ໃນວັນທີ 8 ສິງຫາ 2024 ທີ່ຜ່ານມາ ຢູ່ນະຄອນຫຼວງປາກເຊ, ແຂວງ ຈຳປາສັກ ໄດ້ຈັດກອງປະຊຸມເຜີຍແຜ່ສັນຍາ ສຳປະທານໂຄງການສາຍສົ່ງແຮງສູງ 500 ກິໂລໂວນ ແລະ ສະຖານີ ບ້ານຫາດ-ບ້ານນາ-ອັດຕະປື ດັ່ງກ່າວຂຶ້ນ ໂດຍພາຍໃຕ້ການເປັນປະທານຮ່ວມຂອງ ທ່ານ ປອ ຈັນສະແຫວງ ບຸນຍົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ທ່ານ ສົມບູນ ເຮືອງວົງສາ ຮອງເຈົ້າແຂວງໆຈຳປາສັກ ພ້ອມດ້ວຍຜູ້ຕາງໜ້າ ຈາກ ສະພາແຫ່ງຊາດ, ກະຊວງການເງິນ, ກະຊວງອຸດສາຫະກຳ ແລະ ການຄ້າ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ຫ້ອງການ, ບັນດາກົມຂອງກະຊວງພະລັງງານ ແລະ ບໍ່ແຮ່, ລັດວິສາຫະກິດໄຟຟ້າລາວ, ຜູ້ພັດທະນາໂຄງການ ບໍລິສັດສາຍສົ່ງໄຟຟ້າຊາຍແດນ ລາວ-ກຳປູເຈຍ ຈຳກັດ (YEIG) , ພະແນກພະລັງງານ ແລະ ບໍ່ແຮ່ ແລະ ພາກສ່ວນທີ່ກ່ຽວຂ້ອງຂອງແຂວງ ຈຳປາສັກ ແລະ ແຂວງອັດຕະປື ເຂົ້າຮ່ວມຈຳນວນ 102 ທ່ານ.
ທ່ານ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ໄດ້ກ່າວເປີດກອງປະຊຸມວ່າ: ກອງປະຊຸມຄັ້ງນີ້, ຈະມີການເຜີຍເເຜ່ບັນດາເອກະສານທີ່ສຳຄັນ ຂອງພາກສ່ວນທີ່ກ່ຽວຂ້ອງ ແລະ ລາຍງານການຈັດຕັ້ງປະຕິບັດໂຄງການ ພ້ອມທັງແລກປ່ຽນຄຳຄິດຄຳເຫັນໃນກອງປະຊຸມ ເປັນຕົ້ນແມ່ນການນຳສະເໜີ ການພັດທະນາໂຄງການ ແລະ ສັນຍາສຳປະທານໂຄງການສາຍສົ່ງ 500 kV ບ້ານຫາດ-ບ້ານນາ-ອັດຕະປື ແລະ ສະຖານີ ທີ່ໄດ້ສຳເລັດການກໍ່ສ້າງ ແລະ ເປີດນຳໃຊ້ເປັນທາງການ ໃນວັນທີ 3 ມັງກອນ 2023 ທີ່ຜ່ານມາ, ການຕິດຕາມວຽກງານເຕັກນິກຂອງໂຄງການ ໄດ້ແບ່ງອອກເປັນ 2 ໄລຍະ ຄື: ໄລຍະທີ 1 ໂຄງການກໍ່ສ້າງສາຍສົ່ງໄຟຟ້າແຮງສູງ 500 kV ຈາກສະຖານີຊາຍແດນລາວ-ກຳປູເຈຍ-ບ້ານຫາດ ແລະ ໄລຍະທີ 2 ແມ່ນ ໂຄງການກໍ່ສ້າງສາຍສົ່ງໄຟຟ້າ 500 kV ບ້ານຫາດ-ບ້ານນາ-ອັດຈະປື, ດ້ານພັນທະຂອງໂຄງການທີ່ຈະຕ້ອງໄດ້ປະຕິບັດ, ການຕິດຕາມວຽກສິ່ງແວດລ້ອມສັງຄົມ ແລະ ທຳມະຊາດ ສຳລັບງົບປະມານ ວຽກງານຄຸ້ມຄອງ ແລະ ຕິດຕາມກວດກາ ສິ່ງແວດລ້ອມຂອງກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຂອງ ສູນກາງ, ແຂວງ, ເມືອງ ແລະ ຂອງເຈົ້າຂອງໂຄງການ, ການທົດແທນຄ່າເສຍຫາຍຕໍ່ຊັບສິນຂອງປະຊາຊົນຕາມລະບຽບການຂອງລັດ. ກອງປະຊຸມໄດ້ກ່າວປິດໂດຍທ່ານຮອງເຈົ້າແຂວງ ແຂວງຈຳປາສັກ ໃນຕອນເຊົ້າຂອງວັນດຽວກັນ.
ພາບ ແລະ ຂ່າວ: ມີລູ່ ຄຳປະເສີດ
