ໃນວັນທີ 24 ເມສາ 2024 ນີ້, ແມ່ຂາວ ຄຳເພັດ ສີລິອຸໄທ ແລະ ທ່ານນາງ ອໍລະໄທ ຫລວງໂຄດ ພ້ອມຄະນະ ນຳພາໂດຍ ພະອາຈານ ຕົ້ນຕະການ ບຸນສະຫວັດ ວັດພະບາດດ່ານສູງ ເມືອງນາຊາຍທອງ ນະຄອນຫລວງວຽງຈັນ ໄດ້ມອບ-ຮັບການສ້ອມແປງໂຮງຮຽນ ເເລະ ເຄື່ອງຊ່ວຍເຫລືອ ໂຮງຮຽນປະຖົມນໍ້າມາຮາງ ເມືອງຄູນຄໍາ ແຂວງຄໍາມ່ວນ ເຊິ່ງປະກອບມີ: ໃສ່ຝາແອ້ມຫ້ອງຮຽນ, ເສົາຫລັກທຸງ, ປ້າຍໂຮງຮຽນ, ພັດລົມຈໍານວນ 3 ໜ່ວຍ, ເຄື່ອງປິ້ນເອກະສານ, ດອກໄຟ ແລະ ສາຍໄຟ. ພ້ອມນີ້ຍັງໄດ້ແຈກຢາຍ ປື້ມຂຽນ ແລະ ເຄື່ອງນຸ່ງຫົ່ມຈໍານວນໜຶ່ງ ໃຫ້ນ້ອງໆນັກຮຽນ ຢູ່ໂຮງຮຽນດັ່ງກ່າວ.
ໂອກາດນີ້, ທ່ານ ຫອມ ໄຊຍະຫານ ຜູ້ອຳນວຍການໂຮງຮຽນປະຖົມບ້ານນ້ຳມະຮາງ ໄດ້ສະແດງຄວາມຂອບໃຈຕໍ່ແມ່ຂາວ ແລະ ທ່ານນາງ ອໍລະໄທ ຫລວງໂຄດ ພ້ອມດ້ວຍຄະນະ ທີ່ເຫັນໄດ້ຄວາມສຳຄັນໃນວຽກງານກສນສຶກສາ ຂອງໂຮງຮຽນທີ່ຢູ່ເຂດຫ່າງໄກສອກຫລີກ ແລະ ນຳເອົາອຸປະກອນການຮຽນ-ການສອນ ມາມອບໃຫ້ໃນຄັ້ງນີ້ ເຊິ່ງມີຄວາມຈຳເປັນ ແລະ ສຳຄັນຫລາຍ ເພື່ອເຮັດໃຫ້ການຮຽນ-ການສອນ ຢູ່ໂຮງຮຽນປະຖົມບ້ານນ້ຳມະຮາງ ມີຄຸນນະພາບຂຶ້ນຕື່ມ, ທັງປະກອບສ່ວນເຮັດໃຫ້ນັກຮຽນ ມີຄວາມກະຕືລືລົ້ນ ຢາກມາໂຮງຮຽນ, ຕັ້ງໃຈຮຽນຫລາຍຂຶ້ນ, ປະກອບສ່ວນເຮັດໃຫ້ການນຸ່ງຖື ຂອງນັກຮຽນຢູ່ພາຍໃນໂຮງຮຽນ ມີຄວາມເປັນລະບຽບຮຽບຮ້ອຍຂຶ້ນຕື່ມ.
ທ່ານ ຫອມ ໄຊຍະຫານ ຍັງໃຫ້ຮູ້ອີກວ່າ: ປັດຈຸບັນ, ໂຮງຮຽນປະຖົມບ້ານນ້ຳມະຮາງ ມີນັກຮຽນທັງໝົດ 50 ຄົນ, ຍິງ 20 ຄົນ, ທາງໂຮງຮຽນ ຍັງມີຄວາມຕ້ອງການຄວາມຊ່ວຍເຫລືອຈາກສັງຄົມ ໃນຫລາຍດ້ານໂດຍສະເພາະ ຫ້ອງນ້ຳ 2 ຫ້ອງ ແລະ ອ່າງລ້າງມືໃຫ້ນ້ອງນັກຮຽນ ເພື່ອເປັນການປັບປຸງ ແລະ ສ້າງສະພາບແວດລ້ອມພາຍໃນໂຮງຮຽນ ໃຫ້ດີຂຶ້ນກວ່າເກົ່າ.
ທີ່ມາ: ຂປລ.
