ພະແນກສາທາລະນະສຸກແຂວງເຊກອງ ຮ່ວມກັບ ອົງການຊ່ວຍເຫຼືອເຊິ່ງກັນແລະກັນ (SFE) ໄດ້ຈັດກອງປະຊຸມ ສະຫຼຸບການຈັດຕັ້ງປະຕິບັດກິດຈະກໍາ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2022 ຂອງ ໂຄງການສ້າງຄວາມເຂັ້ມແຂງດ້ານການບໍລິການຮັກສາສຸຂະພາບ ໄລຍະ III ພ້ອມທັງປະເມີນໄລຍະກາງ ຂອງໂຄງການ ເລີ່ມແຕ່ເດືອນ1 ປີ2021-ເດືອນ6 ປີ 2022 ເພື່ອກໍານົດຜົນໄດ້ຮັບຂອງໂຄງການທັງໄລຍະສັ້ນ ແລະໄລຍະຍາວ, ກໍານົດບັນຫາທີ່ຍັງຄົງຄ້າງ, ຖອດຖອນບົດຮຽນ ແລະກໍານົດຂໍ້ແນະນໍາໃນການປັບປຸງການຈັດຕັ້ງປະຕິບັດໂຄງການໃນຕໍ່ໜ້າ.
ກອງປະຊຸມດັ່ງກ່າວ ໄດ້ຈັດຂຶ້ນໃນວັນທີ 12 ກໍລະກົດ 2022 ນີ້ ທີ່ພະແນກສາທາລະນະສຸກແຂວງເຊກອງ ໂດຍມີທ່ານ ດຣ ພູຂັນ ຈັນທະວົງ ຮອງຫົວໜ້າພະແນກສາທາລະນະສຸກແຂວງ, ມີຕາງໜ້າຜູ້ປະສານງານອົງການຊ່ວຍເຫຼືອເຊິ່ງກັນ ແລະກັນ (SFE), ຂະແໜງການກ່ຽວຂ້ອງຂັ້ນແຂວງ, ຂັ້ນເມືອງ, ໂຮງໝໍນ້ອຍ ແລະນາຍບ້ານເປົ້າໝາຍເຂົ້າຮ່ວມ.
ທ່ານ ນາງ ສຸກອຸລາ ວັນນະວົງ ຜູ້ບໍລິຫານໂຄງການ ຕາງໜ້າໃຫ້ອົງການ SFE ໄດ້ສະຫຼຸບຄືນການຈັດຕັ້ງປະຕິບັດກິດຈະກໍາຕ່າງໆ ວ່າ: ໂຄງການສ້າງຄວາມເຂັ້ມແຂງດ້ານການບໍລິການຮັກສາສຸຂະພາບ ໄລຍະ III, ໃນໄລຍະ 6 ຕົ້ນປີ ເຊິ່ງເລີ່ມປະຕິບັດແຕ່ເດືອນ 1-6 ປີ 2022, ໂດຍຈຸດປະສົງລວມ ຂອງໂຄງການ ແມ່ນເພື່ອຮັບປະກັນການມີສຸຂະພາບທີ່ດີ ແລະສົ່ງເສິມຊີວິດການເປັນຢູ່ຂອງປະຊາຊົນແຂວງເຊກອງ ໃຫ້ດີຂຶ້ນດ້ວຍການໃຫ້ບໍລິການດ້ານສຸຂະພາບດີກວ່າເກົ່າ, ໂດຍສະເພາະ ເພື່ອໃຫ້ການບໍລິການຮັກສາສຸຂະພາບຂັ້ນພື້ນຖານຢູ່ແຂວງເຊກອງໄດ້ຮັບການປັບປຸງດີກວ່າເກົ່າ, ຊຶ່ງໂຄງການໄດ້ຈັດຕັ້ງປະຕິບັດ 6 ກິດຈະກໍາຫຼັກ ໂດຍເນັ້ນໃສ່ກິດຈະກຳໄວໜຸ່ມ.
ສໍາລັບຜົນໄດ້ຮັບຂອງການຈັດຕັ້ງປະຕິບັດບັນດາກິດຈະກຳ ແມ່ນເຮັດໃຫ້ການບໍລິການຮັກສາສຸຂະພາບແມ່, ເດັກແດງ, ເດັກນ້ອຍ ແລະໄວໜຸ່ມຢູ່ໂຮງໝໍແຂວງ ແລະເມືອງໄດ້ຮັບການປັບປຸງ; ຄວາມຮູ້ ແລະຄວາມອາດສາມາດໃນການຄຸ້ມຄອງກ່ຽວກັບການຄວບຄຸມພະຍາດຕິດຕໍ່ ແລະບໍ່ຕິດຕໍ່ ຢູ່ໂຮງໝໍແຂວງ ແລະເມືອງ ໄດ້ຮັບການປັບປຸງ; ການຄວບຄຸມການຕິດເຊື້ອ ແລະການຄຸ້ມຄອງອຸປະກອນພາຍໃນໂຮງໝໍ ແລະສຸກສາລາເປົ້າໝາຍ ໄດ້ຮັບການປັບປຸງ; ຄົນພິການ ໄດ້ເຂົ້າເຖິງການບໍລິການຮັກສາສຸຂະພາບທີ່ດີກວ່າເກົ່າ; ການບໍລິການຮັກສາສຸຂະພາບໃນສຸກສາລາເປົ້າໝາຍໄດ້ຮັບການປັບປຸງ; ບັນດາບ້ານເປົ້າໝາຍສະແດງອອກເຖິງການປະຕິບັດທີ່ດີກວ່າເກົ່າ ໃນການຮັກສາສຸຂະພາບຂັ້ນພື້ນຖານ, ນໍ້າ, ສຸຂະພິບານ ແລະສຸຂະອະນາໄມ; ພ້ອມນີ້ກໍໄດ້ຜ່ານແຜນການຈັດຕັ້ງປະຕິບັດກິດຈະກຳ 6 ເດືອນທ້າຍປີ 2022 ແລະສະຫລຸບຜົນການປະເມີນໄລຍະກາງ ຂອງໂຄງການ ເລີ່ມແຕ່ເດືອນ1 ປີ2021-ເດືອນ6 ປີ 2022 ຕື່ມອີກ.
ນອກນັ້ນ ຜູ້ເຂົ້າຮ່ວມຍັງໄດ້ພ້ອມກັນປະກອບຄໍາຄິດຄໍາເຫັນ ແລກປ່ຽນບົດຮຽນ ເພື່ອແກ້ໄຂຂໍ້ຄົງຄ້າງໃນໄລຍະຜ່ານມາ ແລະສົນທະນາກ່ຽວກັບຮ່າງແຜນການຈັດຕັ້ງປະຕິບັດກິດຈະກຳຂອງໂຄງການ 6 ເດືອນທ້າຍປີ 2022 ເພື່ອເຮັດໃຫ້ແຜນງານຂອງໂຄງການດັ່ງກ່າວສົມບູນຂຶ້ນກວ່າເກົ່າ ແນໃສ່ເຮັດໃຫ້ການຈັດຕັ້ງປະຕິບັດໂຄງການມີຜົນສໍາເລັດ ແລະບັນລຸເປົ້າໝາຍທີ່ວາງໄວ້.
ຂ່າວ;ພາບ: ພຸດທະສອນ
