ແນວທາງການຕ່າງປະເທດຂອງ ສປ ຈີນ ປະກອບສ່ວນສຳຄັນໃນການປົກປັກຮັກສາສັນຕິພາບໂລກ

ຄົ້ນຄວ້າ ແລະ ຂຽນໂດຍ: ໂຄງການຄົ້ນຄວ້າຮ່ວມລາວ-ຈີນ,ສະຖາບັນການຕ່າງປະເທດ

ນັບແຕ່ພັກຄອມມຸຍນິດຈີນສ້າງຕັ້ງຂຶ້ນ ແມ່ນໄດ້ຢຶດໝັ້ນແນວທາງການຕ່າງປະເທດ ສັນຕິພາບ ອັນສະເໜີຕົ້ນສະເໜີປາຍ ເພາະເຂົ້າໃຈວ່າ ສັງຄົມມະນຸດບໍ່ວ່າລະບອບສັງຄົມໃດ, ສັນຕິພາບແມ່ນສິ່ງທີ່ທຸກຄົນ, ທຸກລະບອບ ແລະ ທຸກປະເທດມຸ້ງມາດປາຖະໜາທີ່ຢາກຈະມີ ແລະ ເກີດຂຶ້ນກັບປະເທດຕົນ ທັງນີ້ເພື່ອເຮັດໃຫ້ປະຊາຊົນ, ພົນລະເມືອງຕົນມີຄວາມຜາສຸກ, ມີເວລາໃນການທຳມາຫາກິນຕາມແນວທາງນະໂຍບາຍຂອງຕົນທີ່ເລືອກໄວ້, ມີຄວາມເບີກບານໃຈໃນການສ້າງສາພັດທະນາບ້ານເມືອງອັນເປັນທີ່ຮັກຂອງຕົນ. ສະນັ້ນ, ສັນຕິພາບຈຶ່ງແມ່ນສິ່ງສໍາຄັນອັນຍອດຍິ່ງສຸງສົ່ງຂອງມວນມະນຸດເຮົາ ທີ່ໃຜໆກໍບໍ່ສາມາດປະຕິເສດໄດ້ ຖ້າທຽບໃສ່ສິ່ງຈຳເປັນໃນສະພາບແວດລ້ອມເຮົາແລ້ວ, ສັນຕິພາບແມ່ນສິ່ງທີ່ຂາດບໍ່ໄດ້ຄືກັບອາກາດ ເພາະມັນພົວພັນໂດຍກົງກັບການຄົງຕົວຂອງສັງຄົມມະນຸດ. ສັນຕິພາບແມ່ນມີຄວາມສຳຄັນ ແລະ ຈຳເປັນຂອງພວກເຮົາທຸກຄົນ ທີ່ຄວນຈະພ້ອມກັນປົກປັກສາ ແລະ ທະນຸທະໜອມໃຫ້ມັນຄົງຢູ່ຮ່ວມກັບໂລກເຮົາເພື່ອຄວາມສົມບູນພູມສຸກຂອງປະຊາຄົມໂລກ. ດ້ວຍເຫດນັ້ນ, ແນວທາງການຕ່າງປະເທດຂອງພັກຄອມມຸຍນິດຈີນ ບໍ່ວ່າຍຸກສະໄໝໃດ ກໍຖືສຳຄັນກັບສັນຕິພາບມາກ່ອນອື່ນໝົດ.

ຍ້ອນເຫັນໄດ້ຄວາມສຳຄັນດັ່ງກ່າວ, ທຸກປະເທດກໍລ້ວນແຕ່ຊອກສະແຫວງຫາ ແລະ ຍອມທີ່ຈະເສຍສະຫຼະເລືອດເນື້ອຂອງຕົນຕໍ່ສູ້ເພື່ອແລກກັບວ່າຄໍາ ສັນ ຕິພາບ ເພາະທຸກຄົນເຂົ້າໃຈດີວ່າການບໍ່ມີສັນຕິພາບຈະເຮັດໃຫ້ສັງຄົມວຸ້ນວາຍ, ບໍ່ມີເວລາທຳມາຫາກິນ ແລະ ບໍ່ມີຄວາມສະຫງົບສຸກດັ່ງປະຫວັດສາດໄດ້ຊີ້ໃຫ້ເຫັນແຈ້ງ ສົງຄາມແມ່ນຄວາມຫາຍານະ ແລະ ເປັນສັດຕູທີ່ຮ້າຍກາດຂອງສັນ ຕິພາບ, ຖ້າເກີດສົງຄາມບໍ່ວ່າຈະຮູບແບບໃດຢູ່ປະເທດໃດໃນໂລກກໍຈະນໍາມາແຫ່ງຄວາມສູນເສຍທັງຊິວີດ ແລະ ຊັບສິນ, ສັນຕິພາບທີ່ທຸກຄົນຮັກຫອມກໍຄ່ອຍໆຫາຍໄປຈາກສັງຄົມນັ້ນ. ສະນັ້ນ, ຈຶ່ງສາມາດເວົ້າໄດ້ຢ່າງເດັດຖານວ່າ ສັດຕູທີ່ແທ້ຈິງຂອງສັນຕິພາບແມ່ນສົງຄາມ.

ການເກີດສົງຄາມໂລກທັງສອງຄັ້ງຜ່ານມາ ໄດ້ສ້າງຄວາມສູນເສຍອັນມະຫາສານໃຫ້ສັງຄົມມະນຸດເຮົາ, ມີຄົນເສຍຊີວິດຫຼາຍກວ່າ 90 ລ້ານຄົນ, ເຮັດໃຫ້ເດັກນ້ອຍຫຼາຍລ້ານຄົນກາຍເປັນກຳພ້າ, ກໍາພອຍ, ແລະ ຜູ້ຄົນຕ້ອງໄດ້ພັດພາກຈາກກັນເປັນຈໍານວນຫລວງຫຼາຍ. ນອກນັ້ນ, ຍັງສ້າງຜົນສະທ້ອນແຜ່ລາມໄປເປັນວົງກວ້າງ ບໍ່ວ່າທາງດ້ານການເມືອງ, ການທະຫານ ກໍຄືຄວາມເສຍຫາຍຕໍ່ເສດ ຖະກິດຂອງໂລກຢ່າງບໍ່ສາມາດຫຼີກລຽງໄດ້ ອັນເປັນສາເຫດທີ່ກໍ່ໃຫ້ເກີດບັນຫາຕ່າງໆຕາມມາ ເປັນຕົ້ນ ໄພອິດຫິວ ແລະ ການ ຂາດທີ່ພັກພາອາໄສ. ຍ້ອນເຫັນໄດ້ໄພອັນຕະລາຍນີ້, ບັນດາປະຊາຊາດທີ່ຮັກຫອມສັນຕິພາບ ຈຶ່ງໄດ້ພ້ອມພາກັນສ້າງຕັ້ງອົງການສະຫະປະຊາຊາດຂຶ້ນມາ ໃນປີ 1945 ໂດຍແນໃສ່ເພື່ອປົກປັກຮັກສາສັນຕິພາບ ແລະ ຄວາມໝັ້ນຄົງຂອງບັນດາປະເທດ, ການສົ່ງເສີມຄວາມເປັນຢູ່ທີ່ດີ, ບັນຫາສິດທິມະນຸດຂອງປະຊາຄົມໃນໂລກ ແລະ ການຮ່ວມມືເພື່ອການພັດທະນາລະຫວ່າງບັນດາປະເທດ. ການສ້າງຕັ້ງອົງການສະຫະປະຊາຊາດ ໄດ້ເປີດໂອກາດໃຫ້ທຸກປະເທດເຂົ້າເປັນສະມາ ຊິກບໍ່ວ່າ ຈະນ້ອຍ ຫຼື ໃຫ່ຍ, ຈະທຸກຍາກ ຫລື ຮັ່ງມີ ກໍລ້ວນແຕ່ມີສິດເທົ່າທຽບກັນ, ມີສິດໃນການປົກຄອງ ແລະ ພັດທະນາຕົນເອງ. ຕະຫຼອດ 7 ທົດສະວັດຜ່ານມາ, ທຸກປະເທດໄດ້ມີການເຄົາລົບ ແລະ ປະຕິບັດຕາມກົດບັດ ຂອງອົງການ ສປຊ ໂດຍຢູ່ຮ່ວມກັນໂດຍສັນຕິ ແລະ ຮ່ວມມືກັນເພື່ອການພັດທະນາ ເຊິ່ງກາຍເປັນທິດທາງລວມ ແລະ ຄວາມມຸ້ງມາດປາຖະໜາຂອງປະຊາຊາດທີ່ອາໄສຢູ່ໂລກໜ່ວຍນີ້.

ໃນທ່າມກາງສະພາບການຂອງໂລກທີ່ຜັນແປໄປຢ່າງສັນສົນ ແລະ ຂ້ຽວຂາດ, ທ່ານ ສີ ຈີ້ນຜິງ, ປະທານປະເທດແຫ່ງ ສປ ຈີນ ໄດ້ສະເໜີແນວຄິດລິເລີ່ມໃນການປົກປັກຮັກສາສັນຕິພາບ ແລະ ຄວາມສະຫງົບສຸກຂອງໂລກ ໃນໂອກາດທ່ານມີຄໍາເຫັນຕໍ່ກອງປະຊຸມໂບອາວ (BOAO) ສໍາລັບ ອາຊີ ປະຈຳປີ 2022 ພາຍໃຕ້ຄໍາຂວັນ “ ການປະກົດຕົວຂື້ນຂອງສິ່ງທ້າທາຍ ແລະ ການສ້າງອານາຄົດທີ່ສົດໃສໄດ້ດ້ວຍຜ່ານການຮ່ວມມືຂອງທຸກຝ່າຍ ” ວ່າໂລກປັດຈຸບັນໄດ້ມີການຜັນແປທີ່ສັບສົນທີ່ສຸດ ເຊິ່ງບໍ່ເຄີຍເກີດໃນປະຫວັດສາດມາກ່ອນ. ການຜັນແປລັກສະນະນີ້ໄດ້ກາຍ ເປັນອຸປະສັກ ແລະ ສິ່ງທ້າທາຍຕໍ່ມວນມະນຸດ. ສະນັ້ນ, ເພື່ອຂ້າມຜ່ານ ແລະ ເອົາຊະນະຕໍ່ສິ່ງທ້າທາຍທັງໝົດນີ້ ທຸກຄົນຕ້ອງມີຄວາມເຊື່ອໝັ້ນເຊິ່ງກັນ ແລະ ກັນ ແລະ ຄວາມເຊື່ອໝັ້ນນີ້ຈະເປັນມະຫາສາມັກຄີທີ່ຈະຢຸດຢັ້ງ ແລະ ເອົາຊະນະຕໍ່ອຸປະສັກ ແລະ ສິ່ງທ້າທາຍທີ່ເກີດຂື້ນ.

ເພື່ອປົກປັກຮັກສາສັນຕິພາບ ແລະ ຄວາມສະຫງົບສຸກຂອງປະຊາຄົມໂລກໃຫ້ຫລຸດພົ້ນອອກຈາກສິ່ງທ້າທາຍ ແລະ ໄພອັນຕະລາຍຂ້າງເທິງນີ້, ມັນມີຄວາມຈຳເປັນຮຽກຮ້ອງໃຫ້ບັນດາປະຊາຊາດທີ່ຮັກຫອມສັນຕິພາບ ພ້ອມກັນລຸກຂຶ້ນປົກປັກຮັກສາໂລກຂອງພວກເຮົາ ບໍ່ໃຫ້ຕົກໃນຄວາມສ່ຽງຂອງການກໍ່ສົງຄາມຂຶ້ນເໝືອນດັ່ງອາດີດຜ່ານມາ ທີ່ນໍາເອົາຄວາມເສຍຫາຍມະຫາສານມາສູ່ມວນມະນຸດທັງທົ່ວໂລກ. ສປ ຈີນ ແມ່ນໜຶ່ງໃນບັນດາປະເທດມີຄວາມພະຍາ ຍາມຢັບຢັ້ງ ແລະ ສະກັດກັ້ນໄພພິບັດຂອງສົງຄາມ, ເຊິ່ງປະຊາຊົນຜູ້ຮັກຫອມສັນຕິພາບມີຄວາມຫວັງ ແລະ ເຊື່ອໝັ້ນຕໍ່ບົດບາດການນຳພາຜ່ານຜ່າວິກິດການ ທີ່ກຳລັງຈະເກີດຂຶ້ນໃຫ້ຫລຸດພົ້ນໄປໄດ້ ທັງນີ້ກໍ່ເນື່ອງຈາກວ່າ ນະໂຍບາຍ ແລະ ແນວທາງການຕ່າງປະເທດຂອງ ສປ ຈີນ ເປັນກາງ, ທ່ຽງຕົງ ແລະ ຢຶດຖືການແກ້ໄຂບັນຫາໃນທາງສັນຕິຜ່ານການທູດ, ຜ່ານການປຶກສາຫາລື ແລະ ເຈລະຈາເປັນຫຼັກ ເຊິ່ງສາມາດເປັນຄົນກາງທີ່ຈະສົນທະນາໄດ້ກັບທຸກຝ່າຍຂອງຄູ່ຂັດແຍ່ງ. ນອກນັ້ນ, ສປ ຈີນ ຍັງມີບົດບາດສຳຄັນໃນເວທີການເມືອງສາກົນ ແລະ ມີຄວາມເຂັ້ມແຂງທາງດ້ານເສດຖະກິດທີ່ເປັນຜູ້ສ້າງ ແລະ ໃຫ້ຄວາມຫວັງໃນການພັດທະນາແກ່ທຸກປະເທດດ້ວຍມີຂໍ້ລິເລີ່ມໃໝ່ໆ ເປັນຕົ້ນ ຂໍ້ລິເລີ່ມໜຶ່ງແລວ, ໜຶ່ງເສັ້ນທາງ ( One Belt, One Road) ເຊິ່ງໄດ້ຮັບການຍ້ອງຍໍສັນລະເສີນຈາກປະຊາຄົມໂລກວ່າເປັນໂຄງການທີ່ເຊື່ອມໂຍງ, ເຊື່ອມຈອດຂອງໂລກເຂົ້າຫາກັນ ອັນໄດ້ສ້າງຜົນປະໂຫຍດມະຫາສານທາງດ້ານການຄ້າ, ການລົງທຶນ ແລະ ການພັດທະນາເສດຖະກິດ-ສັງຄົມຂອງບັນດາປະເທດທີ່ຮ່ວມຈັດຕັ້ງປະຕິບັດຂໍ້ລິເລີ່ມນີ້. ແນວທາງນະໂຍບາຍຂອງພັກ-ລັດ ຖະບານຂອງ ສປ ຈີນ ຍາມໃດກໍຖືການສ້າງສາພັດທະນາເປັນປັດໃຈອັນດັບໜຶ່ງ ແນໃສ່ເພື່ອຄວາມຮັ່ງມີຜາສຸກໃຫ້ປະຊາ ຊົນຕົນເອງ ກໍຄືປະຊາຊາດທົ່ວທັງໂລກ. ສປ ຈີນ ກໍຄື ສປປ ລາວ ແລະ ປະເທດທີ່ຮັກຫອມສັນຕິພາບ ຍາມໃດກໍມີຄວາມເປັນຫວ່ງຕໍ່ສະພາບການ ແລະ ທ່າອ່ຽງຂອງໂລກປັດຈຸບັນ. ສອງຊາດລາວ-ຈີນໄດ້ມີທັດສະນະຄືກັນໃນການແກ້ໄຂບັນຫາຕ່າງໆທີ່ເກີດຂື້ນ ໂດຍຮຽກຮ້ອງໃຫ້ທຸກຝ່າຍອົດທົນອົດກັ້ນ, ແກ້ໄຂຂໍ້ຜິດພາດໃນທາງສັນຕິຜ່ານການເຈລະຈາ ແລະ ກົນໄກຂອບຮ່ວມມືຫລາຍຝ່າຍບົນພື້ນຖານຂອງກົດບັດ ສປຊ ແລະ ກົດໝາຍສາກົນ.

ໃນສອງສາມປີຜ່ານມາ, ໂລກຂອງພວກເຮົາໄດ້ປະເຊີນກັບການແຜ່ລະບາດຂອງພະຍາດໂຄວິດ-19, ແຕ່ຜ່ານການຮ່ວມມືກັນຢ່າງແໜ້ນແຟ້ນຂອງປະຊາຄົມໂລກ ກໍສາມາດຮັບມືກັບການແຜ່ລະບາດຂອງພະຍາດດັ່ງກ່າວໃຫ້ຢູ່ໃນລະດັບຄວບຄຸມໄດ້ ແລະ ຊ່ວຍເຫຼືອເຊິ່ງກັນແລະ ກັນ ໃນການຟື້ນຟູເສດຖະກິດໂລກ. ຈາກການຮ່ວມມືກັນຂອງປະຊາຄົມໂລກນັ້ນ ໄດ້ພິສູດໃຫ້ເຫັນວ່າບໍ່ມີອຸປະ ສັກໃດທີ່ພວກເຮົາຈະເອົາຊະນະບໍ່ໄດ້. ຕະຫຼອດໄລຍະຊ່ວງເວລາຂອງໂລກລະບາດນັ້ນ, ລັດຖະບານຈີນ ໄດ້ເປັນເຈົ້າການໃຫ້ການຊ່ວຍເຫຼືອດ້ານອຸປະກອນການເເພດ ແລະ ຢາວັກແຊັງ ຫລາຍກວ່າ 2.1 ຕື້ຫລອດ ແກ່ 120 ປະເທດ ຜ່ານໂຄງການໂຄແວັກ (COVAX). ນອກນັ້ນ, ຍັງໄດ້ມອບຜ່ານການຮ່ວມມືສອງຝ່າຍໃຫ້ແກ່ບັນດາປະເທດອາຝຣິກກາ ແລະ ປະເທດອາຊຽນຕື່ມອີກ 750 ລ້ານຫລອດ ເພື່ອຊ່ວຍບັນດາປະເທດເຫຼົ່ານັ້ນໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19. ແນວຄວາມຄິດລິເລີ່ມຂອງປະທານ ສີ ຈີ້ນຜິງ ໃນການປົກປັກຮັກສາຮັກສາສັນຕິພາບ ແລະ ຄວາມສະຫງົບຂອງໂລກ ໄດ້ເປັນການຕອກຢໍ້າເຖິງຄວາມຮຽກຮ້ອງຕ້ອງການຂອງຍຸກສະໄໝ ທີ່ທຸກຊາດມີຄວາມໄຝ່ຝັນ ແລະ ມີຄວາມມຸ້ງມາດປາຖະໜາທີ່ຢາກເຫັນໂລກຂອງພວກເຮົາມີສັນຕິພາບ ແລະ ຄວາມສະຫງົບສຸກ ໂດຍທ່ານໄດ້ເນັ້ນ 4 ເນື້ອໃນສຳຄັນຂອງແນວຄິດນີ້ຄື: 1). ຄວາມສຳຄັນຂອງສັນຕິພາບ ເຊິ່ງທ່ານໄດ້ໃຫ້ທັດສະນະວ່າ ສັນຕິພາບແມ່ນຄວາມຫວັງອັນແຮງກ້າຂອງປະຊາຊາດ, ປະຫວັດສາດຂອງມວນມະນຸດໄດ້ພິສູດໃຫ້ເຫັນແຈ້ງວ່າສັນຕິພາບແມ່ນຄຸນຄ່າທີ່ສູງສົ່ງ ແລະ ໂລກຈະວຸ້ນວາຍຖ້າຫາກບໍ່ມີສັນຕິພາບ. ນອກນັ້ນ, ທ່ານໄດ້ປຽບທຽບຕື່ມວ່າ ການພັດທະນາກໍຄືນໍ້າທີ່ມີບໍ່ແຫຼ່ງກໍາເນີດ, ການຂາດສັນຕິພາບກໍບໍ່ແຕກຕາ່ງຫຍັງກັນກັບຕົ້ນໄມ້ທີ່ບໍ່ມີຮາກ. 2). ເນັ້ນໃສ່ການເຄົາລົບ ແລະ ປະຕິບັດຕາມກົດບັດສະຫະປະຊາຊາດ ແລະ ກົດໝາຍສາກົນ, ຢຶດໝັ້ນ 5 ຫຼັກການຢູ່ຮ່ວມກັນໂດຍສັນຕິ ແລະ ການແກ້ໄຂບັນຫາຕ່າງໆ ຜ່ານການຈາລະຈາ, ຫຼີກລຽ່ງການໃຊ້ກຳລັງອາວຸດໃນການແກ້ໄຂບັນດາຂໍ້ຂັດແຍ່ງທີ່ເກີດຂຶ້ນ. 3). ໄດ້ເນັ້ນໃຫ້ເຫັນແນວທາງນະໂຍບາຍການຕ່າງປະເທດຂອງ ສປ ຈີນ ໃນການສົ່ງເສີມສັນຕິພາບ ແລະ ການແກ້ໄຂບັນຫາຕ່າງໆຜ່ານຊ່ອງທາງການທູດ ແລະ ເຄົາລົບຕໍ່ຫຼັກການຂອງກົດບັດ ສປຊ ແລະ ອະທິປະໄຕຂອງທຸກປະເທດ. 4). ເພື່ອຈັດຕັ້ງປະຕິບັດຂໍ້ລິເລີ່ມນີ້ໃຫ້ປະກົດຜົນເປັນຈິງໃນຖານະເປັນຜູ້ນຳພາ ແລະ ຜູ້ສະເໜີແນວຄວາມຄິດ, ລັດຖະບານຈີນ ມີຄວາມຍິນດີທີ່ເຮັດວຽກຮ່ວມກັບປະຊາຄົມໂລກໃນການຜັນຂະຫຍາຍແນວຄວາມຄິດຂໍ້ລິເລີ່ມຂອງປະທານ ສີ ຈິ້ນຜິງ ນີ້ໃຫ້ປາກົດຜົນເປັນຈິງ ເພື່ອຄວາມຜາສຸກຂອງມວນມະນຸດທັງໂລກ. ການສະເໜີແນວຄວາມຄິດລິເລີ່ມທີ່ປາກົດຂຶ້ນຂອງປະທານ ສີ ຈິ້ນຜິງ ໃນຄັ້ງນີ້ ບໍ່ພຽງແຕ່ໄດ້ກາຍເປັນກະແສທີ່ທົ່ວໂລກກຳລັງຈັບຕາເບິ່ງ, ແຕ່ຍັງເປັນຄວາມຫວັງຂອງບັນດາປະຊາຊາດຜູ້ທີ່ຮັກຫອມສັນຕິພາບ ລວມທັງ ສປປ ລາວ ທີ່ຍາມໃດກໍຢຶດໝັ້ນແນວທາງການຕ່າງປະເທດ “ ສັນຕິພາບ, ເອກະລາດ, ມິດຕະພາບ ແລະ ການຮ່ວມມືເພື່ອການພັດທະນາ” ແລະ ຮັກຫອມສັນຕິພາບ ທີ່ຢາກເຫັນໂລກມະນຸດ ມີສັນຕິພາບທີ່ຍືນຍົງ, ມີຄວາມຜາສຸກ ແລະ ວັດທະນາຖາວອນ.