ວັນທີ 5 ສິງຫາ 2024, ທ່ານ ອ່ອນສີ ຈ່າເພຍວ່າ ຮອງປະ ທານແນວລາວສ້າງຊາດແຂວງ ຫຼວງພະບາງ ໄດ້ຖະແຫຼງຂ່າວຕໍ່ສືມວນຊົນ ກ່ຽວກັບການກະກຽມສະເຫຼີມສະຫຼອງ ວັນສ້າງຕັ້ງແນວລາວສ້າງຊາດ ວັນທີ່ 13 ສີງຫາ ຄົບຮອບ 74 ປີ ເຊີ່ງທ່ານໄດ້ຫວນຄືນກ່ຽວກັບປະຫວັດ ລວມທັງທີ່ຕັ້ງ ແລະພາລະບົດ ບາດ ຂອງແນວລາວສ້າງຊາດ ໂດຍຫຍໍ້; ພ້ອມນີ້ ໄດ້ສະເໜີຜົນ ງານທີ່ພົ້ນເດັ່ນ ໃນການເຄື່ອນໄຫວວຽກງານ ຂອງຄະນະກຳມະ ການແນວລາວສ້າງຊາດແຂວງ ໃນ 1 ປີ ຜ່ານມາ ຍົກໃຫ້ເຫັນດ້ານດີ-ຕັ້ງໜ້າ ແລະດ້ານອ່ອນ-ຂໍ້ຄົງຄ້າງ ໂດຍຫຍໍ້ ຈຳນວນໜຶ່ງ; ສຳລັບການກະກຽມສະເຫຼີມສະຫຼອງ ວັນສ້າງຕັ້ງແນວລາວສ້າງຊາດ ຄົບຮອບ 74 ປີ ຢູ່ແຂວງຫຼວງພະບາງ ຄະນະກຳມະການແນວລາວສ້າງຊາດແຂວງ ໄດ້ອອກແຈ້ງການເຖິງຄະນະກຳມະການແນວລາວສ້າງຊາດເມືອງ-ນະຄອນ ໃນທົ່ວແຂວງເພື່ອຈັດຕັ້ງຜັນຂະຫຍາຍ ແລະຫັນເປັນແຜນລະອຽດຢູ່ຂັ້ນຢູ່ຂອງຕົນ; ກະກຽມແຜນການຈັດຕັ້ງໂຮມຊຸມນຸມມິດຕິ່ງຢູ່ຂັ້ນແຂວງ; ຖະແຫຼງຂ່າວຜ່ານສື່ມວນຊົນຂອງແຂວງ ແລະໂຄສະນາຜ່ານສືສັງຄົມອອນລາຍໃຫ້ກວ້າງຂວາງ; ປະສານສົມທົບກັບອົງການກາແດງລາວ ປະຈຳແຂວງ ກ່ຽວກັບການຮ່ວມມື ປຸກລະດົມທົ່ວສັງຄົມ ມາປະກອບສ່ວນບໍລິຈາກເລືອດ ຊ່ວຍເຫຼືອສັງຄົມເຊິ່ງຈະໄດ້ຈັດຂື້ນໃນວັນທີ 9 ສິງຫາ 2024 ນີ້ ຢູ່ວັດໃໝ່ສຸວັນນະພູມມາຣາມ ບ້ານປ່າຂາມ, ນະຄອນ ຫຼວງພະບາງ.ປຸກລະດົມປະຊາຊົນບັນດາເຜົ່າພ້ອມກັນປະຕິບັດທຸກມາດຕະການປ້ອງກັນພະຍາດ ລະບາດຕາມລະດູການຢ່າງເຂັ້ມງວດ, ຍູ້ແຮງຂະບວນການລົງຮາກຖານເຜີຍແຜ່ມະຕິກອງປະຊຸມໃຫຍ່ ຄັ້ງທີ VII ຂອງແນວລາວສ້າງຊາດແຂວງ ຕິດພັນກັບຂະບວນການສ້າງຄອບຄົວ-ບ້ານສາມັກຄີປອງດອງ ແລະປຸກລະດົມປະຊາຊົນບັນດາເຜົ່າ ໃຫ້ມີຄວາມຕື່ນຕົວປະກອບສ່ວນຢ່າງຕັ້ງໜ້າເຂົ້າໃນການປະຕິບັດພັນທະເສຍພາສີ-ອາກອນໃຫ້ລັດ.
ໂອກາດນີ້ ທ່ານໄດ້ຮຽກຮ້ອງໃຫ້ພະນັກງານລັດຖະກອນ, ທະ ຫານຕຳຫຼວດ, ປະຊາຊົນບັນດາເຜົ່າ, ຊັ້ນຄົນ, ສາສະໜາ, ທຸກເພດ – ໄວ ພາຍໃນທົ່ວແຂວງ ຈົ່ງຍົກສູງນ້ຳໃຈເສຍສະຫຼະອັນສູງສົ່ງຂອງຕົນ ມາປະກອບສ່ວນ ບໍລິຈາກເລືອດເພື່ອຊ່ວຍເຫຼືອສັງຄົມ ທັງປະກອບສ່ວນທຸກຂະບວນການຂອງແນວລາວສ້າງຊາດຈັດຂື້ນ ເພື່ອສະເຫຼີມສະຫຼອງວັນສ້າງຕັ້ງແນວລາວສ້າງຊາດໃນປີນີ້.
