ໂອກາດເຂົ້າຮ່ວມງານແລກປ່ຽນວັດທະນະທໍາ ລະຫວ່າງປະຊາຊົນຢູ່ຕາມຊາຍແດນ ລາວ-ຈີນ ປະຈໍາປີ 2024 ຄັ້ງວັນທີ 21 ມິຖຸນາ 2024 ຢູ່ ເມືອງຫຼ້າ ກິ່ງແຂວງສິບສອງພັນນາ ແຂວງຢຸນນານ ສປ ຈີນ ທິມງານສື່ມວນຊົນລາວ ໄດ້ມີໂອກາດໄປຢ້ຽມຢາມໂຮງຮຽນວິຊາຊີບເມືອງຫລ້າ ເຊິ່ງເປັນໂຮງຮຽນຮ່ວມມືກັບ ໂຮງຮຽນສ້າງຄູແຂວງຫລວງນໍ້າທາ ຂອງ ສປປ ລາວ ເຊິ່ງໄດ້ໃຫ້ການຊ່ວຍເຫລືອນັກຮຽນລາວມາແລ້ວຫລາຍຊຸດ.
ໂຮງຮຽນແຫ່ງນີ້ ສ້າງຕັ້ງຂຶ້ນໃນປີ 1986, ມີເນື້ອທີ່ທັງໝົດ 3.026.ຕາມັດ ປະກອບມີຄູອາຈານ ພະນັກງານທັງໝົດ 78ຄົນ, ມີອາຄານຮຽນ ແລະຝຶກອົບຮົມ 5ຫລັງ, ອາຄານສະໂມສອນ 2ຫລັງ, ຫໍພັກນັກຮຽນ 2ຫຼັງ, ມີໂຮງອາຫານນັກຮຽນ ແລະ ສະຫນາມກິລາ.
ທ່ານອາຈານ ເຕົາແພລີ ຮອງຫົວຫນ້າເລຂາທິການຂອງໂຮງຮຽນເຕັກນິກວິຊາອາຊີບເມືອງຫລ້າໃຫ້ຮູ້ວ່າ: ໃນຊຸມປີມໍ່ໆມານີ້, ທາງໂຮງຮຽນຂອງຂ້າພະເຈົ້າໄດ້ປະຕິບັດ ຂໍ້ລິເລີ່ມ “ຫນຶ່ງແລວທາງຫນຶ່ງເສັ້ນທາງ “ແຫ່ງຊາດ, ທາງໂຮງຮຽນໄດ້ຍົກລະດັບເປັນໂຮງຮຽນ ທີ່ສາມາດອົບຮົມ ພາສາຈີນ ແລະວິຊາຊີບ ໃຫ້ນັກຮຽນຂອງບັນດາປະເທດອາຊີຕາ ເວັນອອກສຽງໃຕ້ ແລະສາກົນ. ປັດຈຸບັນພວມພັດທະນາຂັ້ນຕອນທີສອງ ເຊິ່ງລວມມີພັດທະນາສະຫນາມກີລາ,ອາຄານເຝິກອົບຮົມສອ້ມແປງລົດຍົນ. ຕຶກສະໂມສອນສາມາດບັນຈຸໄດ້ 1.000ຄົນ. ລວມທັງເດີນກິລາ, ຫໍພັກນັກຮຽນ. ຫ້ອງອາຫານ. ຕຶກອາຄານສະໂມສອນເປັນຕົ້ນ. ສໍາລັບອາຄານຮຽນປະກອບດ້ວຍຫ້ອງຄອມພິມເຕີ, ຫ້ອງເວົ້າ ແລະອັດສຽງ, ຫ້ອງຮຽນສິລະປະ, ຫ້ອງຮຽນດົນຕີ, ຫ້ອງຝຶກອົບຮົມວິຊາການບໍລິການໃນຮ້ານອາຫານ, ສິລະປະຊົງຊາ, ບໍລິຫານໂຮງແຮມ, ສ້ອມແປງລົດຍົນ, ການຂົນສົ່ງສິນຄ້າ, ການຄ້າທາງເອເລັກໂຕນິກກັບຕ່າງປະເທດ, ຫ້ອງສະໝຸດ ມີປຶ້ມອ່ານຊະນິດຕ່າງໆຈໍານວນ 47.927ຫົວ ລວມທັງປຶ້ມອ່ານອີເລັກໂທຣນິກ.
ທ່ານອາຈານ ເຕົາແພລີ ໃຫ້ຮູ້ອີກວ່າ: ໃນອານາຄົດ ໂຮງຮຽນພວກເຮົາຈະສຸມໃສ່ສ້າງບຸກຄະລະກອນຢ່າງຫຼວງຫຼາຍໃຫ້ແກ່ສັງຄົມ. ໃນປີນີ້ໄດ້ສືບຕໍ່ເຊັນບົດບັນທຶກຮ່ວມມືກັບ ວິທະຍາໄລຄູແຂວງຫຼວງນໍ້າທາຂອງລາວ ອີງຕາມສັນຍາແລ້ວ ທັງສອງຝ່າຍຈະແລກປ່ຽນ ຄູອາຈານ ແລະນັກຮຽນເຊິ່ງກັນແລະກັນ. ເພີ່ມທະວີຮັບເອົານັກສຶກສາລາວໃຫ້ ຫຼາຍກວ່າເກົ່າ. ນັບແຕ່ເດືອນກັນຍາ ປີ2001 ຫາເດືອນກັນຍາ 2021 ໂຮງຮຽນວິຊາຊີບຊັ້ນສູງເມືອງຫຼ້າ ໄດ້ຮັບເອົານັກຮຽນລາວທັງຫມົດ 26 ຊຸດຈໍານວນ 2.932ຄົນ,ໃນນັ້ນກໍາລັງຮຽນຢູ່ 625 ຄົນ ແຕ່ລະປີໂຮງຮຽນໄດ້ຈັດຕັ້ງນັກຮຽນລາວໃຫ້ເສັງ HSK. ທັງໄດ້ເອົາໃຈໃສ່ແນະນໍາໃຫ້ນັກຮຽນລາວໄປຮຽນຕໍ່ ລະດັບມະຫາວິທະຍາໄລ ພາຍໃນປະເທດຈີນ ເປັນຕົ້ນ: ມະຫາວິທະຍາໄລປັກກິ່ງ, ມະຫາວິທະຍາໄລ ຢູນານ ມະຫາວິທະຍາໄລສ້າງຄູຢູນານ, ມະຫາວິທະຍາໄລການເງິນ ແລະເສດຖະກິດຢູນນານ, ມະຫາວິທະຍາໄລກະສິກຳຢູນນານ, ມະຫາວິທະຍາໄລແຫ່ງຊາດຈີນ, ມະຫາວິທະຍາໄລກຸ້ຍຢາງ, ມະຫາວິທະຍາໄລຈູນຢີ້, ມະຫາວິທະຍາໄລປ່າໄມ້ຕາເວັນຕົກສຽງໃຕ້ ແລະມາຫາວິທະຍາໄລອື່ນໆ, ພາຍຫລັງສໍາເລັດການສຶກສາແລ້ວ ຍັງໄດ້ແນະນໍາ ໃຫ້ນັກສຶກສາລາວ ສືບຕໍ່ໄປເຮັດວຽກຢູ່ບໍລິສັດຂອງຈີນທີ່ປະຈຳຢູ່ລາວຕື່ມອີກ.
ອີງຕາມສະຖິຕິທີ່ບໍ່ຄົບຖ້ວນ, ນັກຮຽນທີ່ຮຽນຈົບຈາກໂຮງຮຽນແຫ່ງນີ້ ໄດ້ໄປປະກອບອາຊີບຢູ່ອົງການຂອງລັດແຫ່ງຕ່າງໆຢູ່ລາວ ເປັນຕົ້ນ :ຄະນະກຳມະການກວດກາສູນກາງ. ກະຊວງປ້ອງກັນປະເທດ. ຄະນະພົວພັນຕ່າງປະເທດ, ດ່ານພາສີ, ຕຳຫຼວດ ແລະສະຖານສຶກສາແຫ່ງຕ່າງໆ ໃນນັ້ນ 85ຄົນ ເຮັດທຸລະກິດສ່ວນຕົວ, 41ຄົນເປັນຜູ້ແປພາສາຢູ່ສະຖາບັນຂອງລັດ, 81ຄົນເປັນຜູ້ແປພາສາໃຫ້ພາກສ່ວນທຸລະກິດ, ສ່ວນທີ່ເຫຼືອແມ່ນປະກອບອາຊີບດ້ວຍຕົນເອງ.
