ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໂຮງແຮມລາດຊະວົງ ວັນດ້າວິສຕ້າ ເປັນໜຶ່ງໃນໂຮງແຮມທີ່ໃຫຍ່ທີ່ສຸດ ໃນນະຄອນຫລວງວຽງຈັນ ເຊິ່ງໄດ້ເປີດທົດລອງໃຫ້ບໍລິການແລ້ວ ເມື່ອບໍ່ດົນມານີ້, ພາຍຫລັງທີ່ສໍາເລັດການກໍ່ສ້າງ ແລະ ຕົບແຕ່ງພາຍໃນອາຄານສໍາເລັດ. ມາຮອດປັດຈຸບັນ ການກໍ່ສ້າງສຳເລັດປະມານ 95 ສ່ວນຮ້ອຍ ແລະ ຄາດວ່າຈະໃຫ້ສຳເລັດ 100 ສ່ວນຮ້ອຍ ໃນທ້າຍເດືອນພຶດສະພາໜ້ານີ້ ເພື່ອກຽມຮັບໃຊ້ກອງປະຊຸມສຸດຍອດອາຊຽນ ທີ່ລາວເຮົາໄດ້ຮັບກຽດເປັນເຈົ້າພາບທີ່ຈະຈັດຂຶ້ນພາຍໃນທ້າຍປີນີ້.
ທ່ານ ເສີນ ຊຽງ ປະທານໂຮງແຮມລາດຊະວົງ ວັນດ້າວິສຕ້າ ໃຫ້ສຳພາດໃນວັນທີ 1 ເມສາ 2024 ນີ້ວ່າ: ໂຮງແຮມລາດຊະວົງ ວັນດ້າວິສຕ້າ ເປັນໂຮງແຮມໜຶ່ງ ໃນໂຮງແຮມທີ່ຮັບໃຊ້ກອງປະຊຸມສຸດຍອດອາຊຽນ ທີ່ຈະຈັດຂຶ້ນໃນທ້າຍປີນີ້ ປັດຈຸບັນໂຮງແຮມໄດ້ມີຄວາມພ້ອມໃນດ້ານຕ່າງໆ ເພື່ອກຽມຕ້ອນຮັບຄະນະການນໍາລະດັບສູງຈາກປະເທດອາຊຽນ ແລະ ປະເທດຄູ່ຮ່ວມເຈລະຈາ ທີ່ຈະມາເຂົ້າຮ່ວມກອງປະຊຸມດັ່ງກ່າວ, ເພື່ອໃຫ້ມີຄວາມພ້ອມທຸກດ້ານ ແລະ ເປີດໃຊ້ບໍລິການຢ່າງເປັນທາງການ, ປັດຈຸບັນ ໄດ້ເລັ່ງໃສ່ບັນດາໜ້າວຽກທີ່ສໍາຄັນ ເປັນຕົ້ນ: ການຕົບແຕ່ງບໍລິເວນອ້ອມຮອບອາຄານ ເຊັ່ນ: ການຕິດຕັ້ງໄຟຟ້າ, ນໍ້າປະປາ ເດີ່ນຫຍ້າ ລະບົບບໍາບັດນໍ້າເປື້ອນ, ການຝຶກອົບຮົມພະນັກງານ, ລວມທັງການຕົບແຕ່ງລະບົບພາຍໃນໂຮງແຮມຈໍານວນໜຶ່ງ ໃຫ້ມີຄວາມທັນສະໄໝ ແລະ ມີຄວາມປອດໄພສູງ ເພື່ອໃຫ້ມີຄວາມອຳນວຍຄວາມສະດວກຄົບຊຸດ, ມີການບໍລິການແບບຄົບວົງຈອນ, ທັນສະໄໝທຽບເທົ່າກັບສາກົນ. ປັດຈຸບັນ ໂຮງແຮມລາດຊະວົງ ວັນດ້າວິສຕ້າມີຫ້ອງນອນທັງໝົດ 272 ຫ້ອງ,ໃນນີ້ມີຫ້ອງລະດັບການນໍາລະດັບສູງ 2 ຫ້ອງ, ຫ້ອງລະດັບການທູດ 4 ຫອ້ງ ແລະ ຫ້ອງສູດທົ່ວໄປ 37 ຫ້ອງ, ນອກນີ້ ຍັງມີຫ້ອງທົ່ວໄປ ຫລື ຫ້ອງສະແຕນດາສທົ່ວໄປ ເຊິ່ງສາມາດຮອງຮັບແຂກໄດ້ຫລາຍກວ່າ 500 ຄົນ. ພ້ອມນີ້, ຍັງມີຫ້ອງປະຊຸມຂະໜາດນ້ອຍ ແລະ ຫ້ອງຂະໜາດໃຫຍ່ຫ້ອງໜຶ່ງສາມາດຮອງຮັບແຂກໄດ້ສູງເຖິງ 800 ກວ່າຄົນ.
ທ່ານ ເສີນ ຊຽງ ໃຫ້ຮູ້ຕື່ມວ່າ: ໂຄງການລາດສະວົງພັດທະນາ ນະຄອນຫລວງວຽງຈັນ ເປັນໂຮງແຮມໃຫຍ່ທີ່ສຸດຂອງປະເທດລາວ, ປະກອບມີຕຶກໂຮງແຮມ 33 ຊັ້ນ, ຕຶກຫ້ອງການ 20 ຊັ້ນ ໄວ້ສະເພາະເປີດໃຫ້ຜູ້ປະກອບການ, ບໍລິສັດເຊົ່າດຳເນີນທຸລະກິດ ແລະ ຕຶກອາພາດເມັ້ນ ຫລື ຫ້ອງພັກ 20 ຊັ້ນ ໄວ້ສຳລັບຂາຍ ຫລື ເຊົ່າ. ໃນນີ້, ຫ້ອງຈຳນວນໜຶ່ງ ໄວ້ສຳລັບທາງການທູດ ຫລື ໃຫ້ພະນັກງານການທູດມາພັກເຊົາ ເປັນບູລິມະສິດ, ນອກຈາກນີ້, ຍັງມີສູນການຄ້າຄົບວົງຈອນ ເປັນຕົ້ນ: ຮ້ານຄ້າປອດພາສີ, ຮ້ານຄ້າທົ່ວໄປ, ຫ້ອງບັນເທີງ ແລະ ຕະຫລາດກາງຄືນ ຢູ່ຊັ້ນ 6 ຫລື ດ່ານຟ້າຕື່ມອີກ. ມາຮອດປັດຈຸບັນ, ການກໍ່ສ້າງໂຄງການລາດສະວົງພັດທະນາ ໂດຍລວມຄືບໜ້າເກືອບ 90 ສ່ວນຮ້ອຍ. ໃນນີ້, ສະເພາະຕຶກອາພາດເມັ້ນ ຄາດວ່າຈະໃຫ້ສຳເລັດ ພ້ອມທັງເປີດໃຫ້ບໍລິການໃນທ້າຍປີນີ້, ຫລັງຈາກນີ້ ຈະສືບຕໍ່ເປີດສູນການຄ້າຕ່າງໆ ຄາດວ່າຈະສຳເລັດທັງໝົດ 100 ສ່ວນຮ້ອຍໃນຕົ້ນປີ 2025.
ທ່ານ ເສີນ ຊຽງ ຍັງໄດ້ສະແດງຄວາມຂອບໃຈຕໍ່ພັກ ແລະ ລັດຖະບານທີ່ໃຫ້ການສະໜັບສະໜູນ, ຊ່ວຍເຫລືອໃນດ້ານຕ່າງໆຕະຫລອດມາ ເຮັດໃຫ້ໂຄງການລາດສະວົງພັດທະນາກໍຄື ໂຮງ ແຮມລາດຊະວົງ ວັນດ້າວິສຕ້າ ສຳເລັດຕາມຄາດໝາຍທີ່ວາງໄວ້ ແລະ ໃນໂອກາດວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 69 ປີ ແລະ ການສະເຫລີມສະຫລອງປີໃໝ່ລາວ 2024 ທີ່ຈະມາເຖິງນີ້ ທ່ານ ເສີນ ຊຽງ ຍັງໄດ້ອວຍພອນໃຫ້ການນຳພັກ, ລັດ ຕະຫລອດຮອດປະຊາຊົນລາວບັນດາເຜົ່າຈົ່ງມີສຸຂະພາບເຂັ້ມແຂງ, ມີພະລານາໄມສົມບູນ, ສືບຕໍ່ນຳພາ-ຊີ້ນຳປະເທດຊາດໃຫ້ຈະເລີນຮຸ່ງເຮືອງກ້າວໜ້າຂຶ້ນເລື້ອຍ.
ຂຽນໂດຍ: ບຸນຍັງ ພຸດສະຫວັດ
ພາບ: ທະນູທອງ