ພິທີປະກາດແຕ່ງຕັ້ງ 9 ຄະນະກຳມະການຂອງຄະນະກຳມະການພາຣາແລມປິກແຫ່ງຊາດລາວ ຫຼື ຄພລ ໄດ້ຈັດຂຶ້ນໃນຕອນບ່າຍວັນທີ 13 ສິງຫາ 2024 ທີ່ຫ້ອງການປະສານງານຄະນະກຳມະການໂອແລມປິກແຫ່ງຊາດລາວ ໂດຍໃຫ້ກຽດເຂົ້າຮ່ວມໂດຍທ່ານ ນາງ ຂັນທະລີ ສີຣິພົງພັນ ປະທານຄະນະກຳມະການພາຣາແລມປິກ ແຫ່ງຊາດລາວ ແລະ ທ່ານ ວິລະວັນ ບຸນສຸກໄທ ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ທັງເປັນຮອງປະທານ-ເລຂາທິການຄະນະກຳມະການພາຣາແລມປິກ ແຫ່ງຊາດລາວ ພ້ອມດ້ວຍຄະນະບໍລິຫານງານ ຄພລ ຕະຫຼອດຮອດບັນດາຄະນະ 9 ກຳມະການທີ່ຖືກແຕ່ງຕັ້ງເຂົ້າຮ່ວມ.
ໂອກາດນີ້, ທ່ານ ນາງ ຂັນທະລີ ສີຣິພົງພັນ ກ່າວວ່າ: ພັກ ແລະ ລັດຖະບານລາວ ໃຫ້ຄວາມເອົາໃຈໃສ່ ຜັນຂະຫຍາຍ ກົດໝາຍ ວ່າດ້ວຍ ກິລາ-ກາຍະກໍາ ສະບັບປັບປຸງ ເລກທີ 74/ສພຊ, ລົງວັນທີ 25 ພະຈິກ 2019, ກົດໝາຍວ່າດ້ວຍຄົນພິການລາວ ເລກທີ 57/ສພຊ, ລົງວັນທີ 10 ທັນວາ 2018, ແລະ ຈັດຕັ້ງປະຕິບັດ ຕໍ່ທຳມະນູນ ຂອງ ຄພລ ສະບັບເລກທີ 09 ກຸມພາ 2018, ຕໍ່ຄະນະກໍາມະການພາຣາແລມປິກອາຊຽນ (APSF), ຕໍ່ຄະນະກໍາມະການພາຣາແລມປິກອາຊີ (APC) ແລະ ຕໍ່ຄະນະກໍາມະການພາຣາແລມປິກສາກົນ (IPC) ໃຫ້ປະກົດຜົນເປັນຈິງ.
ເພື່ອແນໃສ່ພັດທະນາກິລາ-ກາຍະກຳຄົນພິການ ຢູ່ພາຍໃນປະເທດ ໃຫ້ເປັນລະບົບຕໍ່ເນື່ອງ ເພື່ອໃຫ້ຄົນພິການໄດ້ເຂົ້າເຖິງການຫຼິ້ນກິລາ, ໃຫ້ມີການຝຶກແອບ-ຝຶກຊ້ອມ ຢ່າງເປັນປະຈໍາ ແລະ ໃຫ້ມີການເຂົ້າຮ່ວມງານແຂ່ງຂັນກິລາຄົນພິການ ຢ່າງເປັນປະຈໍາ ຢູ່ໃນລະດັບຕ່າງໆ ທັງພາຍໃນປະເທດ ແລະ ລະດັບອານຸພາກພື້ນ, ພາກພື້ນ, ສາກົນ. ໂດຍສະເພາະ ແມ່ນ ກະຊວງສຶກສາທິການ ແລະ ກິລາ, ຄພລ ແມ່ນເຫັນໄດ້ຄວາມໝາຍ-ຄວາມສໍາຄັນ ແລະ ໃຫ້ມີການຊຸກຍູ້ສົ່ງເສີມ ຕໍ່ວຽກງານກິລາ-ກາຍຍະກຳຄົນພິການໃນລາວ, ໄດ້ມີການກຳນົດນະໂຍບາຍ, ໄດ້ມີການກຳນົດແຜນພັດທະນາກິລາຄົນພິການ ເຂົ້າຢູ່ໃນແຜນລວມ ການພັດທະນາການສຶກສາ ແລະ ກິລາ ຂອງກະຊວງສຶກສາທິການ ແລະ ກິລາ, ສະໜອງງົບປະມານ, ອຸປະກອນຮັບໃຊ້ ເປັນສິ່ງເອື້ອອຳນວຍຄວາມສະດວກດ້ານຕ່າງໆ ໃຫ້ແກ່ນັກກິລາຄົນພິການ ໄດ້ເຂົ້າຮ່ວມງານແຂ່ງຂັນກິລາຄົນພິການ ຢູ່ພາຍໃນປະເທດ ແລະ ຕ່າງປະເທດ.
ທ່ານ ວິລະວັນ ບຸນສຸກໄທ ກໍໄດ້ຂຶ້ນອ່ານຂໍ້ຕົກລົງການແຕ່ງຕັ້ງ 9 ກຳມະການເປັນທາງການ ໂດຍ 9 ກຳມະການ ປະກອບມີອະນຸກຳມະການລະບຽບ ແລະ ກົດໝາຍ ໂດຍແມ່ນທ່ານ ປອ ນາງ ດາລາວອນ ກິດຕິພັນ ຫົວໜ້າຫ້ອງການ ກະຊວງ ສສກ, ຮອງປະທານ ຄພລ ເປັນຜູ້ຊີ້ນຳ, ທ່ານ ນາງ ຈັນທາ ຫຼວງອາໄພ ຮອງຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ເປັນຫົວໜ້າ ແລະ ທ່ານ ສຸລິວົງ ຫຼ້າໜໍ່ສະຫວັນ ຮອງຫົວໜ້າກົມນະໂຍບາຍຕໍ່ຜູ້ມີຜົນງານ, ພິການ ແລະ ຜູ້ອາຍຸສູງ ກະຊວງແຮງງານ ແລະ ສະຫວັດດີການສັງຄົມ ເປັນຮອງຫົວໜ້າ ນອກນັ້ນ ກໍຍັງມີຄະນະກຳມະການອີກ 4 ທ່ານ, ກຳມະການພົວພັນຕ່າງປະເທດ ທ່ານ ຮສ.ປອ ນາງ ສີລິນທອນ ສັກລໍຄຳ ກຳມະການ ຄພລ ເປັນຜູ້ຊີ້ນຳ, ທ່ານ ຄຳພັດ ເພັດລາສີ ຮອງເລຂາທິການ ຄພລ ເປັນຫົວໜ້າ ແລະ ທ່ານ ນາງ ຂັນທອງ ແສງສຸພາວັນ ວິຊາການພະແນກກິລາ-ກາຍະກຳຄົນພິການເປັນຮອງ ແລະ ມີ ຄະນະກຳມະການອີກ 2 ທ່ານ, ກຳມະການເຕັກນິກ ທ່ານ ວິລະວັນ ບຸນສຸກໄທ ຮອງປະທານ-ເລຂາທິການ ຄພລ ເປັນຜູ້ຊີ້ນຳ, ທ່ານ ສອນເພັດ ຈັນດານຸວົງ ຮອງຜູ້ອຳນວຍການສະຖາບັນກິລາ-ກາຍະກຳເປັນຫົວໜ້າ, ທ່ານ ບຸນມາ ທຳມະວົງ ຫົວໜ້າພະແນກພັດທະນາກິລາ ກົມກິລາລະດັບສູງ ເປັນຮອງ ແລະ ທ່ານ ສີວິໄຊ ແສງດາວົງ ກຳມະການ ຄພລ ເປັນຮອງ ແລະ ຄະນະອີກ 5 ທ່ານ.
ກຳມະການແພດ ແລະ ສຸຂະພາບ ທ່ານ ປອ.ດຣ ນາງ ຈັນທະໜອມ ມະນີທິບ ຮອງປະທານ ຄພລ ເປັນຜູ້ຊີ້ນຳ, ທ່ານ ດຣ ຄຳໃສ ເດດລືໄຊ ກຳມະການ ຄພລ ເປັນຫົວໜ້າ, ທ່ານ ດຣ ດາວດວງຈັນ ບູລົມມະວົງ ຮອງຫົວໜ້າຫ້ອງການກະຊວງສາທາລະນະສຸກ ເປັນຮອງ ແລະ ທ່ານ ດຣ ທອງເພັດ ສິດທິວັນ ກຳມະການ ຄພລ ເປັນຮອງ ແລະ ກຳມະການອີກ 8 ທ່ານ; ກຳມະການການຕະຫຼາດ ແລະ ສິດທິປະໂຫຍດ ທ່ານ ນາງ ດາລາ ພະກອນຄຳ ກຳມະການ ຄພລ ເປັນຜູ້ຊີ້ນຳ, ທ່ານ ນາງ ກອງມະນີ ວາດຕະນາ ກຳມະການ, ນາຍຄັງ ເປັນຫົວໜ້າ, ທ່ານ ລັດຖະໄຊ ອິນທະວົງ ຮອງຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ, ກຳມະການ ຄພລ ເປັນຮອງ ແລະ ອີກກຳມະການ 7 ທ່ານ; ກຳມະການສຶກສາຮຽນຮ່ວມ ແລະ ວັດທະນະທຳ ທ່ານ ນາງ ວິໄລທອງ ສູນທອນໄຊມົງຄົນ ຮອງປະທານ ຄພລ ເປັນຜູ້ຊີ້ນຳ, ທ່ານ ເພັດສົມພອນ ສຸວັນວິໄຊ ຮອງຫົວໜ້າຫ້ອງການກະຊວງພາຍໃນ ເປັນຫົວໜ້າ, ທ່ານ ຫຼອດສາທິດ ສຸຂະຜົນ ຮອງຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ເປັນຮອງ ແລະ ກຳມະການ 5 ທ່ານ.
ກຳມະການຂໍ້ມູນຂ່າວສານ ແລະ ສື່ມວນຊົນ ທ່ານ ບຸນຍອດ ຈັນທະວອນ ຮອງປະທານ ຄພລ ເປັນຜູ້ຊີ້ນຳ, ທ່ານ ສຸກສາຄອນ ສີປະເສີດ ຜູ້ອຳນວຍການສູນໂຄສະນາຂ່າວສານ ການສຶກສາ ແລະ ກິລາ ເປັນຫົວໜ້າ ແລະ ທ່ານ ສົງການ ພັນແພງດີ ວິຊາການສະຖາບັນຄົ້ນຄວ້າວິທະຍາສາດການສຶກສາ ເປັນຮອງ ແລະ ກຳມະການອີກ 2 ທ່ານ; ກຳມະການຄົນພິການ ແລະ ພັດທະນາສັງຄົມ ທ່ານ ທອງຈັນ ດວງມາລາໄລ ກຳມະການ ຄພລ ເປັນຜູ້ຊີ້ນຳ, ທ່ານ ນາງ ກອງແກ້ວ ຕຸນາລົມ ປະທານສະມາຄົມຄົນພິການຕາລາວ ເປັນຫົວໜ້າ, ທ່ານ ນາງ ນົງລັກ ທຳມະວົງສາ ຫົວໜ້າພະແນກກິລາ-ກາຍະກຳມວນຊົນ ເປັນຮອງ ແລະ ກຳມະການອີກ 4 ທ່ານ; ກຳມະການນັກກິລາຄົນພິການ ທ່ານ ອຳພາວັນ ກວ້າງມະນີວັນ ຮອງຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ເປັນຜູ້ຊີ້ນຳ, ທ່ານ ວຽງໄຊ ເຖິງບັນດິດ ຮອງຫົວໜ້າພະແນກກິລາ-ກາຍະກຳ ມວນຊົນ ເປັນຫົວໜ້າ ແລະ ທ່ານ ວິສິດ ແສງອຳພັນ ຫົວໜ້າພະແນກ, ວິທະຍາໄລພະລະສຶກສາ ເປັນຮອງ.
ຂ່າວ : ສົງການ ພັນແພງດີ
ພາບ : ວສລ
