ໂດຍ: ສຳນານ ພົມພັກດີ
ໂຄງການພັດທະນາເຂດເສດຖະກິດໃໝ່ສີທັນດອນ ເປັນອີກໜຶ່ງໂຄງການຈະຊ່ວຍເຮັດໃຫ້ການພັດ ທະນາເສດຖະກິດ-ສັງຄົມຂອງເມືອງໂຂງ ແຂວງຈຳປາສັກ ມີການຂະຫຍາຍຕົວຂຶ້ນຢ່າງຕໍ່ເນື່ອງ, ໃນຂະນະດຽວກັນຈະຊ່ວຍເຮັດໃຫ້ປະຊາຊົນພາຍໃນເມືອງໄດ້ມີວຽກເຮັດງານທຳທີ່ໝັ້ນຄົງ.
ທ່ານ ນາງ ຄຳພູ ສິດທິສັກ ເຈົ້າເມືອງໆໂຂງ ແຂວງຈຳປາສັກ ໄດ້ໃຫ້ສຳພາດຕໍ່ສື່ມວນຊົນ ຫວ່າງບໍ່ດົນມາວ່າ: ໂຄງການພັດທະນາເຂດເສດຖະກິດໃໝ່ສີທັນດອນຢູ່ ເຂດເມືອງໂຂງ ແຂວງຈຳປາສັກ ຊຶ່ງເປັນໂຄງການໜຶ່ງທີ່ຈະປະກອບສ່ວນເຂົ້າໃນແຜນພັດທະນາເສດຖະກິດ -ສັງຄົມຂອງເມືອງ ໃຫ້ມີການຂະຫຍາຍຕົວຢ່າງຕໍ່ ເນື່ອງ, ທີ່ຜ່ານມາທາງບໍລິສັດ ພັດທະນາສີທັນດອນ ຈຳກັດ ຊຶ່ງເປັນບໍລິສັດພັດທະນາໂຄງການ ກໍໄດ້ໃຫ້ການຊ່ວຍເຫຼືອໃນການສ້າງເສັ້ນທາງຄອນກີດອ້ອມດອນໂຂງ ທີ່ມີຄວາມຍາວ 43 ກິໂລແມັດ ແລະ ສ້າງຂົວ, ລວມມີມູນຄ່າທັງໝົດ 12 ລ້ານໂດລາ, ພາຍຫຼັງສ້າງສຳເລັດກໍໄດ້ມອບໃຫ້ເມືອງໃນປີ 2019 ຜ່ານມາ, ໃນນັ້ນໄດ້ປະກອບສ່ວນກໍ່ສ້າງໂຮງຮຽນປະຖົມສົມບູນບ້ານຂີ້ນາກ, ໃຫ້ການຊ່ວຍເຫຼືອແກ່ຄອບຄົວຜູ້ທີ່ຖືກຜົນກະທົບ ຈາກໄພພິບັດທຳມະຊາດທີ່ເຂດບ້ານຫົວໂຂງ, ບ້ອນດອນສັນ ແລະ ບ້ານອື່ນໆ, ທີ່ຜ່ານມາໃນໄລຍະມີການລະບາດພະຍາດໂຄວິດ-19 ທາງບໍລິສັດກໍ່ໄດ້ມອບອຸປະກອນ ແລະ ງົບປະມານຈຳນວນໜຶ່ງຊ່ວຍເຫຼືອ ໃຫ້ແກ່ທາງເມືອງໂຂງພວກເຮົາ.
ທ່ານກ່າວຕື່ມວ່າ: ໃນການຈັດຕັ້ງປະຕິບັດໂຄງການໂດຍທາງອົງການປົກຄອງເມືອງໄດ້ສົມທົບກັບ ຄະນະກຳມະການຂັ້ນແຂວງ ແລະ ພາກສ່ວນທີ່ກ່ຽວຂ້ອງຕະຫຼອດຮອດອຳນາດການປົກຄອງກໍໄດ້ເຮັດວຽກ ການເມືອງແນວຄິດໃຫ້ແກ່ປະຊາຊົນທີ່ຖືກຜົນກະທົບຈາກໂຄງການ ໂດຍລວມປະຊາຊົນກໍເຫັນດີເຫັນພ້ອມ ແລະ ໃຫ້ການຮ່ວມມືເຂົ້າຮ່ວມໃນການພັດທະນາໂຄງການດັ່ງກ່າວ, ໃນນັ້ນ ໄດ້ເອົາໃຈໃສ່ໃນການໂຕ້ຕອບ ໃນສື່ສັງຄົມອອນລາຍ ໂດຍໄດ້ມອບຄວາມຮັບຜິດຊອບໃຫ້ແກ່ອຳນາດການປົກຄອງໃນບ້ານເປົ້າໝາຍ ແລະ ກຳລັງປ້ອງກັນຄວາມສະຫງົບຂອງເມືອງ ໃນການສຶກສາອົບຮົມປະຊາຊົນ ຊຶ່ງເຫັນວ່າສະພາບການດັ່ງກ່າວໄດ້ມີຄວາມສະຫງົບໂດຍພື້ນຖານ, ໃນການລົງເຮັດວຽກງານແນວຄິດນັ້ນແມ່ນໄດ້ສຸມໃສ່ຕາມຄວາມສະໝັກໃຈຂອງປະຊາຊົນ.
ທ່ານກ່າວຕື່ມວ່າ: ໂຄງການດັ່ງກ່າວຍັງຈະປະກອບສ່ວນໃນການສ້າງວຽກເຮັດງານທຳໃຫ້ແກ່ກັບປະຊາຊົນ, ພາຍຫຼັງທີ່ທ່ານເຈົ້າແຂວງລົງມາຊີ້ນຳບໍລິສັດກໍໄດ້ແຈ້ງການຫາເມືອງ ເພື່ອຮອງຮັບແຮງງານເຂົ້າບັນຈຸທີ່ໂຮງງານແປຮູບປາ ຊຶ່ງມີຄວາມຕ້ອງການແຮງງານປະມານ 300 ຄົນ, ຄາດວ່າໂຮງງານຈະສ້າງໃຫ້ສຳເລັດໃນທ້າຍປີ 2024 ຊຶ່ງຈະເປັນການສ້າງວຽກເຮັດງານທຳໃຫ້ແກ່ປະຊາຊົນພາຍໃນເມືອງໄດ້ເປັນຢ່າງດີ ແລະ ສ້າງຊີວິດການເປັນຢູ່ໃຫ້ປະຊາຊົນນັບມື້ນັບດີຂຶ້ນເລື້ອຍໆ, ຕໍ່ກັບຄອບຄົວຜູ້ໄດ້ຮັບການຊົດເຊີຍທາງເມືອງຍັງໄດ້ເນັ້ນໃຫ້ປະຊາຊົນຈົ່ງນຳໃຊ້ເງິນທີ່ໄດ້ຮັບການຊົດເຊີຍນັ້ນໄປໝູນໃຊ້ໃຫ້ມີຜົນປະໂຫຍດ ແລະ ມີຄວາມຍືນຍົງ ເພື່ອໃຫ້ຊີວິດການເປັນຢູ່ດີຂຶ້ນເລື້ອຍໆ.
ທ່ານ ກິ ບຸນສະຫວັດ ນາຍບ້ານໆບຶງງາມ ໄດ້ໃຫ້ສຳພາດຕໍ່ສື່ມວນຊົນວ່າ: ບ້ານບຶງງາມ ເປັນ ບ້ານໜຶ່ງທີ່ນອນຢູ່ໃນເມືອງໂຂງ ແຂວງຈຳປາສັກ ທີ່ຖຶກຜົນກະທົບ ໃນໂຄງການພັດທະນາເຂດເສດຖະກິດ ໃໝ່ສີທັນດອນ, ປະຊາຊົນພາຍໃນໂດຍສະເພາະປະຊາຊົນ ຜູ້ທີ່ໄດ້ຮັບຜົນກະທົບກໍໃຫ້ຄວາມຮ່ວມມື ເປັນຢ່າງດີ ແລະ ບໍ່ມີບັນຫາໃດທີ່ເປັນບັນຫາຄັດຂອງມອງໃຈ ຊຶ່ງໃນວັນທີ 21 ສິງຫາຜ່ານມາ, ປະຊາຊົນຜູ້ທີ່ຖືກຜົນກະທົບຈຳນວນ 10 ຄອບຄົວ ພາຍໃນບ້ານດັ່ງກ່າວ ກໍໄດ້ມາຮັບຄ່າຊົດເຊີຍ, ບ້ານບຶງງາມ ມີພົນລະເມືອງທັງໝົດ 1545 ຄົນ ມີ 277 ຄອບຄົວ, ມີຈຳນວນ 30 ຄອບຄົວ ທີ່ຖືກຜົນກະທົບຈາກ ໂຄງການ, ປັດຈຸບັນປະຊາຊົນພາຍໃນບ້ານບຶງງາມທີ່ຖືກຜົນກະທົບແມ່ນປະເພດເນື້ອທີ່ດິນນາ ແລະ ດິນສວນ, ໃນນັ້ນຕາມແຜນພັດທະນາທາງໂຄງການຍັງຈະຊ່ວຍສ້າງເສັ້ນທາງຄອນກີດ ແລະ ຕິດຕັ້ງໄຟເຍືອງ ທາງໃຫ້ແກ່ບ້ານຕື່ມອີກ.
ທ່ານ ທັດສະນະ ສີຫາບຸດ ນາຍບ້ານໆທ່າຄໍ້ ກໍໃຫ້ຮູ້ວ່າ: ໃນການພັດທະນາໂຄງການພັດທະນາເຂດ ເສດຖະກີດໃໝ່ສີທັນດອນ, ໃນເບື້ອງຕົ້ນທາງອຳນາດການປົກຄອງບ້ານກໍໄດ້ມີ ການສຶກສາອົບຮົມແນວ ຄິດໃຫ້ແກ່ກັບປະຊາຊົນຜູ້ທີ່ຖືກຜົນກະທົບບໍ່ໃຫ້ມີແນວຄິດຄອນແຄນບໍ່ໃຫ້ເຂົ້າໃຈໄປທາງທີ່ບໍ່ດີກ່ຽວກັບການພັດທະນາໂຄງການດັ່ງກ່າວ ແລະ ໃຫ້ຄວາມຮ່ວມມືກັບບໍລິສັດ, ບ້ານທ່າຄໍ້ ມີເນື້ອທີ່ຖືກຜົນກະທົບ 541 ເຮັກຕາ, ທີ່ຜ່ານມາມີປະຊາຊົນໄດ້ຮັບຄ່າຊົດເຊີຍເນື້ອທີ່ດິນ 118 ເຮັກຕາ, ປະຊາຊົນໄດ້ຮັບຄ່າຊົດເຊີຍໄປແລ້ວ 20 ກວ່າຄອບຄົວ, ສຳລັບປະຊາຊົນທີ່ໄດ້ຮັບຄ່າຊົດເຊີຍກໍມີຄວາມພາກພູມໃຈບາງຄອບຄົວກໍນຳໄປຊື້ດິນ, ຝາກ ທະນາຄານ, ເຮັດເສດຖະກິດຄອບຄົວ ແລະ ອື່ນໆ, ເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນເລື້ອຍໆ, ພາຍໃນບ້ານມີ 285 ຄອບຄົວ, ມີພົນລະເມືອງ 1.800 ກວ່າຄົນ, ເນື້ອທີ່ທີ່ຖືກຜົນກະທົບແມ່ນເນື້ອທີ່ດິນບ້ານ, ດິນນາ ແລະ ດິນສວນ, ລັງລວມແລ້ວປະຊາຊົນພາຍໃນບ້ານແມ່ນມີຄວາມເຫັນດີ ແລະ ໃຫ້ຄວາມຮ່ວມມືເປັນຢ່າງ ດີໃນໂຄງການພັດທະນາເຂດເສດຖະກິດໃໝ່ສີທັນດອນ.
ທ່ານ ສາຍນາທີ ຄອນພະເພັງ ປະຊາຊົນບ້ານທ່າຄໍ້ ໃຫ້ຮູ້ວ່າ: ຄອບຄົວຂອງຂ້າພະເຈົ້າ ຖືກຜົນກະທົບ ຈາກໂຄງການແມ່ນດິນນາ ແລະ ດິນສວນໃນເນື້ອທີ່ 16 ເຮັກຕາ ຊຶ່ງເບື້ອງໂຄງການ ກໍໄດ້ໃຫ້ຄ່າຊົດເຊີຍ ແລະ ຂ້າພະເຈົ້າກໍມີຄວາມເພິ່ງພໍໃຈ ແລະ ເຫັນດີເຫັນພ້ອມທີ່ຈະມາພັດທະນາໂຄງ ການດັ່ງກ່າວ, ໂດຍຄອບ ຄົວຂ້າພະເຈົ້າໄດ້ຮັບເງິນຄ່າຊົດເຊີຍຈາກໂຄງການຈຳນວນ 1 ຕື້ກວ່າກີບ ແລະ ກໍໄດ້ມາແບ່ງໃຫ້ລູກແຕ່ລະຄົນ ຈຳນວນ 7 ຄົນຜູ້ ລະ 100 ລ້ານກີບ ເພື່ອເປັນທຶນຮອນໃນການສ້າງ ເສດຖະກິດຄອບຄົວ, ສ່ວນທີ່ເຫຼືອແມ່ນໄດ້ມາເຮັດທຸລະກິດ ຄອບຄົວຂອງຕົນເອງ.
