ໂຄງການນໍ້າໃຈມິດຕະພາບ ລາວ-ໄທ ຊ່ວຍໄພພິບັດນໍ້າຖ້ວມ 2024 ຢູ່ ສປປ ລາວ ໄດ້ນຳເອົາຢາປົວພະຍາດ, ຖົງບັນເທົາທຸກ ແລະ ເຄື່ອງບໍລິໂພກ ລວມມູນຄ່າ 5.200.000 ບາດ ມາມອບໃຫ້ ກະຊວງແຮງງານ ແລະ ສະຫວັດດີການສັງຄົມ ໃນວັນທີ 2 ຕຸລາ 2024 ຕາງໜ້າມອບໂດຍ ທ່ານ ພິພັດພົນ ສາຣະໂນທະຍານ ຜູ້ກໍ່ຕັ້ງ ແລະ ສະໜັບສະໜູນໂຄງການ, ທັງເປັນປະທານບໍລິສັດປະທະມາວັດ ປີໂຕຣລຽນ ລາວ ແລະ ຮັບໂດຍ ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ທັງເປັນຮອງປະທານຄະນະກຳມະການຄຸ້ມຄອງໄພພິບັດຂັ້ນສູນກາງ ໂດຍມີພາກສ່ວນກ່ຽວຂ້ອງ ທັງສອງຝ່າຍ ເຂົ້າຮ່ວມເປັນສັກຂີພິຍານ.
ເຄື່ອງຊ່ວຍເຫລືອ ທີ່ໄດ້ຮັບໃນຄັ້ງນີ້, ປະກອບມີ: ຢາປົວພະຍາດ 520 ແກັດ, ຖົງບັນເທົາທຸກ 368 ຖົງ, ນໍ້າດື່ມ 420 ແພັກ, ເຂົ້າເປົານ້ອຍ 5 ເປົາ, ເຂົ້າເປົາໃຫ່ຍ 5 ເປົາ ລວມມູນຄ່າ ທັງໝົດ 5.200.000 ບາດ.
ໂອກາດດັ່ງກ່າວ, ທ່ານ ນາງ ໃບຄຳ ຂັດທິຍະ ໄດ້ສະແດງຄວາມຂອບໃຈ ຕໍ່ໂຄງການນໍ້າໃຈມິດຕະພາບ ລາວ-ໄທ ພ້ອມດ້ວຍຄະນະ ທີ່ມີນ້ຳຈິດນ້ຳໃຈຊ່ວຍເຫລືອໄພພິບັດ ນຳເອົາຢາປົວພະຍາດ ແລະ ເຄື່ອງບໍລິໂພກ ມາມອບໃຫ້ ໃນຄັ້ງນີ້, ພ້ອມທັງຢືນຢັນວ່າ ຈະນໍາເອົາເຄື່ອງຈໍານວນດັ່ງກ່າວ, ໄປຊ່ວຍເຫລືອຜູ້ທີ່ໄດ້ຮັບຜົນກະທົບ ຈາກໄພນໍ້າຖ້ວມ ຢູ່ບັນດາແຂວງ ໃນຂອບເຂດທົ່ວປະເທດ ຢ່າງທົ່ວເຖິງ. ສຳລັບຢາປົວພະຍາດ ທີ່ໄດ້ຮັບໃນຄັ້ງນີ້, ໄດ້ມອບໃຫ້ກະຊວງສາທາລະນະສຸກ ເປັນຜູ້ຈັດສົ່ງແຈກຢາຍ ໃຫ້ບັນດາແຂວງ ທີ່ຖືກຜົນກະທົບຈາກໄພນ້ຳຖ້ວມ ຢ່າງທົ່ວເຖິງ.
ທີ່ມາ: ຂປລ.
