ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີ ມອບ-ຮັບ ເຮືອນແຫ່ງຄວາມຮັກ ຂອງຂວັນຈາກ ສະຫະພັນແມ່ຍິງ ແຂວງຝຸເຖາະ ສສ ຫວຽດນາມ ມອບໃຫ້ແມ່ຍິງຜູ້ທຸກຍາກ ແຂວງຫລວງນໍ້າທາ ຈັດຂຶ້ນໃນວັນທີ 29 ມິຖຸນາ 2024 ຢູ່ທີ່ບ້ານນານ້ອຍ, ເມືອງ ແລະ ແຂວງຫລວງນໍ້າທາ ໂດຍການເຂົ້າຮ່ວມຂອງ ທ່ານ ຫລ້າປະເສີດ ສີປະເສີດ ເຈົ້າເມືອງໆຫລວງນໍ້າທາ, ມີທ່ານ ນາງ ກຽວທີ ຮັງຟຸກ ຫົວໜ້າກົງສູນໃຫຍ່ ສສ ຫວຽດນາມ ປະຈໍາ ນະຄອນຫລວງພະບາງ, ທ່ານ ນາງ ບົວວັນ ພົມມະລິດ ປະທານຄະນະບໍລິຫານງານ ສະຫະພັນແມ່ຍິງແຂວງ ພ້ອມດ້ວຍຂະແໜງການທີ່ກ່ຽວຂ້ອງຂັ້ນ ແລະ ປະຊາຊົນເຂົ້າຮ່ວມ.
ທ່ານ ຫວຽນ ກຶວ ຕ້າວ ຜູ້ຮັບເໝົາກໍ່ສ້າງ ໄດ້ລາຍງານຜົນສໍາເລັດການກໍ່ສ້າງ ແລະ ຕິດປ້າຍເຮືອນຢູ່ເຮືອນແຫ່ງຄວາມຮັກ ໃຫ້ແມ່ຍິງທຸກຍາກອານາຖາ 2 ຄອບຄົວ ຢູ່ບ້ານນານ້ອຍ ແລະ ບ້ານ ຫົວນາ ເມືອງ ແລະ ແຂວງຫລວງນໍ້າທາ ໂດຍໄດ້ຮັບທຶນຊ່ວຍເຫລືອລ້າ ຈາກສະຫະພັນແມ່ຍິງ ແຂວງຝຸເຖາະ ສສ ຫວຽດນາມ ຈໍານວນ 2 ຫລັງ ມູນຄ່າ 120 ລ້ານກີບ, ເຊິ່ງເລີ່ມກໍ່ສ້າງມາແຕ່ ວັນທີ 24 ພຶດສະພາ 2024 ແລະ ສໍາເລັດ 100% ໃນວັນທີ 24 ມິຖຸນາ 2024 ໂດຍມີຂະໜາດກວ້າງ 4 ແມັດ, ຍາວ 6 ແມັດ, ເປັນອາຄານຊັ້ນດຽວ ເທດ້ວຍເບຕົງ, ຫລັງຄາມຸງດ້ວຍສັງກະສີ, ກໍ່ດ້ວຍດິນຈີ່, ການກໍ່ສ້າງເຮືອນແຫ່ງຄວາມຮັກໃນຄັ້ງນີ້ ຄະນະພັກ, ອົງການປົກຄອງບ້ານທັງ 2 ບ້ານ ໄດ້ຄັດເລືອກເອົາ 2 ຄອບຄົວທີ່ທຸກຍາກຢູ່ພາຍໃນບ້ານ ແລະ ອໍານວຍຄວາມສະດວກ ພ້ອມທັງເອົາໃຈໃສ່ເຕົ້າໂຮມ ປຸກລະດົມປະຊາຊົນ ປະກອບສ່ວນແຮງງານເຂົ້າໃນການກໍ່ສ້າງຈົນໄດ້ຮັບຜົນສໍາເລັດ.
ຂ່າວ: ອຸ້ມ ສົມນໍວັນ