ກອງປະຊຸມພົບປະລະຫວ່າງ ຄະນະກຳມະການແນວລາວສ້າງຊາດ ແຂວງຄຳມ່ວນ ສປປ ລາວ ແລະ ຄະນະກຳມະການແນວໂຮມປະເທດຊາດຫວຽດນາມ ແຂວງກວາງບິ່ງ ສສ ຫວຽດນາມ ຈັດຂຶ້ນໃນວັນທີ 21 ມິຖຸນາ 2024 ທີ່ແຂວງຄໍາມ່ວນ ໂດຍມີທ່ານ ພິດສະໄໝ ກອງຊາເດດ ປະທານແນວລາວສ້າງຊາດ, ທ່ານ ນາງ ຟ້າມ ຖິ້ ເຫິນ ຄະນະກຳມະການແນວໂຮມປະເທດຊາດ ແຂວງກວາງບິ່ງ ພ້ອມດ້ວຍຄະນະກຳມະການແນວລາວສ້າງຊາດ ແລະ ຄະນະກຳມະການແນວໂຮມປະເທດຊາດທັງສອງແຂວງເຂົ້າຮ່ວມ.
ໃນກອງປະຊຸມ, ທັງສອງຝ່າຍໄດ້ຜັດປ່ຽນກັນລາຍງານສະພາບການໂດຍຫຍໍ້ຂອງແຕ່ລະຝ່າຍ ເພື່ອເປັນການແລກປ່ຽນບົດຮຽນເຊິ່ງກັນ ແລະ ກັນ, ຕະຫລອດໄລຍະເວລາ 2 ປີຜ່ານມາ, ພາຍໃຕ້ການນໍາພາ-ຊີ້ນໍາຂອງອົງຄະນະພັກ, ອົງການປົກຄອງໄດ້ມີການເອົາໃຈໃສ່ປຸກລະດົມຂົນຂວາຍຢ່າງຕັ້ງໜ້າ ຂອງແນວໂຮມທັງສອງແຂວງ, ສະພາບເສດຖະກິດ-ສັງຄົມຂອງແຕ່ລະແຂວງ ລ້ວນແຕ່ມີບາດກ້າວການຟື້ນຕົວ, ຂະຫຍາຍຕົວໄດ້ດີພໍສົມຄວນ, ຊີວິດການເປັນຢູ່ຂອງປະຊາຊົນ ນັບມື້ຍິ່ງໄດ້ຮັບການເອົາໃຈໃສ່ປັບປຸງ ແລະ ດີຂຶ້ນກວ່າເກົ່າ, ສະພາບວຽກງານປ້ອງກັນຊາດ-ປ້ອງກັນຄວາມສະຫງົບ ແມ່ນສາມາດຮັກສາໄດ້ໂດຍພື້ນຖານ, ການທູດປະຊາຊົນແມ່ນໄດ້ຮັບການເພີ່ມທະວີ, ບົດບາດຂອງແນວໂຮມທັງສອງ ນັບມື້ຍິ່ງໄດ້ຮັບການຢັ້ງຢືນ ຕໍ່ກັບການເສີມຂະຫຍາຍຢ່າງຕັ້ງໜ້າ, ສາຍພົວພັນຄວາມສາມັກຄີມິດຕະພາບ ແລະ ການຮ່ວມມືຮອບດ້ານ ລະຫວ່າງ ສອງແຂວງ ໂກຍສະເພາະແນວໂຮມທັງສອງແຂວງ ນັບມື້ຍິ່ງໄດ້ຮັບ ການເພີ່ມທະວີ, ມີຄວາມແໜ້ນແຟ້ນ. ຕໍ່ກັບບັນດາວຽກງານດັ່ງກ່າວ ສອງຝ່າຍເຫັນດີເປັນເອກະພາບ ຕໍ່ເນື້ອໃນບົດບັນທຶກກອງປະຊຸມພົບປະ ເພື່ອສືບຕໍ່ສົມທົບກັນຈັດຕັ້ງປະຕິບັດ ໃນໄລຍະ 2024-2026 ຄື: ສືບຕໍ່ເພີ່ມທະວີມູນເຊື້ອແຫ່ງສາຍພົວພັນມິດຕະພາບອັນພິເສດ ລະຫວ່າງ ແນວໂຮມສອງແຂວງ, ເພີ່ມທະວີໃນການໂຄສະນາ, ປຸກລະດົມຂົນຂວາຍປະຊາຊົນສອງແຂວງ ເຂົ້າຮ່ວມຂະບວນການ ພັດທະນາເສດຖະກິດ, ວັດທະນະທໍາ-ສັງຄົມ, ປັບປຸງວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ແທດເໝາະກັບສະພາບການອັນໃໝ່ຂອງແຕ່ລະແຂວງ, ທັງພາກພື້ນ ແລະ ສາກົນ; ໂຄສະນາຂົນຂວາຍໃຫ້ປະຊາຊົນສອງແຂວງ ປະຕິບັດຕາມບົດບັນທຶກກອງປະຊຸມຮ່ວມ 10 ແຂວງຂອງລາວ-ຫວຽດນາມ ທີ່ມີຊາຍແດນຕິດຈອດກັນ ເພື່ອແນໃສ່ຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມເຂດຊາຍແດນ, ສ້າງຊາຍແດນໃຫ້ເປັນເສັ້ນຊາຍແດນ ແຫ່ງສັນຕິພາບ-ມິດຕະພາບ, ຈຳກັດສະພາບຜູ້ຄົນເຂົ້າ-ອອກເມືອງທີ່ຜິດກົດໝາຍຢູ່ບໍລິເວນຊາຍແດນ, ຕ້ານການລ່າສັດປ່າທີ່ຫວງຫ້າມ, ຂຸດຄົ້ນເຄື່ອງປ່າຂອງດົງທີ່ຜິດກົດໝາຍ, ຄ້າຂາຍເຖື່ອນ, ທາດລະເບີດຜ່ານຊາຍແດນ ກໍຄືການ ເຄື່ອນໄຫວຕ່າງໆ ທີ່ມີການສວຍໃຊ້ໂອກາດທີ່ກ່ຽວພັນກັບສາສະໜາ, ຊົນເຜົ່າ ແລະ ອື່ນໆ ທີ່ສ້າງຜົນກະທົບ ແລະ ມີຜົນຮ້າຍທີ່ແຕະຕ້ອງເຖິງສະພາບຄວາມສະຫງົບສຸກ ແລະ ຄວາມປອດໄພຢູ່ໃນສັງຄົມ ກໍຄືສະພາບຄວາມສາມັກຄີມິດຕະພາບອັນພິເສດ ລະຫວ່າງ ສອງຊາດ. ພ້ອມທັງເສີມຂະຫຍາຍມູນເຊື້ອຄວາມສາມັກຄີ, ມິດຕະພາບ ລະຫວ່າງ ສອງຊາດ, ຍົກສູງຄວາມຮັບຜິດຊອບ ແລະ ພາລະບົດບາດຂອງແນວໂຮມ, ເພີ່ມທະວີວຽກງານປຸກລະດົມຂົນຂວາຍ ປະຊາຊົນສອງແຂວງ ເອົາໃຈໃສ່ຊ່ວຍເຫລືອບັນດາຜູ້ທຸກຍາກ ຢູ່ພາຍໃນແຂວງຕົນ ກໍຄືແຂວງຂອງເພື່ອນມິດ, ເສີມສ້າງສາຍພົວພັນ, ຄວາມຮັກແພງອັນດີງາມ ລະຫວ່າງ ປະຊາຊົນສອງແຂວງ; ສືບຕໍ່ຮັກສາລະບອບຈັດກອງປະຊຸມພົບປະ ລະຫວ່າງ ແນວໂຮມທັງສອງແຂວງ ໂດຍຜັດປ່ຽນກັນເປັນເຈົ້າພາບ 2 ປີ/ຄັ້ງ, ແລກປ່ຽນຂໍ້ມູນຂ່າວສານ, ຖອດຖອນບົດຮຽນ ກ່ຽວກັບວຽກງານແນວໂຮມ ລະຫວ່າງ ສອງແຂວງຢ່າງເປັນປົກກະຕິ; ແນວໂຮມສອງແຂວງສືບຕໍ່ສະເໜີໃຫ້ການນໍາພັກ, ອົງການປົກຄອງສອງແຂວງ ຈັດກິດຈະກຳເຄື່ອນໄຫວພົບປະແລກປ່ຽນບົດຮຽນ ກ່ຽວກັບການສ້າງກຸ່ມບ້ານພັດທະນາ ຢູ່ຕາມບໍລິເວນຊາຍແດນສອງແຂວງ ເພື່ອເປັນການເພີ່ມທະວີສາຍພົວພັນ, ມູນເຊື້ອຄວາມສາມັກຄີອັນເປັນແວ່ນແຍງໃສແຈ້ງ ລະຫວ່າງ ສອງຊາດ ລາວ-ຫວຽດນາມ ກໍຄືສອງແຂວງຄໍາມ່ວນ-ກວາງບິ່ງ; ແນວໂຮມແຂວງກວາງບິ່ງ ສືບຕໍ່ເປັນເສນາທິການ, ປະສານສົມທົບໃນການຊ່ວຍບຳລຸງພາສາຫວຽດນາມ ໃຫ້ພະນັກງານຂອງແນວລາວສ້າງຊາດ ແຂວງຄໍາມ່ວນ ປີລະ 2 ສະຫາຍ ເຊິ່ງຮຽນຢູ່ມະຫາວິທະຍາໄລ ກວາງບິ່ງ.
ໂອກາດນີ້, ທ່ານ ພິດສະໄໝ ກອງຊາເດດ ແລະ ທ່ານ ນາງ ຟ້າມ ຖິ້ ເຫີນ ໄດ້ລົງນາມເຊັນບົດບັນທຶກ ໃນການສືບຕໍ່ຈັດຕັ້ງປະຕິບັດວຽກງານຕ່າງໆ ທີ່ໄດ້ຕົກລົງເຫັນດີເປັນເອກພພາບ ລະຫວ່າງສອງແຂວງ ກໍຄືສອງແນວໂຮມ ໂດຍການເຂົ້າຮ່ວມຂອງຄະນະກຳມະການທັງສອງຝ່າຍ.
ຂ່າວ-ພາບ : ແດງສະຫວັດ ແສນພານິດ
