ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ແພດໝໍມີຈັນຍາບັນປົກປ້ອງຄວາມລັບ ແລະ ສິດທິຂອງຄົນເຈັບທົ່ວໄປ ແຕ່ຈໍາເປັນຕ້ອງເປີດເຜີຍກໍລະນີຂອງຄົນເຈັບທີ່ຕິດພະຍາດຮ້າຍແຮງ ເພື່ອປ້ອງກັນສ່ວນລວມ

ໃນໂອກາດຖະແຫຼງຂ່າວຕໍ່ສື່ມວນຊົນ ໃນຕອນແລງວັນທີ 25 ມິນາ 2020 ນີ້ ທີ່ກະຊວງສາທາລະນະສຸກ, ນະຄອນຫຼວງວຽງຈັນ, ທ່ານພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ ໄດ້ຕອບຂໍ້ຂ້ອງໃຈຂອງນັກຂ່າວ ເຖິງກໍລະນີທີ່ຕ້ອງໄດ້ເປີດເຜີຍຊື່ ແລະ ທີ່ຢູ່ຂອງຄົນເຈັບທີ່ຕິດເຊື້ອພະຍາດໂຄວິດ-19 ວ່າ: ພວກເຮົາຕ້ອງຂໍອະໄພກັບຄອບຄົວຂອງຄົນເຈັບທີ່ຕິດເຊື້ອພະຍາດໂຄວິດ-19 ໃນກໍລະນີທີ່ຕ້ອງໄດ້ເປີດເຜີຍຊື່ ແລະ ຂໍ້ມູນບາງຢ່າງກ່ຽວກັບຄົນເຈັບທີ່ຕິດພະຍາດຮ້າຍແຮງ; ແຕ່ໂດຍທຳມະດາທົ່ວໄປແລ້ວ, ແພດໝໍຂອງພວກເຮົາ ແມ່ນມີຈັນຍາບັນຂອງຕົນ ໃນການປົກປ້ອງຄວາມລັບ ແລະ ສິດທິຂອງຄົນເຈັບທົ່ວໄປທຸກໆຄົນ, ຍົກເວັ້ນແຕ່ໃນກໍລະນີມີການລະບາດຂອງພະຍາດຮ້າຍແຮງ ເໝືອນດັ່ງໃນຄັ້ງນີ້, ຖ້າຜູ້ໃດຫາກປົກປິດຄວາມຈິງ ກໍ່ຈະຖືກປະຕິບັດວິໄນ ແລະ ຮັບໂທດຕາມລະບຽບກົດໝາຍຂອງບ້ານເມືອງຢ່າງເຂັ້ມງວດ, ເຊິ່ງກົດໝາຍວ່າດ້ວຍການຄວບຄຸມພະຍາດຕິດຕໍ່ ກໍ່ໄດ້ມີຂໍ້ກໍານົດໄວ້ຢ່າງຈະແຈ້ງຢູ່ແລ້ວ.

ທ່ານຮອງລັດຖະມົນຕີກະຊວງສາທາລະນະສຸກ ກ່າວຕື່ມອີກວ່າ: ປະຈຸບັນ, ທິມງານສະເພາະກິດພວມຂຸ້ນຂ້ຽວຕິດຕາມ ແລະ ຊອກຄົ້ນຫາຜູ້ທີ່ໄດ້ໃກ້ຊິດ ຫຼື ໄດ້ສໍາຜັດກັບຜູ້ທີ່ຕິດເຊື້ອພະຍາດໂຄວິດ-19 ຢູ່ປະເທດເຮົາຢ່າງເຄັ່ງຮ້ອນ ເພື່ອນໍາມາກັກຕົວເປັນການຊົ່ວຄາວ; ຖ້າຫາກມີເຊື້ອພະຍາດ ກໍ່ຈະໄດ້ຮັບການປິ່ນປົວໂດຍໄວ ແລະ ບໍ່ໃຫ້ແຜ່ເຊື້ອໄປຫາຄົນອື່ນ. ດ້ວຍເຫດນີ້, ການແຈ້ງຊື່ ແລະ ທີ່ຢູ່ຂອງຄົນເຈັບທີ່ຕິດເຊື້ອພະຍາດໂຄວິດ-19 ນີ້ ຈຶ່ງຖືວ່າ ເປັນກໍລະນີຈຳເປັນ ແລະ ບໍ່ແມ່ນການມີເຈດຕະນາຢາກຈໍາແນກແຕ່ຢ່າງໃດ, ແຕ່ເປັນການເຕືອນສະຕິ ທັງເປັນການແຈ້ງຂ່າວໃຫ້ຜູ້ທີ່ຮັກແພງ ແລະໃກ້ຊິດກັບຄົນທີ່ຕິດພະຍາດດັ່ງກ່າວນີ້ ໃຫ້ຮູ້ຈໍາກັດກັກຕົນເອງ ເພາະການຕິດເຊື້ອພະຍາດນີ້ ແມ່ນເກີດຂຶ້ນກັບຄົນທີ່ໃກ້ຊິດກັນເປັນສ່ວນໃຫຍ່.

ໃນໂອກາດດຽວກັນນີ້, ທ່ານ ພອນປະດິດ ສັງໄຊຍະລາດ, ຫົວໜ້າສູນວິເຄາະ ແລະ ລະບາດວິທະຍາ, ກະຊວງສາທາລະນະສຸກ ໄດ້ແຈ້ງໃຫ້ຮູ້ເຖິງ ເສັ້ນທາງການເດີນທາງຂອງຜູ້ທີ່ຕິດເຊື້ອໂຄວິດ-19 ລາຍໜຶ່ງຂອງປະເທດເຮົາ ດັ່ງນີ້: – ວັນທີ 7 ມິນາ 2020 ເດີນທາງທາງຍົນຈາກ ຫຼວງພະບາງ-ວຽງຈັນ ດ້ວຍຖ້ຽວບິນ TR 350 – ວັນທີ 9 ມີນາ 2020 ເດີນທາງທາງຍົນຈາກ ບາງກອກ-ວຽງຈັນ ດ້ວຍຖ້ຽວບິນ TG 574 – ວັນທີ 11 ມິນາ 2020 ເດີນທາງທາງຍົນຈາກ ຫຼວງພະບາງ-ສຽມຣຽບ ດ້ວຍຖ້ຽວບິນ QV 525 – ວັນທີ 11 ມິນາ 2020 ເດີນທາງທາງຍົນຈາກ ວຽງຈັນ- ບາງກອກ ດ້ວຍຖ້ຽວບິນ TG 2573 – ວັນທີ່ 21 ມິນາ 2020 ເດີນທາງທາງຍົນຈາກ ຫຼວງພະບາງ- ວຽງຈັນ ດ້ວຍຖ້ຽວບິນ QV 104 ດັ່ງນັ້ນ ຈຶ່ງຂໍຮຽກຮ້ອງໃຫ້ຜູ້ທີ່ເຄີຍຮ່ວມຖ້ຽວບິນດັ່ງກ່າວນີ້ ຈົ່ງຕິດຕາມອາການຂອງຕົນເອງຢູ່ເຮືອນຢ່າງເຄັ່ງຄັດ; ຖ້າຫາກມີອາການເຂົ້າຄ່າຍຕິດເຊື້ອພະຍາດ ຂໍໃຫ້ໂທແຈ້ງໝາຍເລກ 166 ຫຼື ໄປໂຮງໝໍຢ່າງຮີບດ່ວນ; ຖ້າຫາກຜູ້ທີ່ຕິດເຊື້ອແລ້ວປິດອໍາໄວ້ ຫຼື ມີເຈດຕະນາແຜ່ເຊື້ອຕໍ່ໃຫ້ຄົນອື່ນ ກໍ່ຈະຖືກດໍາເນີນຄະດີຕາມລະບຽບກົດໝາຍຂອງບ້ານເມືອງຢ່າງເຂັ້ມງວດ.

ໂດຍ: ຄໍາກອງ ກິດຕິຄຸນ