ໂຄງການພັດທະນາເຂດເສດຖະກິດໃໝ່ສີທັນດອນປະກອບສ່ວນສໍາຄັນຕໍ່ການພັດທະນາເສດຖະກິດຂອງເມືອງໂຂງ
ໂຄງການພັດທະນາເຂດເສດຖະກິດໃໝ່ສີທັນດອນ ໄດ້ປະ ກອບສ່ວນຊ່ວຍເຫລືອເມືອງໂຂງ, ແຂວງຈໍາປາສັກ ຫລາຍຢ່າງ ເຊິ່ງເປັນການປະກອບສ່ວນສໍາຄັນຕໍ່ການພັດທະນາເດສຖະກິດ -ສັງຄົມຂອງເມືອງ. ຂະນະທີ່ອົງການປົກຄອງເມືອງ ເຊື່ອໝັ້ນວ່າ ໂຄງການດັ່ງກ່າວຈະປະກອບສ່ວນໃນການພັດທະນາເສດຖະກິດ- ສັງຄົມຂອງເມືອງໂຂງນັບມື້ຫລາຍຂຶ້ນກວ່າເກົ່າ.
ທ່ານ ນາງ ຄຳພູ ສິດທິສັກ ເຈົ້າເມືອງໆ ໂຂງ ແຂວງຈຳປາສັກ ໃຫ້ສໍາພາດຕໍ່ສື່ມວນຊົນລາວ ເມື່ອບໍ່ດົນມານີ້ວ່າ: ໃນໄລຍະຜ່ານ ມາ, ໂຄງການພັດທະນາເຂດເສດ ຖະກິດໃໝ່ສີທັນດອນ ເຊິ່ງຕັ້ງຢູ່ເຂດເມືອງໂຂງ ໄດ້ໃຫ້ການຊ່ວຍເຫຼືອເມືອງໂຂງ ຫລາຍຢ່າງ ເປັນ ຕົ້ນ: ໄດ້ຊ່ວຍເຫລືອກໍ່ສ້າງເສັ້ນທາງເບຕົງອ້ອມດອນໂຂງ, ມີຄວາມຍາວ 43 ກິໂລແມັດ ແລະ ສ້າງຂົວ, ລວມມີມູນຄ່າທັງໝົດ 12 ລ້ານໂດລາ, ພາຍຫຼັງສ້າງສຳເລັດໄດ້ມອບໃຫ້ເມືອງໃນປີ 2019 ຜ່ານມາ, ພ້ອມນີ້ ໄດ້ປະກອບສ່ວນກໍ່ສ້າງໂຮງຮຽນປະຖົມສົມບູນບ້ານຂີ້ນາກ, ໃຫ້ການຊ່ວຍເຫຼືອແກ່ຄອບຄົວຜູ້ທີ່ຖືກຜົນກະທົບ ຈາກໄພພິບັດທຳມະຊາດທີ່ເຂດບ້ານຫົວໂຂງ, ບ້ອນດອນສັນ ແລະ ບ້ານອື່ນໆ. ໃນໄລຍະມີການລະບາດພະຍາດໂຄວິດ-19 ທາງບໍລິສັດໄດ້ມອບອຸປະກອນ ແລະ ງົບປະມານຈຳນວນໜຶ່ງຊ່ວຍເຫຼືອ ໃຫ້ແກ່ທາງເມືອງໂຂງ.
ນອກຈາກນີ້ ໃນໄລຍະຜ່ານມາ, ຂະແໜງການທີ່ກ່ຽວຂ້ອງຂອງເມືອງ ໄດ້ສົມທົບກັບ ຄະນະກຳມະການຂັ້ນແຂວງ ແລະ ພາກສ່ວນທີ່ກ່ຽວຂ້ອງຕະຫຼອດຮອດອົງການປົກຄອງບ້ານ ໄດ້ເຮັດວຽກການເມືອງແນວຄິດໃຫ້ແກ່ປະຊາຊົນທີ່ຖືກຜົນກະທົບຈາກໂຄງການ ໂດຍລວມປະຊາຊົນກໍເຫັນດີເຫັນພ້ອມ ແລະ ໃຫ້ ການຮ່ວມມືເຂົ້າ ຮ່ວມໃນການພັດທະນາໂຄງການດັ່ງກ່າວ, ໃນນັ້ນ ໄດ້ເອົາໃຈໃສ່ໃນການໂຕ້ຕອບ ໃນສື່ສັງຄົມອອນລາຍ ໂດຍໄດ້ມອບຄວາມຮັບຜິດຊອບໃຫ້ແກ່ອົງການປົກຄອງໃນບ້ານເປົ້າໝາຍ ແລະ ກຳລັງປ້ອງກັນຄວາມສະຫງົບຂອງເມືອງ ໃນການສຶກສາອົບ ຮົມຜູ້ທີ່ອອກຂ່າວບໍ່ມີມູນຄວາມຈິງ ເຮັດໃຫ້ສະພາບການມີຄວາມສະຫງົບດີ ແລະ ປະຊາຊົນໄດ້ໃຫ້ການຮ່ວມມືກັບໂຄງການເປັນຢ່າງດີ.
ທ່ານ ເຈົ້າເມືອງໆ ໂຂງ ໃຫ້ຮູ້ຕື່ມວ່າ: ໃນໄລຍະກໍ່ສ້າງບັນດາໂຂງການທີ່ນອນໃນໂຄງການພັດທະນາເຂດເສດຖະກິດໃໝ່ສີທັນ ດອນ ໃນປັດຈຸບັນ ໄດ້ສ້າງວຽກເຮັດງານທໍາໃຫ້ປະຊາຊົນພາຍໃນເມືອງໂຂງຫລາຍຮ້ອຍຄົນ ແລະ ຄາດວ່າຈໍານວນແຮງ ງານພາຍໃນເມືອງຈະມີວຽກເຮັດງານທໍາຈາກໂຄງການດັ່ງກ່າວນັບມືຫລາຍຂຶ້ນ ໂດຍສະເພາະພາຍ ຫຼັງທີ່ທ່ານເຈົ້າແຂວງລົງມາຊີ້ນຳບໍລິສັດກໍໄດ້ແຈ້ງການຫາເມືອງ ເພື່ອຮອງຮັບແຮງງານເຂົ້າບັນຈຸທີ່ໂຮງງານແປຮູບປາ ຊຶ່ງມີຄວາມຕ້ອງການແຮງງານປະ ມານ 300 ຄົນ, ຄາດວ່າໂຮງງານຈະສ້າງໃຫ້ສຳເລັດໃນທ້າຍປີ 2024 ຊຶ່ງຈະເປັນ ການສ້າງວຽກເຮັດງານທຳໃຫ້ແກ່ປະຊາຊົນພາຍໃນເມືອງໄດ້ເປັນຢ່າງດີ ແລະ ສ້າງຊີວິດການເປັນຢູ່ໃຫ້ປະຊາຊົນນັບມື້ນັບດີຂຶ້ນເລື້ອຍໆ, ຕໍ່ກັບຄອບຄົວຜູ້ໄດ້ຮັບການຊົດເຊີຍທາງເມືອງຍັງໄດ້ເນັ້ນໃຫ້ປະຊາຊົນຈົ່ງນຳໃຊ້ເງິນທີ່ໄດ້ຮັບການຊົດເຊີຍນັ້ນໄປໝູນ ໃຊ້ໃຫ້ມີຜົນປະໂຫຍດ ແລະ ມີຄວາມຍືນຍົງ ເພື່ອໃຫ້ຊີວິດການເປັນຢູ່ດີຂຶ້ນເລື້ອຍໆ, ພ້ອມນີ້ ຍັງເຊື່ອໝັ້ນວ່າ ໂຄງການດັ່ງກ່າວນີ້ ຈະປະກອບສ່ວນສໍາຄັນໃນການພັດທະ ນາເສດຖະກິດ-ສັງຄົມຂອງເມືອງໂຂງ ນັບມື້ຫລາຍຂຶ້ນກວ່າເກົ່າ.
