ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ໂຮງຫມໍ ແຂວງອຸດົມໄຊ ເປີດບໍລິການກວດກາສຸຂະພາບ ໃຫ້ລ້າ ໃຫ້ແກ່ເດັກນ້ອຍ ໃນໂອກາດວັນເດັກນ້ອຍສາກົນ

ເນື່ອງໃນໂອກາດວັນເດັກນ້ອຍສາກົນ ທີ່ໄດ້ຫມູນວຽນມາຄົບຮອບອີກວາລະໜຶ່ງນີ້ ທາງໂຮງຫມໍ ແຂວງອຸດົມໄຊ ຈຶ່ງຈັດພິທີເປີດການບໍລິການກວດສຸຂະພາບໃຫ້ແກ່ເດັກນ້ອຍ ຢູ່ພາຍໃນເທດສະບານແຂວງ ຟີ ໂດຍບໍ່ໄດ້ເສຍຄ່າ ຂຶ້ນຕົ້ນເດືອນ ມິຖຸນາ 2018 ນີ້ ຢູ່ທີ່ໂຮງຫມໍດັ່ງກ່າວ ໂດຍການເປັນປະທານ ຂອງທ່ານ ດຣ ຄໍາວິງ ຫົງດາລາ ຮອງອຳນວຍການໂຮງຫມໍແຂວງ,ມີບັນດາແພດຫມໍ,ພໍ່ແມ່ຜູ້ປົກຄອງ ພ້ອມດ້ວຍລູກຫຼານຂອງຕົນເຂົ້າຮ່ວມ.

ການຈັດພິທີເປີດບໍລິການກວດສຸຂະພາບ ຟີໃຫ້ແກ່ເດັກນ້ອຍ ຢູ່ພາຍໃນເທດສະບານແຂວງອຸດົມໄຊ ໃນຄັ້ງນີ້ ກໍເພື່ອປະຕິບັດທິດທາງແຜນການຂອງກະຊວງສາທາລະນະສຸກ ກໍຄື ລັດຖະບານລາວວາງອອກໃຫ້ປະກົດຜົນເປັນຈິງ ເນື່ອງຈາກກິດຈະກໍາດັງກ່າວນີ້ ແມ່ນໄດ້ຮັບການຊ່ວຍເຫຼືອດ້ານງົບປະມານຈາກລັດຖະບານ, ເພື່ອເຮັດໃຫ້ເດັກນ້ອຍໄດ້ຮັບການປິ່ນປົວສຸຂະພາບຢ່າງເປັນລະບົບ,ຕໍ່ເນື່ອງ ແລະ ມີສຸຂະພາບທີ່ແຂງແຮງດີ ທັງເປັນການແນະນຳຮູບແບບ,ວິທີການດູແລຮັກສາ ແລະ ເບິ່ງແຍ່ງເດັກຕັ້ງແຕ່ເບື້ອງຕົ້ນ ນັບທັງການກິນ,ການຢູ່ ແລະ ອື່ນໆ ໃຫ້ແກ່ພໍ່ແມ່,ຜູູ້ປົກຄອງເດັກຮັບຮູ້,ເຂົ້າໃຈ ແລະ ໃຫ້ຄວາມສຳຄັນຕໍ່ກັບບັນຫາສຸຂະພາບຂອງເດັກ.

ທ່ານ ດຣ ຄໍາວິງ ຫົງດາລາ ຮອງອໍານວຍການໂຮງຫມໍ ແຂວງອຸດົມໄຊ ກ່າວອີກວ່າ: ການຈັດການບໍລິການກວດສຸຂະພາບໃຫ້ແກ່ເດັກນ້ອຍໃນຄັ້ງນີ້ ຈັດຂຶ້ນທຸກປີ ໂດຍກວດທຸກລະບົບ ທັງລະບົບຫູ,ຕາ,ດັງ,ຄໍ ແລະ ອື່ນໆ ຖ້າກວດພົບອາການຜິດປົກກະຕິ ແລະ ຮ້າຍແຮງ ກໍຈະຕ້ອງນຳປິ່ນປົວຕາມຫຼັກວິຊາການຂອງແພດຫມໍ ຖ້າຫາກອາການທຳມະດາ ກໍພຽງແຕ່ໃຫ້ຄຳແນະນຳ ແລ້ວ ບົງຢາໃຫ້ກິນຢູ່ບ້ານ.

ໂອກາດດັ່ງກ່າວ ທ່ານ ຍັງໄດ້ຮຽກຮ້ອງໃຫ້ ພໍ່ແມ່ຜູ້ປົກຄອງເດັກເອົາໃຈໃສ່ ແລະ ໃຫ້ຄວາມສຳຄັນຕໍ່ກັບບັນຫາສຸຂະພາບຂອງເດັກ ຖາຫາພົບເຫັນອາການຜິດປົກກະຕິ ແມ່ນຮີບນຳເອົາລູກຫຼານຂອງຕົນ ເຂົ້າມາກວດ ແລະ ປິ່ນປົວຢ່າງຮີບດ່ວນ ຫ້າມບໍ່ໃຫ້ປ່ອຍປະໃຫ້ແກ່ຍາວ ແລະ ຊື້ຢາໃຫ້ກິນເອງ ຢ່າງເດັດຂາດ.