ທ່ານ ເກຍ ອູ໊ສິດທິເດດ ແລະ ທ່ານ ສາຍສະໝອນ ກວານເມືອງຈັນ ເຈົ້າຂອງໂຄງການຮ່ວມໃຈສາຍໄຍໂລມາຄຳ ໄດ້ສືບຕໍ່ໃຫ້ການສະໜັບສະໜູນທຶນການສຶກສາ ຈຳນວນ 100 ລ້ານກີບ ເພື່ອປະກອບສ່ວນເຂົ້າໃນວຽກງານການສຶກສາ ຂອງແຂວງສະຫວັນນະເຂດ ໃນວັນທີ 15 ສິງຫາ 2024 ທີ່ຫ້ອງວ່າການແຂວງ ຕາງໜ້າມອບຂອງທ່ານ ສາຍສະໝອນ ກວານເມືອງຈັນ ນັກພັດທະນາດີເດັ່ນແຫ່ງຊາດ ແລະ ໃຫ້ກຽດຮັບໂດຍທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ.
ໂອກາດນີ້, ທ່ານເຈົ້າແຂວງສະຫວັນນະເຂດ ໄດ້ກ່າວສະແດງຄວາມຂອບໃຈ ແລະ ຍ້ອງຍໍຊົມເຊີຍຕໍ່ການປະກອບສ່ວນທຶນ ຮອນຂອງທ່ານ ສາຍສະໝອນ ກວານເມືອງຈັນ ແລະ ທ່ານ ເກຍ ອູ໊ສິດທິເດດ ທີ່ມອບໃນນາມໂຄງການຮ່ວມໃຈສາຍໄຍໂລມາຄຳ. ພ້ອມນີ້, ທ່ານເຈົ້າແຂວງຍັງໄດ້ຍົກໃຫ້ເຫັນເຖິງວຽກງານການສຶກສາຂອງແຂວງ ຊຶ່ງມີຄວາມຫຍຸ້ງຍາກຫຼາຍດ້ານ ແລະ ປັດຈຸບັນກຳລັງກະກຽມສູ່ການເປີດສົກຮຽນໃໝ່ ຊຶ່ງນັກຮຽນໃນຫຼາຍໆເຂດໂດຍສະເພາະເຂດຫ່າງໄກສອກຫຼີກ ບາງບ່ອນຍັງບໍ່ມີເຄື່ອງນຸ່ງ. ດັ່ງນັ້ນ, ທາງແຂວງຈຶ່ງໄດ້ລະດົມກຳລັງແຮງຈາກສັງຄົມ ເພື່ອນຳໄປຊ່ວຍລູກຫຼານນັກຮຽນ ໂດຍສະເພາະແມ່ນເຄື່ອງນຸ່ງນັກຮຽນ ລວມເຖິງອຸປະກອນການສຶກສາຈຳນວນໜຶ່ງ.
ໃນວັນດຽວກັນນີ້, ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ໂຄງການຮ່ວມໃຈສາຍໄຍໂລມາຄຳ ຍັງໄດ້ມອບເງິນສະໜັບສະໜູນຊື້ເຄື່ອງດົນຕີພື້ນເມືອງລາວ ແລະ ເພີ່ມຊຸດຝຶກອົບຮົມໃຫ້ແກ່ສະມາຄົມສິລະປິນລາວ ສາຂາແຂວງ ເພື່ອເປັນການສົ່ງເສີມສິລະປະດົນຕີພື້ນເມືອງລາວຂອງແຂວງ ໃຫ້ໄດ້ຮັບການເສີມຂະຫຍາຍ ແລະ ປົກປັກຮັກສາໃຫ້ຢູ່ກັບລູກຫຼານຕະຫຼອດໄປ.
ຂ່າວ: ສະຫວັນນະເຂດ
