ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ແຮງງານລາວທຸກຄົນ ທີ່ເດີນທາງກັບຈາກຕ່າງປະເທດ ຈະຕ້ອງກວດພະຍາດ ແລະ ຖືກກັກກັນບໍລິເວນ 14 ວັນ ຈຶ່ງຈະສາມາດກັບຄືນສູ່ຄອບຄົວໄດ້

ດຣ.ພອນປະດິດ ສັງໄຊຍະລາດ, ຫົວໜ້າສູນວິເຄາະ ແລະ ລະບາດວິທະຍາ ກະຊວງສາທາລະນະສຸກ ໃຫ້ຮູ້ວ່າ: ເຖິງວ່າຈະບໍ່ມີການຄົ້ນພົບເຊື້ອພະຍາດ ໂຄວິດ-19 ມາຫລາຍມື້ແລ້ວກໍ່ຕາມ ແຕ່ທິມງານເຝົ້າລະວັງປະຈຳທຸກທ້ອງຖິ່ນ ກໍ່ຍັງສືບຕໍ່ເຮັດວຽກງານວິຊາສະເພາະຂອງຕົນຢ່າງເຂັ້ມງວດ ໂດຍໄດ້ປະສານງານກັບໜ່ວຍງານເຝົ້າລະວັງໃນຂອບເຂດທົ່ວປະເທດ ເພື່ອໃຫ້ແຕ່ລະບອ່ນປະຕິບັດໜ້າທີ່ຂອງຕົນຢ່າງເຄັ່ງຄັດ ເພື່ອຊອກຄົ້ນຫາບຸກຄົນທີ່ມີອາການສົງໄສ ໃຫ້ເຂົ້າໄປກວດສຸຂະພາບ ເພື່ອປິດຊ່ອງຫວ່າງບໍ່ໃຫ້ຜູ້ທີ່ມີເຊື້ອພະຍາດແຜ່ກະຈາຍໄປໃສ່ຄົນອື່ນ, ເພາະໃນປະຈຸບັນ ສປປ ລາວ ຍັງມີຄວາມສ່ຽງສູງ ທີ່ຈະເກີດການລະບາດຂອງພະຍາດຮ້າຍແຮງນີ້ເປັນຮອບທີສອງ; ໂດຍກຸ່ມທີ່ມີຄວາມສ່ຽງສູງແມ່ນແຮງງານລາວ ທີ່ເດີນທາງກັບມາແຕ່ປະເທດໃກ້ຄຽງທີ່ມີຈໍານວນຫລວງຫລາຍ ຍັງສືບຕໍ່ທະຍອຍເດີນທາງກັບບ້ານເກີດເມືອງນອນໃນແຕ່ລະວັນຢ່າງຕໍ່ເນື່ອງ ເຊິ່ງຄະນະສະເພາະກິດພວມເຝົ້າລະວັງ ສາມາດຄວບຄຸມໄດ້ໃນລະດັບໜຶ່ງແລ້ວ; ແຕ່ສິ່ງທີ່ຕ້ອງສືບຕໍ່ເຮັດຕໍ່ໄປ ຄືການຄວບຄຸມພະຍາດບໍ່ໃຫ້ເຂົ້າມາອີກຮອບໃໝ່, ສະນັ້ນຄະນະສະເພາະກິດ ຈຶ່ງໄດ້ມີມາດຕະການທີ່ເຄັ່ງຄັດຂຶ້ນກວ່າເກົ່າ, ເປັນຕົ້ນແມ່ນ ສຳລັບຄົນທີ່ເດີນທາງມາແຕ່ຕ່າງປະເທດນັ້ນ ທຸກຄົນຈະຕ້ອງໄດ້ກວດຫາເຊື້ອພະຍາດໂຄວິດ-19; ຫລັງຈາກນັ້ນ ກໍ່ຕ້ອງໄດ້ຖືກກັກກັນບໍລິເວນທັງໝົດ 14 ວັນ ຈຶ່ງຈະສາມາດກັບໄປໃຊ້ຊີວິດປົກກະຕິກັບຄອບຄົວໄດ້. ເພາະສະນັ້ນ ແຕ່ລະແຂວງ, ແຕ່ລະເມືອງ ແລະ ແຕ່ລະທ້ອງຖິ່ນຈະຕ້ອງມີສະຖານທີ່ກັກກັນບໍລິເວນ ໄວ້ຮອງຮັບຄົນທີ່ເດີນທາງເຂົ້າໄປທ້ອງຖິ່ນຂອງຕົນ.

ດຣ.ພອນປະດິດ ສັງໄຊຍະລາດ ໃຫ້ຮູ້ຕື່ມວ່າ: ນີ້ເປັນມາດຕະການໜຶ່ງທີ່ຄະນະສະເພາະກິດໄດ້ຊີ້ນໍາຢ່າງຊັດເຈນ ເພື່ອປິດຊ່ອງຫວ່າງຂອງຄວາມສ່ຽງທີ່ອາດຈະເກີດຂຶ້ນຮອບໃໝ່ຈາກພະຍາດນີ້, ເຊິ່ງໄລຍະຜ່ານມາຊ່ອງຫວ່າງທີ່ມີຄວາມສ່ຽງອາດຈະເກີດຂຶ້ນກັບແຮງງານທີ່ມາແຕ່ຕ່າງປະເທດ ມີ 3 ທາງຜ່ານໃຫ່ຍຄື : ຂົວມິດຕະພາບ 1 ວຽງຈັນ-ໜອງຄາຍ, ຂົວມິດຕະພາບ 2 ສະຫວັນນະເຂດ-ມຸກດາຫານ ແລະ ດ່ານຊາຍແດນ ຈໍາປາສັກ-ອຸບົນປະເທດໄທ. ດັ່ງນັ້ນ ແຮງງານລາວທຸກຄົນ ທີ່ເດີນທາງມາຜ່ານຈຸດນີ້ ທາງຄະນະສະເພາະກິດ ຈະໃຫ້ໄປກວດສຸຂະພາບທັນທີ ແລະ ກັກກັນໄວ້ 14 ວັນ; ຖ້າຜົນກວດອອກມາຫາກບໍ່ພົບເຊື້ອຈຶ່ງຈະຖືກສົ່ງກັບຄືນແຂວງຕົນເອງ. ມາດຕະການນີ້ ກໍ່ແມ່ນເພື່ອຫລີກລ່ຽງການແຜ່ເຊື້ອໄປຫາບ່ອນອື່ນ ນັ້ນເອງ

ໂດຍ: ເຂີຍຫລ້າ