ໃນຖານະທີ່ເປັນຕົວແທນໃຫ້ແກ່ແມ່ຍິງລາວບັນດາເຜົ່າ ຢູ່ໃນກອງປະຊຸມໃຫຍ່ຜູ້ແທນແມ່ຍິງທົ່ວປະເທດຄັ້ງທີ 8 ນັ້ນ ໄດ້ເນັ້ນໃສ່ແຜນພັດທະນາແມ່ຍິງແຫ່ງຊາດ ເພື່ອສ້າງເງືອນໄຂດຶງດູດທືນຮອນຈາກສັງຄົມ,ຈາກປະເທດໃກ້ຄຽງ ປະເທດເພື່ອນມິດຍຸດທະສາດ ແລະ ອົງການຈັດຕັ້ງຕ່າງໆ ເຂົ້າມາຊ່ວຍເຫຼືອເພື່ອເຮັດໃຫ້ແມ່ຍິງລາວ ໄດ້ເຄື່ອນໄຫວວຽກງານຂອງຕົນ ແກ້ໄຂບັນຫາ ເສດຖະກິດ ແລະ ພັດນາສີມືແຮງງານເພດຍິງໃຫ້ດີຂື້ນ.
ທ່ານ ນາງ ອິນລາວັນ ແກ້ວບຸນພັນ ປະທານສູນກາງສະຫະພັນແມ່ຍິງລາວໃຫ້ສໍາພາດຕໍ່ສື່ມວນຊົນ ຕອນເຊົ້າວັນທີ 9 ມິນາ 2022ນີ້ວ່າ : ສູນກາງສະຫະພັນແມ່ຍິງລາວໄດ້ປະຕິບັດຕາມແນວທາງນະໂຍບາຍຂອງພັກເຮົາໂດຍມີການເລືອກເຟັ້ນ ແລະ ຮັບເອົາໂຄງການ ມາຜັນຂະຫຍາຍເຂົ້າໃນວຽກງານຕົວຈິງ ເພື່ອໃຫ້ເອື້ອຍນ້ອງແມ່ຍິງລາວໄດ້ເຄື່ອນໄຫວກິດຈະກໍາຂອງຕົ້ນ ເປັນຕົ້ນ ຜະລິດສິນຄ້າໂອດອບປະຈໍາທ້ອງຖິ່ນ, ນອກຈາກນີ້ ຍັງຈະໄດ້ສ້າງກຸ່ມການຜະລິດ ປູກຜັກ, ລ້ຽງສັດ ກຸ່ມການຕະຫຼາດ ແລະ ອື່ນໆ ພ້ອມທັງອໍານວຍຄວາມສະດວກໃຫ້ແກ່ນັກທຸລະກິດຍິງໄດ້ເຄື່ອນໄຫວວຽກງານຕາມພາລະບົດບາດຂອງຕົນ, ພັດທະນາທຸລະກິດໃຫ້ດີຂື້ນ ເຮັດໃຫ້ແມ່ຍິງລາວບັນດາເຜົ່າມີວຽກເຮັດງານທໍາ ສາມາດສ້າງລາຍຮັບໃຫ້ແກ່ຄອບຄົວ ໃນໄລຍະທີ່ມີຄວາມຫຍຸ້ງຍາກ ເນື່ອງຈາກການລະບາດຂອງພະຍາດໂຄວິດ19.
ທ່ານາງ ອິນລາວັນ ແກ້ວບຸນພັນ ໃຫ້ຮູ້ອີກວ່າ : ໃນໄລຍະຜ່ານມາສູນກາງສະຫະພັນແມ່ຍິງລາວໄດ້ຊຸກຍູ້ ສ້າງເງື່ອນໄຂ ອໍານວຍຄວາມສະດວກໃຫ້ ເອື້ອຍນ້ອງແມ່ຍິງໄດ້ດໍາເນີນທຸລະກິດຂອງຕົນຖືກຕ້ອງຕາມກົດໝາຍ, ແລະ ກາຍເປັນນັກທຸລະກິດທີ່ດີເດັນ ສາມາດປະກອບ ສ່ວນສໍາຄັນໃຫ້ແກ່ການພັດທະນາປະເທດຊາດ , ປະຈຸບັນຢູ່ລາວມີນັກທຸລະກິດທີ່ເປັນແມ່ຍິງ ກວມປະມານ 70 ຫາ 80% ຂອງແມ່ຍິງໃນທົ່ວປະເທດ, ໂດຍສະເພາະການດໍາທຸລະກິດ ຂະໜາດນ້ອຍ ຂະໜາດກາງ ເດັ່ນກວ່າໝູ່ ແມ່ນເອື້ອຍນ້ອງແມ່ຍິງຈຳນວນໜື່ງໄດ້ກາຍເປັນເຈົ້າຂອງທຸລະກິດທີ່ສົ່ງອອກໄປຕ່າງປະເທດ, ໂດຍສະເພາະບໍລິສັດທີ່ສົ່ງເຂົ້າໄປຂາຍຢູ່ເອີລົບ ປະທານບໍລິສັດນີ້ກໍແມ່ນແມ່ຍິງ, ນອກຈາກນັ້ນມີຫລາຍສາຂາທຸລະກິດຂອງເອື້ອຍນ້ອງແມ່ຍິງລາວ ໄດ້ກາຍເປັນທຸລະກິດດີເດັ່ນ ເປັນຕົ້ນສາຂາທຸລະກິດອາຊຽນ ກໍຄືສາຂາຂອງ ສປປ ລາວ ກໍນັບມື້ນັບມີເພີ່ມຂຶ້ນ
ປະທານສູນກາງສະຫະພັນແມ່ຍິງລາວໃຫ້ຮູ້ຕື່ມວ່າ: ຂັ້ນຕອນ ການສົ່ງເສີມຄວາມກ້າວໜ້າຂອງແມ່ຍິງໃນຕໍ່ໜ້ານີ້ ແມ່ນຖືເອົາສາມກົນໄກ ນອນຢູ່ໃນ 10 ແຜນງານ 65 ໂຄງການແລ້ວ, ນອກນີ້ ຍັງໄດ້ສົມທົບກັບກອງເລຂາເພື່ອສົ່ງເສີມຄວາມກ້າວໜ້າຂອງແມ່ ແລະເດັກແຫ່ງຊາດ ໂດຍໄດ້ອອກນິຕິກໍາສົມທົບກັບຕ່າງປະເທດໃນການປະຕິບັດສົນທິສັນຍາຕ່າງໆ ເພື່ອເປັນນິຕິກໍາໃຫ້ເອື້ອຍນ້ອງແມ່ຍິງລາວໄດ້ຈັດຕັ້ງງປະຕິບັດ.