ສະຖານີໂດຍສານສາຍໃຕ້ ກະກຽມຄວາມພ້ອມໃຫ້ແກ່ການບໍລິການຜູ້ໂດຍສານ ເພື່ອເດີນທາງກັບຄືນພູມລໍາເນົາ ໃນໄລຍະບຸນປີໃໝ່ລາວ ພ.ສ 2567 ທີ່ຈະມາເຖີງນີ້ ໂດຍໄດ້ກະກຽມດ້ານບຸກຄະລາກອນ, ພາຫະນະ, ການກວດ ກາເຕັກນິກ, ການຈັດສັນຄວາມເປັນລະບຽບຮຽບຮ້ອຍໃນໄລຍະທີ່ມີປະຊາຊົນເຂົ້າມາໃຊ້ບໍລິການແລະອື່ນໆ.
ທ່ານ ສຸກສະຫວາດ ສີສຸກ ຜູ້ຈັດການທົ່ວໄປສະຖານີຂົນສົ່ງໂດຍສານສາຍທາງ ໄກສາຍໃຕ້-ສາຍຕ່າງປະເທດໄດ້ໃຫ້ສໍາພາດຕໍ່ສື່ມວນຊົນໃນວັນທີ 9 ເມສານີ້ວ່າ: ພາຫະນະ ກໍຄື ລົດເມທີ່ໃຫ້ບໍລິການຜູ້ໂດຍສານຂອງສະຖານີມີ 60 ຄັນຕໍ່ມື້, ແຕ່ເພື່ອຮອງຮັບຜູ້ໂດຍສານທີ່ຈະເພີ່ມຂຶ້ນ ທາງສະຖານີໄດ້ເພີ່ມລົດ 15 ຄັນຕໍ່ມື້ ເພື່ອບໍ່ໃຫ້ຜູ້ໂດຍສານອັ່ງອໍ ເຊິ່ງທາງສະຖານີໄດ້ກະກຽມລົດເມຮອງຮັບຜູ້ໂດຍສານທີ່ຈະກັບບ້ານ ນັບແຕ່ຕອນແລງຂອງວັນທີ 10 ເມສາ ເປັນຕົ້ນໄປ ໂດຍເພີ່ມລົດ 15 ຄັນຕໍ່ມື້.
ທ່ານ ສຸກສະຫວາດ ສີສຸກ ຍັງໄດ້ຝາກມາຍັງຜູ້ໂດຍສານທີ່ຈະເດີນທາງກັບບ້ານ, ເວລາມາຊື້ປີ້ແລ້ວໃຫ້ກວດກາປີ້ໃຫ້ລະອຽດປ້າຍລົດ, ເວລາອອກ ເພາະລົດທໍາມະດາ ເວລາຂາຍປີ້ເຕັມແລ້ວລົດຈະອອກຈາກສະຖານີເລີຍ ຊຶ່ງພະນັກງານຈະຕິດປ້າຍລົດເຕັມແລ້ວອອກເລີຍຢູ່ບ່ອນຂາຍປີ້. ສ່ວນລົດພິເສດ ຫລື ວີໄອພີ ຜູ້ໂດຍສານສາມາດມາຊື້ປີ້ໄດ້ລ່ວງໜ້າກໍໄດ້ (ໃນໄລຍະເທດສະການທາງບໍລິສັດໄດ້ຢຸດການໂທຈອງປີ້).
ດັ່ງນັ້ນ, ຖ້າຫາກຜູ້ໂດຍສານທີ່ລັດຂຶ້ນລົດຕາມທາງ ລົດຄັນໃດທີ່ເຕັມ ຫລື ແອອັດເກີນໄປຢາກໃຫ້ເລືອກຂຶ້ນ ແລະ ລໍຖ້າຂຶ້ນຄັນຕໍ່ໄປ ເພາະວ່າລົດໄດ້ປ່ອຍອອກຈາກສະຖານີທຸກໆ 15-30 ນາທີ, ໃນດ້ານການຮັກສາຄວາມປອດໄພ ແລະ ກວດກາເຕັກນິກຂອງລົດ ໂດຍທາງສະຖານີໄດ້ປະສານຫາເຈົ້າໜ້າທີ່ຕໍາຫຼວດຈະລາຈອນ ພະແນກ ໂຄສະນາເພື່ອລົງມາເຜີຍແຜ່ຄວາມປອດໄພໃຫ້ກັບບັນດາເຈົ້າຂອງລົດ, ພະນັກງານຂັບລົດ, ຜູ້ໃຫ້ບໍລິການເທິງລົດ (ແອັດລົດ) ໃຫ້ຮັບຮູ້ເພີ່ມຂຶ້ນເພື່ອໃຫ້ມີສະຕິກ່ຽວກັບການຂັບຂີ່ໃຫ້ມີຄວາມລະມັດລະວັງຫລາຍຂຶ້ນກວ່າເກົ່າ.
Cr: ຂ່າວອອນລາຍ, ວສລ
