ທ່ານ ນາງ ດາວວວອນ ໄຊສຸລຽນ ເຈົ້າເມືອງໆໄຊພູທອງ ໄດ້ລາຍງານ ໃນໂອກາດ ການຢ້ຽມຢາມ ແລະ ຕິດຕາມວຽກງານໂຄງການຊ່ວຍເຫລືອຈາກອົງການສະຫະປະຊາຊາດ ຂອງ ທ່ານ ບາໂກເດຍ ບູຄານອບ (Bakhodir Burkhanov) ຫົວໜ້າອົງການສະຫະປະຊາຊາດ ປະຈໍາລາວ ວັນທີ 18 ກໍລະກົດ 2024ນີ້ວ່າ: ອົງການສະຫະປະຊາຊາດໄດ້ໃຫ້ການຊ່ວຍເຫຼືອ ສ້າງແຜນແມ່ບົດໃນການວາງແຜນຜັງເມືອງ, ການຄຸ້ມຄອງນໍາໃຊ້ທີ່ດິນ ກໍຄື ການວາງແຜນພັດທະນາເສດຖະກິດ-ສັງຄົມ, ໂດຍມີວຽກຊ່ວຍເຫຼືອກໍ່ສ້າງໂຄງລ່າງພື້ນຖານ ປະກອບມີ 2 ໄລຍະຄື: ໄລຍະທີ 1 ແມ່ນວຽກການກໍ່ສ້າງສະຖານີດູດນໍ້າດິບ ຮ່ວມກັບວຽກການກໍ່ສ້າງປ້ອງກັນຕາຝັ່ງເຈື່ອນ ມີໄລຍະເວລາການກໍ່ສ້າງ 8 ເດືອນ, ມີມູນຄ່າຫຼາຍກວ່າ 325,000 ໂດລາສະຫະລັດ ປັດຈຸບັນ, ກໍ່ສ້າງສໍາເລັດແລ້ວ 100% ແລະ ໄລຍະທີ 2 ແມ່ນວຽກການກໍ່ສ້າງໂຮງງານຜະລິດນໍ້າປະປາ ຂະໜາດ 3,600 ແມັດກ້ອນຕໍ່ວັນ, ວຽກງານການກໍ່ສ້າງອ່າງເກັບນໍ້າ 400 ແມັດກ້ອນ ແລະວຽກງານການກໍ່ສ້າງສະຖານີສົ່ງນໍ້າສະອາດ 260 ແມັດກ້ອນ, ມີໄລຍະເວລາການກໍ່ສ້າງ 12 ເດືອນ, ຊຶ່ງປະຕິບັດໄດ້ແລ້ວເກືອບ 65%, ມີມູນຄ່າການກໍ່ສ້າງຫຼາຍກວ່າ 1 ລ້ານໂດລາສະຫະລັດ.
ຕາມການປະເມີນວຽກງານທັງ 2 ໄລຍະນີ້ ຈະສາມາດສ້າງຜົນປະໂຫຍດກວມເອົາຂອບເຂດຂອງໂຄງການ ຈໍານວນ 16 ບ້ານ, 4,643 ຄອບຄົວ, ມີປະຊາກອນ 24,143 ຄົນ ເຊິ່ງກວມເອົາ ຫຼາຍກວ່າ44% ຂອງຈໍານວນປະຊາກອນພາຍໃນເມືອງ ທີ່ຈະສາມາດນໍາໃຊ້ນໍ້າປະປາໄດ້ຕະຫຼອດ 24 ຊົ່ວໂມງ. ເຊິ່ງການຊ່ວຍເຫຼືອຄັ້ງນີ້ ເປັນການປະກອບສ່ວນທີ່ສໍາຄັນ ແລະ ໃຫຍ່ຫຼວງໃນການພັດທະນາເມືອງໄຊພູທອງ.
