໄປຮັບໜ້າທີ່ໃໝ່ຢູ່ແຂວງວຽງຈັນ, ມະຕິຕົກລົງຂອງຄະນະເລຂາທິການສູນກາງພັກສູນກາງພັກ ສະບັບເລກທີ 223 /ຄລສພ, ລົົົົົົົົງວັນທີ 29 ສິງຫາ 2024 ວ່າດ້ວຍການແຕ່ງຕັ້ງ ພູທະນູເພັດ ໄຊສົມບັດ ເປັນກຳມະການບໍລິຫານງານພັກແຂວງ,ກຳມະການຄະນະປະຈຳພັກແຂວງ, ເປັນຮອງເລຂາຄະນະບໍລິຫານງານພັກແຂວງວຽງຈັນ, ,ຂໍ້ຕົກລົງຂອງທ່ານເຈົ້າແຂວງທ່ານເຈົ້າແຂວງ ສະບັບເລກທີ 2338/ຈຂ.ວຈ ວ່າດ້ວຍການແຕ່ງຕັ້ງຮອງເຈົ້າແຂວງ ໂດຍໄດ້ແຕ່ງຕັ້ງ ທ່ານ ພູທະນູເພັດ ໄຊສົມບັດ ເປັນຮອງເຈົ້າແຂວງວຽງຈັນ.
ໃນໂອກາດນີ້, ທ່ານ ນ. ສີໃສ ລືເດດມູນສອນ ໄດ້ໂອ້ລົມຕໍ່ພິທີປະກາດແຕ່ງຕັ້ງ ເຊິ່ງທ່ານໄດ້ກ່າວວ່າ: ການປະກາດການຈັດຕັ້ງໃນເທື່ອນີ້ເປັນບາດກ້າວອັນສຳຄັນໃນການແຕ່ງຕັ້ງພະນັກງານການນຳຍຸດທະສາດ ແນໃສ່ກະກຽມເຂົ້າສູ່ກອງປະຊຸມໃຫຍ່ຂອງແຂວງໃຫ້ມີຜົນສຳເລັດສູງ ເຊິ່ງ ສະຫາຍ ພູທະນູເພັດ ໄຊສົມບັດ ເປັນຜູ້ໜຶ່ງທີ່ມີຄວາມຮູ້ຄວາມສາມາດໃນການຊີ້ນຳ-ນຳພາ ແລະ ສະຫາຍດັ່ງກ່າວ ມີການເຕີບໃຫຍ່ແຕ່ຮາກຖານຂຶ້ນມາ ມີຄວາມສາມາດດ້ານການເສດຖະກິດ-ການເງິນ, ດ້ານການກໍ່ສ້າງພັກ-ພະນັກງານ, ເພື່ອມາຊ່ວຍແຂວງວຽງຈັນວາງແຜນພັດທະນາເສດຖະກິດ-ສັງ ຄົມຂອງແຂວງ, ໃນການຂຸດຄົ້ນແຫຼ່ງລາຍຮັບໃຫ້ໄດ້ເພີ່ມຂຶ້ນ ພັດທະນາເສດຖະກິດ-ສັງຄົມຂອງແຂວງໃຫ້ດີຂຶ້ນໃນຕໍ່ໜ້າ.
