ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ໂຍທາທິການ ແລະຂົນສົ່ງແຂວງຫລວງນໍ້າທາ ສືບຕໍ່ປະຕິບັດມາດຕະການຄວບຄຸມໂຄວິດ19 ຢ່າງເຂັ້ມງວດ

ໄປຄຽງຄູ່ກັບກັບການສືບຕໍ່ຈັດຕັ້ງປະຕິບັດ ມາດຕະການຕ່າງໆຂອງລັດຖະບານ ເພື່ອຄວບຄຸມພະຍາດໂຄວິດ19 ບໍ່ໃຫ້ລະບາດພາຍໃນແຂວງຫຼວງນໍ້າທາ ພະແນກໂຍທາທິການ ແລະຂົນສົ່ງ ແຂວງ ໄດ້ເອົາໃຈໃສ່ຈັດຕັ້ງປະຕິບັດວຽກງານໃນຂົງເຂດທີ່ຕົນຮັບຜິດຊອບຢ່າງຕັ້ງໜ້າ ໃນນັ້ນວຽກງານຂົນສົ່ງໂດຍສານ ເຊິ່ງແມ່ນວຽກຫໍ່ລແຫລມ ທັງຮັບປະກັນດ້ານສຸຂະພາບໃຫ້ຜູ້ໃຊ້ບໍລິການຢ່າງເຂັ້ມງວດ.

ທ່ານ ຄໍາລາ ຂານສະຫງ່າ ຫົວໜ້າພະແນກໂຍທາທິການແລະຂົນສົ່ງ ແຂວງຫລວງນໍ້າທາໃຫ້ຮູ້ວ່າ  ພາຍຫລັງທີ່ໄດ້ປະຕິບັດຄໍາສັ່ງຂອງຄະນະສະເພາະກິດຢ່າງເຂັ້ມງວດມາໄດ້ໄລຍະໜຶ່ງ ຮອດທ້າຍເດືອນພຶດສະພາຜ່ານມາ ແຂວງຫລວງນໍ້າທາໄດ້ເປີດໃຫ້ບໍລິການວຽກງານຂົນສົ່ງທາງບົກ, ທາງນໍ້າ ແລະທາງອາກາດ ໄປຄຽງຄູ່ກັບການປະຕິບັດຕາມມາດຕະການ ປ້ອງກັນ ແລະຄວບຄຸມພະຍາດໂຄວິດ19 ຢ່າງເຂັ້ມງວດ, ຢູ່ຕາມສະຖານີຜູ້ໂດຍສານແຫ່ງຕ່າງໆພາຍໃນແຂວງ ໄດ້ຈັດຕັ້ງຈຸດກວດອຸນຫະພູມ, ຈຸດລ້າງມື,  ແລະແນະນໍາໃຫ້ທຸກຄົນໃສ່ຜ້າອັດປາກອັດດັງ ຖ້າພົບວ່າຜູ້ໂດຍສານຄົນໃດ ມີອຸນຫະພູມເກີນ 37 ອົງສາຂຶ້ນໄປ ຈະນໍາສົ່ງໃຫ້ສູນທັນທີ ເພື່ອນໍາຜູ້ກ່ຽວໄປກວດ ແລະຮັກສາສຸຂະພາບຕາມຫລັກວິຊາການຂອງແພດໝໍ.

ທ່ານຄໍາລາ ຂານສະຫງ່າ ໃຫ້ຮູ້ອີກວ່າ: ລົດໂດຍສານແຕ່ລະຄັນ ກ່ອນຈະອອກຈາກສະຖານີຕ້ອງສີດຢາຂ້າເຊື້ອ, ແລະເອົາໃຈໃສ່ຈັດບ່ອນນັ່ງ ຄືເວັ້ນໄລຍະຫ່າງ1 ແມັດ, ສ່ວນລົດເມທີ່ມີບ່ອນນັ່ງ 45ບ່ອນນັ່ງ ແຕ່ອະນຸຍາດໃຫ້ບັນຈຸຜູ້ໂດຍສານພຽງແຕ່ 23ບ່ອນນັ່ງເທົ່ານັ້ນ, ພ້ອມກັນນັ້ນ ພາຍໃນລົດຍັງມີເຈວລ້າງມື, ສີດສະເປຂ້າເຊື້ອ ເພື່ອຮັບປະກັນສຸຂະພາບຂອງຜູ້ໂດຍສານ.

ທ່ານຄໍາລາ ຂານສະຫງ່າ ຫົວໜ້າພະແນກໂຍທາທິການແລະຂົນສົ່ງ ແຂວງຫລວງນໍ້າທາໃຫ້ຮູ້ເຖິງຜົນສະທ້ອນ ຈາກການປະຕິບັດມາດຕະການຕ່າງໆວ່າ:  ການປະຕິບັດມາດຕະການດັ່ງກ່າວ ໄດ້ສົ່ງຜົນກະທົບເຖິງລາຍຮັບຂອງເຈົ້າຂອງລົດ ແລະຂອງຂະແໜງໂຍທາທິການ ແລະຂົນສົ່ງ ເພາະວ່າຈາກການເວັ້ນໄລຍະຫ່າງ ເຮັດໃຫ້ສາມາດບັນຈຸຜູ້ໂດຍສານໄດ້ໜ້ອຍລົງ ແຕ່ການເກັບຄ່າໂດຍສານຍັງປະຕິບັດຄືເກົ່າ ເຊິ່ງໄລຍະເບື້ອງຕົ້ນ ບັນດາຜູ້ປະກອບການຫລາຍຄົນບໍ່ພໍໃຈ ແຕ່ເພື່ອເປັນການປະກອບສ່ວນ ປ້ອງກັນໂຄວິດ19 ຕ້ອງໄດ້ປະຕິບັດຕາມມາດຕະການຂອງຄະນະສະເພາະກິດວາງອອກຢ່າງເຂັ້ມງວດ, ເຊິ່ງໃນປະຈຸບັນແລະຕໍ່ໜ້ານີ້ພວມສືບຕໍ່ຈັດຕັ້ງປະຕິບັດ ບັນດາມາດຕະການຜ່ອນຜັນຢ່າງເຂັ້ມງວດ ຕາມວິຖີການດໍາລົງຊີວິດປົກກະຕິແບບໃໝ່ ເພື່ອບໍ່ໃຫ້ໂຄວິດ19 ກັບມາລະບາດອີກເປັນຮອບທີ 2.