ໂຄງການບັນທຶກຄວາມຮັກແພງຕາມເສັ້ນທາງລົດໄຟລາວ-ຈີນ

ເນື່ອງໃນໂອກາດການເປີດນຳໃຊ້ເສັ້ນທາງລົດໄຟລາວ-ຈີນຄົບຮອບ 1 ປີ, ວັນທີ 8 ພະຈິກ 2022. ໂຄງການບັນທຶກຄວາມຮັກແພງຕາມເສັ້ນທາງລົດໄຟລາວ-ຈີນທີ່ມີ ວິທະຍຸໂທລະພາບສູນກາງຈີນ FM93 ແລະສະມາຄົມນັກປະພັນລາວ ເປັນເຈົ້າພາບນັ້ນ ໄດ້ຈັດພິທີເລີ່ມໂຄງການຢູ່ທີ່ນະຄອນຫຼວງວຽງຈັນ ໂດຍເປັນກຽດເຂົ້າຮ່ວມພິທີມີ ທ່ານໂພສີ ແກ້ວມະນີວົງ (Phosy Keomanivong) ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວລາວ,ທ່ານບົວເງິນຊາພູວົງ(Buageun saphouvong)ປະທານສະມາຄົມສິລະປິນແຫ່ງຊາດລາວ,ຄະນະກຳມະການສະມາຄົມມິດຕະພາບລາວ-ຈີນ,

ໃນພິທີເປີດໂຄງການດັ່ງກ່າວ, ທ່ານໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ ລາວກ່າວວ່າ: ໃນເວລາ 10 ກວ່າວັນຕໍ່ໜ້ານີ້, ນັກປະພັນ, ນັກກະວີ, ນັກຖ່າຍພາບ, ນັກແຕ້ມ ແລະນັກຂ່າວລາວ ລວມປະມານ 30 ທ່ານຈະເດີນທາງໂດຍລົດໄຟລາວ-ຈີນ ເພື່ອເອົາປະສົບການກ່ຽວກັບການປ່ຽນແປງດ້ານຊີວິດການເປັນຢູ່ຂອງປະຊາຊົນທີ່ຢູ່ອາໄສຕາມເສັ້ນທາງລົດໄຟສາຍນີ້ ແລ້ວປະດິດແຕ່ງຜົນງານທີ່ກ່ຽວຂ້ອງ ປະກາດຜ່ານທາງໜ້າເພດເຟບຸກຂອງວິທະຍຸໂທລະພາບສູນກາງຈີນ FM93 ຄື: cri-fm93 ແລະ ໜ້າແວັບໄຊພາສາລາວ: laos@cri.cn ກໍ່ຄືສື່ຕ່າງໆຂອງຝ່າຍລາວ. ນອກນີ້ ຜົນງານດີເດັ່ນຂອງບັນດາທ່ານຍັງຈະຮັບການຄັດເລືອກ ແລະຮຽບຮຽງໃຫ້ເປັນປື້ມ ເພື່ອພິມຈຳໜ່າຍໃນເດືອນເມສາປີໜ້າ ເພື່ອເປັນການສະເຫຼີມສະຫຼອງການສະເໜີຂໍ້ລິເລີ່ມ ໜຶ່ງແລວໜຶ່ງເສັ້ນທາງ ຄົບຮອບ 10 ປີ.

ທ່ານ ບົວເງິນ ຊາພູວົງ ປະທານສະມາຄົມສິລະປິນແຫ່ງຊາດລາວ, ຄະນະກຳມະການສະມາຄົມມິດຕະພາບລາວ-ຈີນ,ອະດີດຮອງລັດຖະມົນຕີກະຊວງຖະແຫຼງຂ່າວ,ວັດທະນະທຳແລະທ່ອງທ່ຽວໄດ້ກ່າວວ່າ: ນັບວ່າເປັນໂຄງການທຳອິດຂອງນັກປະພັນລາວເຮົາທີ່ຈະໄດ້ຝົນປາຍປາກກາພັນລະນາໃຫ້ເຫັນເຖິງຜົນປະໂຫຍດທີ່ຊາດແລະປະຊາຊົນລາວ,ນັບທັງປະຊາຊາດໃນອາຊຽນແລະໃນໂລກໄດ້ຮັບຜົນປະໂຫຍດໃນການເດີນທາງຜ່ານທາງລົດໄຟລາວ-ຈີນຢ່າງສະດວກສະບາຍ. ໃນປະຫວັດສາດລາວຕະຫຼອດໄລຍະຜ່ານມາຍັງບໍ່ເຄີຍມີທາງລົດໄຟທີ່ສວຍງາມສະດວກສະບາຍຄືແນວນີ້,ອັນນີ້ແມ່ນສະແດງເຖິງຜົນງານຂອງພັກແລະລັດຖະບານລາວກໍຄືລະບອບໃໝ່ຂອງພວກເຮົາທີ່ຍາມໃດກໍຍຶດໝັ້ນຕໍ່ພັກ,ລັດຖະບານແລະປະຊາຊົນຈີນແມ່ນເພື່ອນມິດຍຸດທະສາດທີ່ໝັ້ນຄົງຍາວນານ,ລາວ-ຈີນກາຍເປັນຄູ່ຮວ່ມຊາຕາກຳອັນດຽວກັນຕະຫຼອດໄປ.

ທ່ານ ທອງໃບ ໂພທິສານ, ປະທານສະມາຄົມນັກປະພັນລາວກ່າວວ່າ:ໃນຕະຫຼອດໄລຍະຂອງການເດີນທາງທາງລົດໄຟທີ່ຍາວໄກເຕັມໄປດ້ວຍບັນຍາ ກາດທີ່ຕື່ນເຕັ້ນ ຄຶກຄື້ນ ຟົດຟື້ນ ແລະ ມ່ວນຊື່ນໃນຄັ້ງນີ້ ບັນດານັກປະພັນນັກກະວີທັງໝົດ ຈະໄດ້ສໍາຜັດກັບເຫດການຕົວຈິງຜ່ານ 5 ແຂວງທີ່ແລວທາງລົດໄຟລາວ-ຈີນຜ່ານ ເປັນຕົ້ນ: ນະຄອນຫຼວງວຽງຈັນ, ແຂວງວຽງຈັນ, ຫຼວງພະບາງ, ອຸດົມໄຊ ແລະ ຫຼວງນໍ້າທາ, ສໍາພາດ ແລະ ເກັບກໍາຂໍ້ມູນຕາມສະຖານນີຕ່າງໆ ຢູ່ແຕ່ລະແຂວງ ເພື່ອນໍາມາຂຽນເປັນບົດປະພັນວັນນະຄະດີ: ກະວີ, ບົດບັນທຶກ ແລະ ບົດເລື່ອງສັ້ນ. ພວກເຮົາຄາດຄະເນໄວ້ວ່າ ຜ່ານການເຄື່ອນໄຫວໂຄງການໃນຄັ້ງນີ້ ຈະໄດ້ບົດເລື່ອງທັງໝົດ 15-20 ບົດ ຊຶ່ງທັງໝົດນີ້ ທາງສະຖານີວິທະຍຸໂທລະພາບສູນກາງຈີນປະຈໍາລາວ ຜູ້ເປັນເຈົ້າຂອງໂຄງການຈະໄດ້ທໍາການຮິບໂຮມ ແລະ ຈັດພິມເປັນປຶ້ມ ເພື່ອໂຄສະນາເຜີຍແຜ່ຕໍ່ໄປ.

ທ່ານ ທອງເດີນ ຄຳມະນີ (Thongdeun Khammany) ຮອງຜູ້ອຳນວຍການບໍລິສັດລົດໄຟລາວ-ຈີນກ່າວວ່າ: ເກືອບ 1 ປີຜ່ານມາ, ເສັ້ນທາງລົດໄຟ ຈີນ-ລາວ ໄດ້ເສີມຂະຫຍາຍບົດບາດທີ່ໃຫຍ່ຫຼວງເຂົ້າໃນການອອກເດີນທາງຂອງປະຊາຊົນ, ການສ້າງຄວາມສະດວກໃຫ້ແກ່ເສດຖະກິດການຄ້າແລະດ້ານອື່ນໆ. ນັບມາຮອດປັດຈຸບັນ, ຕອນທາງຄຸນໝິງ-ວຽງຈັນຂອງເສັ້ນທາງລົດໄຟ ຈີນ-ລາວ ໄດ້ຂົນສົ່ງຜູ້ໂດຍສານຫຼາຍກວ່າ 7,5 ລ້ານເທື່ອຄົນ, ໄດ້ຂົນສົ່ງສິນຄ້າ 9,86 ລ້ານໂຕນ, ປະເພດສິນຄ້າໄດ້ເພີ່ມຈາກ 100 ກວ່າປະເພດໃນເບື້ອງຕົ້ນ ເປັນຕົ້ນຝຸ່ນເຄມີ ແລະ ສິນຄ້າຕ່າງໆຂຶ້ນເປັນຫຼາຍກວ່າ 1.200 ປະເພດ ເປັນຕົ້ນເຄື່ອງເອເລັກໂຕຣນິກ, ເຄື່ອງຜະລິດໄຟຟ້າດ້ວຍພະລັງງານແສງອາທິດ ແລະໝາກໄມ້ແຊ່ເຢັນ. ນອກນີ້, ເສັ້ນທາງລົດໄຟ ຈີນ-ລາວ ຍັງໄດ້ຄົ້ນຄວ້າແລະບັນລຸຮູບແບບໃໝ່ແຫ່ງການຂົນສົ່ງສາກົນດ້ວຍເສັ້ນທາງລົດໄຟ ເຊັ່ນ: “ຂະບວນລົດໄຟດ່ວນຂົນສົ່ງສິນຄ້າ ແມ່ນ້ຳລ້ານຊ້າງ-ແມ່ນ້ຳຂອງ+ການຄ້າເອເລັກໂຕຣນິກຂ້າມຊາດ”, “ເສັ້ນທາງລົດໄຟຈີນ-ລາວ+ຂະບວນລົດໄຟດ່ວນຈີນ-ເອີຣົບ” ແລະອື່ນໆ, ເພີ່ມທະວີປະສິດທິຜົນການເປີດກວ້າງຜົນປະໂຫຍດແລະຄວາມສາມາດດ້ານການຂົນສົ່ງສິນຄ້າຂ້າມຊາດ.

ນາງ ແສງແກ້ວ (MO XiaoLing) ຫົວໜ້າ ສະຖານີວິທະຍຸໂທລະພາບສູນກາງຈີນ (CMG)ປະຈຳລາວ ກ່າວວ່າ: ຍັງອີກບໍ່ຮອດໜຶ່ງເດືອນ, ກໍຈະເປັນການຄົບຮອບໜຶ່ງປີແຫ່ງການເປີດນໍາໃຊ້ເສັ້ນທາງລົດໄຟລາວ-ຈີນ. ຍ້ອນໄດ້ເຮັດວຽກກ່ຽວກັບສື່ມວນຊົນ ຂ້າພະເຈົ້າໄດ້ມີໂອກາດເຂົ້າຮ່ວມການລາຍງານຂ່າວກ່ຽວກັບການທົດລອງຂີ່ລົດໄຟສາຍນີ້ ແລະໄດ້ເປັນສັກຂີພະຍານໃຫ້ກັບການເລີ່ມນໍາໃຊ້ເສັ້ນທາງລົດໄຟສາຍນີ້. ໃນໂອກາດການແລ່ນລົດຄົບຮອບ 100 ວັນ, ຂ້າພະເຈົ້າກໍໄດ້ເຂົ້າຮ່ວມການວາງແຜນຈັດການຖ່າຍທອດສົດແບບ SLOW TV ຢູ່ສະຖານີລົດໄຟນະຄອນຫຼວງວຽງຈັນ ແລະສະຖານີລົດໄຟຄຸນມິງແຂວງຢຸນນານຈີນ… ໃນຕະຫຼອດເວລາເກືອບໜຶ່ງປີມານີ້ ເສັ້ນທາງລົດໄຟລາວ-ຈີນໄດ້ກາຍເປັນຂ່າວດັງແລະເດັ່ນທີ່ສຸດໃນລາຍການອອກຂ່າວຕ່າງໆຂອງ ວິທະຍຸໂທລະພາບສູນກາງຈີນ ພວກເຮົາ.

ຫວ່າງບໍ່ດົນມານີ້, ໃນເວລາສຳພາດທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ, ໃນເວລາເພິ່ນກ່າວເຖິງ ເສັ້ນທາງລົດໄຟສາຍທຳອິດຂອງ ສປປ ລາວເສັ້ນນີ້, ເພີ່ນດີໃຈເປັນພິເສດ,ເຊິ່ງ ພາບຄວາມດີໃຈຕື່ນເຕັ້ນຂອງເພິ່ນ ໄດ້ສ້າງຄວາມປະທັບໃຈຫຼາຍທີ່ສຸດໃຫ້ກັບຂ້າພະເຈົ້າ, ເລີຍເຮັດໃຫ້ຂ້າພະເຈົ້າໄດ້ຄິດເຖິງວ່າ ເຄີຍມີຜູ້ຟັງເຮົາຖາມວ່າ, ເສັ້ນທາງລົດໄຟລາວ-ຈີນແມ່ນເສັ້ນທາງລົດໄຟແບບໃດແທ້? ສ່ວນຂໍ້ມູນຕ່າງໆຂອງເສັ້ນທາງລົດໄຟລາວ-ຈີນນີ້ ຂ້າພະເຈົ້າຈະບໍ່ກ່າວຊ້ຳອີກລະ. ເວົ້າສຳລັບຂ້າພະເຈົ້າເອງແລ້ວ, ເສັ້ນທາງລົດໄຟລາວ-ຈີນ ກໍແມ່ນເສັ້ນທາງລົດໄຟທີ່ທ່ານທອງລຸນ ສີສຸລິດກ່າວໃນມື້ຈັດພິທີເປີດນຳໃຊ້ນັ້ນວ່າ ແມ່ນເສັ້ນທາງທີ່ເຮັດໃຫ້ຄວາມໄຝ່ຝັນບັນລຸເປັນຈິງ, ແມ່ນເສັ້ນທາງລົດໄຟທີ່ເປັນລາງມາດຕະຖານເສັ້ນທຳອິດໃນປະຫວັດສາດຂອງລາວ, ແມ່ນເສັ້ນທາງລົດໄຟທີ່ທ່ານສີຈິ້ນຜິງກ່າວໃນພິທີເປີດວ່າ ເປັນເສັ້ນທາງທີ່ເຮັດໃຫ້ການໄປມາຫາສູ່ກັນລະຫວ່າງສອງຊາດລາວ-ຈີນ 山不再高，水不再长 ແປເປັນພາສາລາວວ່າ “ພູຈະບໍ່ສູງອີກ ນ້ຳຈະບໍ່ເລິກອີກ” , ທັງເປັນເສັ້ນທາງທີ່ເຮັດໃຫ້ມິດຕະພາບອັນເປັນມູນເຊື້ອລະຫວ່າງລາວ-ຈີນກ້າວເດີນໄປໜ້າອີກຄັ້ງໃໝ່, ເຮັດໃຫ້ການຮ່ວມມືລາວ-ຈີນກ້າວສູ່ເສັ້ນທາງວ່ອງໄວຂຶ້ນ.

ຄົນຈີນມັກເວົ້າວ່າ: “ຢາກຮັ່ງມີ ຕ້ອງສ້າງທາງກ່ອນ” ແລະ “ພໍແຕ່ມີລົດໄຟໄປເຖິງ ເງິນຄຳກໍຈະຫຼັ່ງໄຫຼເຂົ້າມາ”. ເສັ້ນທາງລົດໄຟລາວ-ຈີນນີ້ ເຮັດໃຫ້ການພົວພັນລະຫວ່າງລາວ-ຈີນຍິ່ງແໜ້ນແຟ້ນກວ່າເກົ່າ, ສາມາດເວົ້າໄດ້ວ່າ ເປັນເສັນທາງແຫ່ງມິດຕະພາບ, ແຫ່ງການຮ່ວມມື ແລະການພັດທະນາ, ເປັນເສັ້ນທາງທີ່ນຳເອົາປະຊາຊົນສອງຊາດລາວ-ຈີນກ້າວສູ່ອະນາຄົດທີ່ສວຍງາມກວ່າເກົ່າ!

ສະຖານີວິທະຍຸໂທລະພາບສູນກາງຈີນປະຈຳລາວ ຮ່ວມມືກັບສະມາຄົມນັກປະພັນລາວ ຈັດໂຄງການບັນທຶກຄວາມຮັກແພງຕາມເສັ້ນທາງລົດໄຟລາວ-ຈີນນີ້ ກໍແມ່ນຫວັງຢາກຜ່ານໂຄງການເຮົາ ເຮັດໃຫ້ຄົນຮູ້ຈັກເສັ້ນທາງນີ້ຫຼາຍຂຶ້ນ, ໃຫ້ຄົນທັງຫຼາຍສາມາດໄດ້ເຫັນທິວທັດທີ່ສວຍງາມ ແລະໄດ້ຮູ້ເລື່ອງລາວທີ່ກະຕຸ້ນໃຈຢູ່ຕາມເສັ້ນທາງລົດໄຟສາຍນີ້, ເຮັດໃຫ້ຄົນຈີນ ຄົນລາວ ກໍຄື ປະຊາຊົນໃນທົ່ວໂລກ ໄດ້ມາຂີ່ລົດໄຟສາຍນີ້ ມາສໍາຜັດຕົວຈິງ ແລະເກີດມີຄວາມມັກຮັກຕໍ່ເສັ້ນທາງລົດໄຟສາຍນີ້.

ຂ້າພະເຈົ້າມີຄວາມພາກພູມໃຈທີ່ເຫັນວ່າ, ໂຄງການນີ້ກຳລັງໄດ້ດຳເນີນໄປໃນສະພາບທີ່ທັງສອງປະເທດມີຜົນສຳເລັດໃນຫຼາຍດ້ານຮວ່ມກັນ ແລະພາຍຫຼັງມີການນໍາໃຊ້ເສັ້ນທາງລົດໄຟລາວ-ຈີນເປັນຕົ້ນມາ ຍິ່ງເຮັດໃຫ້ຄວາມເຊື່ອໝັ້ນແລະຄວາມໄວ້ເນື້ອເຊື່ອໃຈກັນຂອງທັງສອງປະເທດຍິ່ງຮັດ

ແໜ້ນຂື້ນຕື່ມ ແລະເປັນສິ່ງທີ່ບໍ່ອາດຕັດແຍກອອກຈາກກັນໄດ້ຂອງການພົວພັນລະຫວ່າງລາວແລະຈີນ.

ວິທະຍຸສາກົນແຫ່ງປະເທດຈີນ(CRI)ໃນເມື່ອກ່ອນ, ກໍຄືສະຖານີວິທະຍຸໂທລະພາບສູນກາງຈີນ(CMG)ໃນປັດຈຸບັນແມ່ນພາກສວ່ນໜຶ່ງຂອງຂົວຕໍ່ສາຍສຳພັນລາວ-ຈີນໃຫ້ສືບຕໍ່ໝັ້ນໜຽວທົນທານຕະຫຼອດໄປ, ໂຄງການບັນທຶກຄວາມຮັກແພງຕາມເສັ້ນທາງລົດໄຟລາວ-ຈີນກໍແມ່ນໂຄງການໜຶ່ງຂອງຫຼາຍໆໂຄງການ ທີ່ສະຖານີວິທະຍຸໂທລະພາບສູນກາງຈີນໄດ້ຮວ່ມກັນຈັດຂື້ນຢູ່ສປປລາວ ແນໃສ່ເສີມຂະຫຍາຍສາຍພົວພັນອັນເປັນມູນເຊື້ອອັນດີງາມຂອງສອງປະເທດໃຫ້ຂະຫຍາຍຕົວໄປຢ່າງບໍ່ຢຸດຢັ້ງ.