ສູນກາງແນວລາວສ້າງຊາດຈັດກອງປະຊຸມສະຫລຸບທົບທວນຂໍ້ແຂ່ງຂະບວນການແຂ່ງຂັນຮັກຊາດ ແລະພັດທະນາຂອງອົງການແນວລາວສ້າງຊາດໄລຍະ 1 ປີຜ່ານມາ ແລະແຜນວຽກຈຸດສຸມໃນຕໍ່ຫນ້າ ຈັດຂຶ້ນໃນຕອນເຊົ້າວັນທີ 13 ສິງຫາ 2024 ທີ່ຫ້ອງປະຊຸມໃຫຍ່ສູນກາງແນວລາວສ້າງຊາດ ນະຄອນຫລວງວຽງຈັນ ໂດຍການເປັນປະທານຂອງທ່ານ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ,ມີຮອງປະທານສູນກາງແນວລາວສ້າງຊາດ,ຄະນະສູນກາງແນວລາວສ້າງຊາດ, ພະນັກງານບຳນານອາວຸໂສແນວລາວສ້າງຊາດ, ພຣະເຖລະນຸເຖລະຈາກອົງການພຸດທະສາສະຫນາສຳພັນລາວພ້ອມດ້ວຍປະທານແນວລາວສ້າງຊາດແຕ່ລະແຂວງເຂົ້າຮ່ວມດ້ວຍຮູບແບບເຊິ່ງຫນ້າແລະທາງໄກ.
ທ່ານ ຄຳໄຫລ ສີປະເສີດ ຮອງປະທານສູນກາງແນວລາວສ້າງຊາດໄດ້ຂຶ້ນລາຍງານບົດສະຫລຸບທົບທວນແຜນການຂະບວນແຂ່ງຂັນຮັກຊາດ ແລະພັດທະນາຂອງອົງການແນວລາວສ້າງຊາດໄລຍະ 1 ປີຜ່ານມາ ແລະແຜນວຽກໃນຕໍ່ຫນ້າ,ຕີລາຄາການຈັດຕັ້ງວຽກງານ 9 ເນື້ອໃນຂໍ້ແຂ່ງຂັນຮັກຊາດແລະພັດທະນາໃນ 6 ເດືອນທ້າຍປີ 2023 ແລະ 6 ເດືອນຕົ້ນປີ 2024 ໃນນີ້ໄດ້ເອົາໃຈໃສ່ຈັດຕັ້ງປະຕິບັດຕາມມະຕິກອງປະຊຸມໃຫຍ່ຄັ້ງທີ 11 ຂອງພັກ ແລະມະຕິກອງປະຊຸມໃຫຍ່ສະມາຊິກພັກ ຄັ້ງທີ 5 ຂອງອົງຄະນະພັກສູນກາງແນວລາວສ້າງຊາດ,ການແຂ່ງຂັນປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະແຜນງົບປະມານແຫ່ງລັດ 5 ປີຄັ້ງທີ 9 ແລະ 2 ວາລະແຫ່ງຊາດຂອງລັດຖະບານ, ການແຂ່ງຂັນປະຕິບັດ 6 ແຜນວຽກຈຸດສຸມຂອງແນວລາວສ້າງຊາດທີ່ກຳນົດໄວ້ໃນກອງປະຊຸມຄັ້ງທີ 11 ,ການແຂ່ງຂັນປະຕິບັດແຜນພັດທະນາອົງການແນວລາວສ້າງຊາດແລະອື່ນໆ,ເຊິ່ງການຈັດຕັ້ງປະຕິບັດໄລຍະຜ່ານມາເຫັນວ່າພົບຈຸດດີ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ເພື່ອສຸມໃສ່ຈັດຕັ້ງປະຕິບັດໃນຕໍ່ຫນ້າ ຂອງອົງການແນວລາວສ້າງຊາດ.
ໂອກາດນີ້ທ່ານ ສິນລະວົງ ຄຸດໄພທູນ ປະທານສູນກາງແນວລາວໄດ້ມີຄຳເຫັນໂດຍທ່ານເນັ້ນຫນັກໃຫ້ທຸກພາກສ່ວນສືບຕໍ່ເອົາໃຈໃສ່ຈັດຕັ້ງປະຕິບັດບັນດາຂໍ້ແຂ່ງຂັນຮັກຊາດແລະພັດທະນາໃຫ້ໄດ້ຮັບຜົນສຳເລັດໃນຕໍ່ຫນ້າເຊິ່ງຜ່ານມາເຫັນວ່າໄດ້ຮັບຜົນສຳເລັດລື່ນຄາດຫມາຍທີ່ວາງໄວ້ ເປັນຕົ້ນ: ຂະບວນການສ້າງບ້ານສາມັກຄີແລະພັດທະນາ, ຂະບວນການປຸກລະດົມຂົນຂວາຍໃນການປະກອບສ່ວນເພື່ອພັດທະນາຂອງປະທານແນວລາວສ້າງຊາດແຕ່ລະຂັ້ນ,ຂະບວນການຮັກບ້ານເກີດແລະຂະບວນການອື່ນໆ.
ທ່ານ ສິນລະວົງ ຄຸດໄພທູນ ມີຄຳເຫັນຕື່ມວ່າ:ໃນຕໍ່ຫນ້າທຸກພາກສ່ວນໂດຍສະເພາະຄະນະພັກ-ຄະນະນຳແຕ່ລະຂັ້ນຂອງສູນກາງແນວລາວສ້າງຊາດໃຫ້ພ້ອມກັນສືບຕໍ່ສຸມໃສ່ຈັດຕັ້ງປະຕິບັດແຜນວຽກເນື້ອໃນຂໍ້ແຂ່ງຂັນຮັກຊາດແລະພັດທະນາຂອງອົງການແນວລາວສ້າງຊາດປີ 2024-2025 ໃຫ້ປະສົບຜົນສຳເລັດ ແລະບັນລຸຕາມລະດັບຄາດຫມາຍ ໂດຍສະເພາະການແຂ່ງຂັນປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງພັກແລະມະຕິກອງປະຊຸມໃຫຍ່ຄັ້ງທີ 5 ຂອງອົງຄະນະພັກສູນກາງແນວລາວສ້າງຊາດວາງອອກ, ແຂ່ງຂັນປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະແຜນງົບປະມານແຫ່ງລັດ 5 ປີຄັ້ງທີ 9 ແລະ 2 ວາລະແຫ່ງຊາດຂອງລັດຖະບານ ແລະຂໍ້ແຂ່ງຂັນອື່ນໆໂດຍມອບໃຫ້ຄະນະປະຈຳ,ກຳມະການ, ທີ່ປຶກສາ, ຄູ່ຮ່ວມງານ ແລະພະນັກງານ ພ້ອມດ້ວຍພາກສ່ວນກ່ຽວຂ້ອງຕ້ອງເປັນເຈົ້າການໃນການຈັດຕັ້ງຜັນຂະຫຍາຍບັນດາເນື້ອໃນຂອງຂໍ້ແຂ່ງຂັນຮັກຊາດແລະພັດທະນາຂອງແນວລາວສ້າງຊາດ ໃຫ້ເປັນອັນລະອຽດ,ຈະແຈ້ງຕາມຂອບເຂດພາລະບົດບາດ,ສິດແລະຫນ້າທີ່ຄວາມຮັບຜິດຊອບຂອງຕົນເພື່ອສຸມໃສ່ໃຫ້ທຸກຫນ້າວຽກໃຫ້ບັນລຸຜົນສຳເລັດຕາມຄາດຫມາຍທີ່ວາງໄວ້.
