ແຫລ່ງທ່ອງທ່ຽວວັດທະນະທໍາເຜົ່າຫລີ ແລະ ເຜົ່າມົ້ງ ສະຖານທີ່ຍອດນິຍົມທີ່ຄວນສໍາຜັດຢູ່ແຂວງໄຫຫຼໍາຂອງຈີນ
ແຂວງໄຫຫຼໍາ (ໄຫໜານ) ເປັນເກາະທີ່ຢູ່ໃຕ້ສຸດຂອງ ສປ ຈີນ ທີ່ນັກທ່ອງທ່ຽວທັງພາຍໃນ ແລະ ຕ່າງ ປະເທດຮູ້ຈກກັນດີ ເພາະເປັັນແຂວງຍອດນິຍົມຂອງການທ່ອງ ທ່ຽວ ເນື່ອງຈາກມີສະຖານ ທີ່ທ່ອງທ່ຽວທາງທໍາມະຊາດ, ປະຫວັດສາດ, ວັດທະນະທໍາ ແລະ ອື່ນໆ ທີ່ມີຊື່ສຽງຫລາຍແຫ່ງ ເຊິ່ງໜຶ່ງໃນນັ້ນ ແມ່ນແຫລ່ງທ່ອງ ທ່ຽວມໍລະດົກວັດທະນະທໍາເຜົ່າຫລີ ແລະ ເຜົ່າມົ້ງ (Binglanggu Li and Miao Cultural Heritage)
ແຫລ່ງທ່ອງທ່ຽວດັ່ງກ່າວ ຕັ້ງຢູ່ເຂດປ່າສະຫງວນທໍາມະຊາດລະຫວ່າງນະຄອນຊານຢ້າ ແລະ ເມືອງເປົ່າຖິງ ເຊິ່ງເປັນສະຖານທີ່ທ່ອງທ່ຽວທາງວັດທະນະທໍາທີ່ປະສົມປະສານກັບທໍາມະຊາດໄດ້ຢ່າງສວນງາມ ແລະ ໄດ້ຮບການຈດອັນດັບໃຫ້ເປັນສະຖານທີ່ທ່ອງທ່ຽວຂອງຈີນໃນລະດັບ 5A ແລະ ຕິດ 1 ໃນ 10 ສະຖານທີ່ຖ່າຍຮູບເງົາທີ່ດີທີ່ສຸດຂອງຈີນ.
ແຫລ່ງທ່ອງທ່ຽວນີ້ ໄດ້ຮັບການສ້າງຂຶ້ນໃນປີ 1998 ມີເນື້ອ ທີ່ຫລາຍກວ່າ 330 ເຮັກຕາ ເຊິ່ງມີຈຸດເດັ່ນໃນການນໍາສະເໜີດ້ານວັດທະນະທໍາ ແລະຮີດຄອງປະເພນີ ກໍຄື ວິຖີການດໍາລົງຊີວິດຂອງຊົນເຜົ່າຫລີ ແລະ ເຜົ່າມົ້ງ ເຊິ່ງເປັນຊົນເຜົ່າທີ່ມີຈໍານວນປະ ຊາກອນຫລາຍທີ່ສຸດໃນເກາະໄຫຫຼໍາເພື່ອໃຫ້ນັກທ່ອງທ່ຽວທັງພາຍໃນປະເທດ ແລະ ຕ່າງປະເທດໄດ້ຮັບຮູ້ໃນຮູບແບບຂອງການທ່ອງທ່ຽວວັດທະນະທໍາໄດ້ເປັນຢ່າງດີ.
ຍ້ອນມີເນື້ອທີ່ກວ້າງຂວາງ, ສະນັ້ນ ພາຍໃນແຫລ່ງທ່ອງ ທ່ຽວແຫ່ງນີ້ ມີຫລາຍຢ່າງໃຫ້ນັກທ່ອງທ່ຽວໄດ້ຊົມ ເຊັ່ນ: ພິພິຕະພັນໝູ່ບ້ານມໍລະດົກວັດທະນະທໍາຂອງເຜົ່າຫລີ ແລະ ເຜົ່າມົ້ງ, ຮູບແບບການໃຊ້ຊີວິດ, ການຕໍາຫຸກທໍໄໝ ແລະ ອື່ນໆ. ໃນນີ້ ກິດຈະກໍາໜຶ່ງທີ່ສໍາຄັນ ແລະ ຂາດບໍ່ໄດ້ ເຊິ່ງຜູ້ຂຽນຮັບຮອງວ່າຕ້ອງຖືກໃຈນັກທ່ອງທ່ຽວຫລາຍໆ ຄົນທີ່ໄດ້ເດີນທາງມາທ່ອງທ່ຽວສະຖານທີ່ແຫ່ງນີ້ ແມ່ນການຮັບຊົມການສະແດງຂອງຊົນເຜົ່າຫລີ ແລະ ເຜົ່າມົ້ງຢູ່ເວທີກາງທີ່ມີຫລາກຫລາຍລາຍການຢ່າງມ່ວນຊື່ນ, ທັງສະແດງໃຫ້ເຫັນເຖີງວັດທະນະທໍາ ແລະ ຮີດຄອງປະເພນີຂອງເຂົາ ເຈົ້າທີ່ມີມາແຕ່ບູຮານນະການ.
ນອກຈາກໄດ້ທ່ອງທ່ຽວຢ່າງມວນຊື່ນແລ້ວ, ພາຍໃນແຫລ່ງທ່ອງທ່ຽວດັ່ງກ່າວ ໄດ້ຈັດສັນເຂດບໍລິການອາຫານທີ່ເປັນເອກະ ລັກຂອງເຜົ່າຫລີ ແລະ ເຜົ່າມົ້ງທີ່ຫລາກຫລາຍລົດຊາດ ເພື່ອໃຫ້ນັກທ່ອງທ່ຽວໄດ້ທົດລອງຊີມ.
ອີງຕາມຂໍ້ມູນທີ່ຜູ້ຕາງໜ້າແຫລ່ງທ່ອງທ່ຽວມໍລະດົກວັດທະນະທໍາເຜົ່າຫລີ ແລະ ເຜົ່າມົ້ງ ບອກກັບສື່ມວນຊົນຈີນ-ອາ ຊຽນ ຫລາຍກວ່າ 50 ຄົນ ທີ່ເຂົ້າຮ່ວມກິດຈະກໍາ “ຄູ່ຮ່ວມສື່ ມວນຊົນອາຊຽນ ເບິ່ງຈີນຮ່ວມກັນ” ຈັດຂຶ້ນໂດຍວິທະຍຸໂທລະ ພາບສູຍກາງຈີນ (CMG) ທີ່ຢ້ຽມຢາມສະຖານທີ່ດັ່ງກ່າວເມື່ອບໍ່ດົນມານີ້ວ່າ: ໃນແຕ່ລະປີແຫລ່ງທ່ອງທ່ຽວມໍລະດົກວັດທະນະທໍາເຜົ່າຫລີ ແລະ ເຜົ່າມົ້ງ ສາມາດດຶງດູດນັກທ່ອງທ່ຽວໄດ້ 1,2 ລ້ານຄົນ. ເນື່ອງຈາກເປັນແຫລ່ງທ່ອງທ່ຽວທີ່ມີເນື້ອທີ່ກວ້າງ ຂວາງ ແລະ ມີຫລາກຫລາຍກິດຈະກໍາ. ດັ່ງນັ້ນ, ນັກທ່ອງທ່ຽວທີ່ມາທ່ອງທ່ຽວສະຖານທ່ແຫ່ງນີ້ຕ້ອງເພື່ອເວລາໄວ້ ຫລື ຢ່າງໜ້ອຍຕ້ອງໃຊ້ເວລາໜຶ່ງວັນຈຶ່ງສາມາດຊົມຫລາຍໆ ກິດຈະກໍາໄດ້ຢ່າງເຕັມທີ່.
ນັກທ່ອງທ່ຽວສາມາດເດີນທາງໄປແຫລ່ງທ່ອງທ່ຽວມໍລະ ດົກວັດທະນະທໍາເຜົ່າຫລີ ແລະ ເຜົ່າມົ້ງ ໄດ້ຢ່າງສະດວກສະບາຍ, ທັງລົດສ່ວນຕົວ, ລົດແທັກຊີ ແລະ ລົດເມ ໂດຍເດີນທາງຈາກເທດສະບານນະຄອນຊານຢ້າຫາສະ ຖານທີ່ດັ່ງກ່າວໃຊ້ເວລາປະ ມານເກືອບ 2 ຊົ່ວໂມງກໍຮອດ.
ດັ່ງນັ້ນ, ຖ້າຫາກທ່ານໃດໄດ້ມີໂອກາດເດີນທາງໄປທ່ອງທ່ຽວທີ່ແຂວງໄຫຫຼໍາຂອງຈີນ ຄວນຫາເວລາໄປທ່ອງທ່ຽວສະຖານທີ່ແຫ່ງນີ້ ຮັບຮອງວ່າຈະບໍ່ຜິດຫວັງຢ່າງແນ່ນອນ.
