ແຮງງານລາວໃຫ້ຄວາມສົນໃຈໄປເຮັດວຽກຢູ່ ສ.ເກົາຫຼີເພີ່ມຂຶ້ນເລື້ອຍໆ

ການໄປເຮັດວຽກຢູ່ ສ.ເກົາຫຼີ ແມ່ນມີ 2 ທາງເລືອກ ຄື:

1. ຕາມລະບົບການອະນຸຍາດຈ້າງງານ (EPS);

2. ຕາມລະບົບແຮງງານລະດູການ (SWP).

ການໄປເຮັດວຽກຕາມລະບົບ EPS ແມ່ນ ການຮ່ວມມື ລະ ຫວ່າງ ກະຊວງແຮງງານ ແລະ ສະຫວັດດີການສັງຄົມ ແຫ່ງ ສປປ ລາວ ແລະ ກະຊວງການຈ້າງງານ ແລະ ແຮງງານ ແຫ່ງ ສ.ເກົາຫຼີ ໂດຍໄດ້ຮ່ວມກັນລົງນາມບົດບັນທຶກຄວາມເຂົ້າໃຈວ່າດ້ວຍການຈັດສົ່ງແຮງງານລາວໄປເຮັດວຽກຢູ່ ສ.ເກົາຫຼີ ຕາມລະບົບການອະນຸຍາດການຈ້າງງານ (EPS) ໃນວັນທີ 09 ກັນຍາ 2016. ຕາງໜ້າຮັບຜິດຊອບຈັດສົ່ງແຮງງານ ແມ່ນກົມການຈັດຫາງານ ກະຊວງແຮງງານ ແລະ ສະຫວັດດີການສັງຄົມແລະ ອົງການບໍລິ ການພັດທະນາຊັບພະຍາກອນມະນຸດ ຕາງໜ້າໃຫ້ກະຊວງການຈ້າງງານ ແລະ ແຮງງານ ແຫ່ງ ສ.ເກົາຫຼີ ເຮັດໜ້າທີ່ໃນການຮັບເອົາແຮງງານ.

ການຈັດສົ່ງແຮງງານໄປເຮັດວຽກຜ່ານລະບົບນີ້ ແມ່ນປະຕິ ບັດຕາມລະບົບຂອງ ສ.ເກົາຫຼີ ທີ່ເອີ້ນວ່າ ລະບົບການອະນຸຍາດຈ້າງງານ (EPS) ຊຶ່ງທຸກປະເທດທີ່ສົ່ງແຮງງານເຂົ້າໄປເຮັດວຽກຢູ່ ສ.ເກົາຫຼີ ຕ້ອງໄດ້ປະຕິບັດຕາມລະບົບການອະນຸຍາດຈ້າງງານຢ່າງເຄັ່ງຄັດ ແລະ ເປັນເອກະພາບກັນ ບໍ່ມີກໍລະນີຍົກເວັ້ນໃຫ້ປະເທດໃດປະເທດໜື່ງເປັນພິເສດ. ແຮງງານທຸກຄົນຕ້ອງໄດ້ຜ່ານການເສັງຄັດເລືອກດ້ານພື້ນຖານພາສາເກົາຫຼີ ແລະ ສອບສຳພາດຜ່ານທາງດ້ານທັກສະ ເພື່ອປະກອບເປັນຄະແນນໃຫ້ໄດ້ຕາມມາດຖານ ຕາມການກຳນົດຂອງ ສ.ເກົາຫຼີ.

ຜູ້ອອກແຮງງານລາວທີ່ໄດ້ຮັບອະນຸຍາດໄປເຮັດວຽກຢູ່ ສ.ເກົາຫຼີ ຜ່ານລະບົບອະນຸຍາດການຈ້າງງານ ສາມາດເຊັນສັນຍາຈ້າງງານເບື້ອງຕົ້ນໄດ້ສູງສຸດ3ປີ. ຖ້າຫາກຜູ້ອອກແຮງງານເຮັດວຽກກັບຜູ້ໃຊ້ແຮງງານຄົນເກົາຈົນຄົບ 3 ປີ ກໍ່ສາມາດເລືອກທີ່ຈະຕໍ່ສັນຍາຈ້າງງານໄດ້ຕື່ມອີກ 1 ປີ 10ເດືອນ. ນອກຈາກນັ້ນ, ຜູ້ທີ່ເຮັດວຽກຢ່າງຫ້າວກັນ ໂດຍບໍ່ໄດ້ປ່ຽນຜູ້ໃຊ້ແຮງງານ ກໍ່ສາ ມາດກັບເຂົ້າປະເທດ ສ.ເກົາຫຼີ ໄດ້ອີກ ແລະເຮັດວຽກໄດ້ສູງສຸດຮອດ9ປີ 8 ເດືອນ.

ການຈັດສົ່ງຜູ້ອອກແຮງງານລາວໄປເຮັດວຽກຢູ່ໃນຂະແໜງອຸດສາຫະກຳແມ່ນຈັດຕັ້ງປະຕິບັດຕັ້ງແຕ່ປີ 2017. ເພື່ອເປັນການຂະຫຍາຍຂົງເຂດຂອງການເຮັດວຽກໃຫ້ກັບຜູ້ອອກແຮງງານລາວສາມາດເຮັດວຽກໃນຂະແໜງອື່ນເຊັ່ນຂະແໜງກະສິກຳ ແລະ ລ້ຽງສັດ, ກະຊວງແຮງງານ ແລະ ສະຫວັດດີການ ສັງຄົມໄດ້ມີການສະເໜີຕໍ່ລັດຖະບານ ສ.ເກົາຫຼີ ໃຫ້ເພີ່ມຂະແໜງການກະສິກຳ ແລະ ລ້ຽງສັດ ເພື່ອໃຫ້ຜູ້ອອກແຮງງານລາວໄດ້ສະໝັກ. ສະນັ້ນເລີ່ມຕ່ປີ2024 ເປັນຕົ້ນໄປ ຜູ້ອອກແຮງງານລາວ ກໍ່ສາມາດສະໝັກໄປເຮັດວຽກຢູ່ ສ.ເກົາຫຼີ ໃນຂະແໜງກະສິກຳ ແລະ ລ້ຽງສັດ ພາຍໃຕ້ລະບົບການອະນຸຍາດຈ້າງງານ (EPS) ໄດ້.

ຜູ້ອອກແຮງງານລາວທີ່ມີລາຍຊື່ໃນລະບົບອະນຸຍາດການຈ້າງງານ ເພື່ອລໍຖ້າໃຫ້ຜູ້ໃຊ້ແຮງງານລັດເລືອກ ແມ່ນຜູ້ທີ່ເສັງຜ່ານພາສາເກົາຫຼີ (ຮອບທີ 1) ແລະ ຜ່ານຮອບເສັງທັກສະ(ຮອບທີ 2). ໃນປີ2024ມີກຳໜົດການສອບເສັງໄປເຮັດວຽກຢູ່ ສ.ເກົາຫຼີ ທັງໝົດ 3 ຄັ້ງ. ຄັ້ງທີ 1 ໄດ້ສຳເລັດການສອບເສັງພາສາເກົາຫຼີ ແລະເສັງທັກສະໃນເດືອນ4ທີ່ຜ່ານມາ, ຄັ້ງທີ2 ຈະມີການສອບເສັງພາສາເກົາຫຼີໃນເດືອນ 6 ແລະ ສອບເສັງທັກສະໃນກາງເດືອນ7 ແລະ ຄັ້ງທີ 3 ສອບເສັງພາສາເກົາຫຼີໃນເດືອນ 9 ແລະ ສອບເສັງທັກສະໃນກາງເດືອນ 10. ສຳລັບຜູ້ອອກແຮງງານລາວ ທີ່ມີຄວາມສົນໃຈຢາກສອບເສັງພາສາເກົາຫຼີໃນຄັ້ງທີ 2 ແມ່ນສາມາດມາລົງທະບຽນສອບເສັງໃນວັນທີ 6 ຫາ10 ເດືອນ5 ທີ່ກະຊວງແຮງງານ ແລະ ສະຫວັດດີການສັງຄົມ.

ທ່ານ ນາງ ຈີວອນ ແພັກ, ຫົວໜ້າສູນ EPS ປະຈຳປະເທດລາວໄດ້ກ່າວວ່າ: “ປີນີ້ແຮງງານລາວຈະຖືກຈ້າງງານໃນຂະແໜງກະສິກຳ ແລະ ລ້ຽງສັດເປັນຄັ້ງທຳອິດ ເຊິ່ງປະເທດລາວເອງກໍເປັນປະເທດແຫ່ງກະສິກຳ. ດັ່ງນັ້ນ, ຈຶ່ງເປັນໂອກາດທີ່ດີສຳລັບແຮງງານລາວທີ່ຈະໄດ້ຮຽນຮູ້ເທັກໂນໂລຢີກະສິກຳຂອງເກົາຫຼີ ແລະທາງເຮົາເອງກໍຈະສະໜັບສະໜູນການຈ້າງງານຢ່າງຂະຫຍັນຂັນແຂງ”. ນອກຈາກນີ້, ລະບົບອະນຸຍາດການຈ້າງງານດຳເນີີນການໂດຍຂະບວນການຂອງລັດຖະບານ ດັ່ງນັ້ນ, ອົງກອນເອກະຊົນຈຶ່ງບໍ່ສາມາດຈັດຫາງານໃນປະເທດເກົາຫຼີພາຍໃຕ້ລະບົບອະນຸຍາດການຈ້າງງານໄດ້ ແລະຂໍເນັ້ນວ່າຖ້າມີອົງກອນໃດບອກວ່າສາມາດຊ່ວຍໃຫ້ໄດ້ວຽກຜ່ານລະບົບອະນຸຍາດການຈ້າງງານແມ່ນບໍ່ແມ່ນຄວາມຈິງ ຖ້າມີຄຳຖາມທີ່ສົງໄສແມ່ນສາມາດສອບຖາມຂໍ້ມູນກັບສູນ EPS ຫຼື ກົມການຈັດຫາງານໄດ້.