ໂຮງແຮມແຄນຄູ່ (ຕຶກຕິບເຂົ້າ) ຈະເປີດບໍລິການໃນປີ 2026
ການກໍ່ສ້າງໂຄງການກໍ່ສ້າງໂຮງແຮມແຄນຄູ່ (ຕຶກຕິບເຂົ້າ) ເຊີ່ງເປັນໜຶ່ງໃນຫຼາຍກິດຈະການຂອງໂຄງການພັດທະນາເສດຖະກິດພິເສດໃໝ່ ສີທັນດອນ ຢູ່ເມືອງໂຂງ ແຂວງຈໍາປາສັກ ມີຄວາມຄືບໜ້າຢ່າງຕໍ່ເນື່ອງ, ຄາດວ່າໂຄງສ້າງຂອງອາຄານຈະສໍາເລັດພາຍໃນປີ 2024 ຕາມສັນຍາ, ຈາກນັ້ນ ຕົ້ນປີ 2025 ເລີ່ມລົງມືຕົບແຕ່ງ ແລະ ຕົ້ນປີ 2026 ແມ່ນສາມາດເປີດໃຊ້ບໍລິການ.
ທ່ານ Zhao Zhipeng ຫົວໜ້າວິສະວະກອນພາກສະໜາມໃຫ້ຮູ້ວ່າ: ໂຄງການ ກໍ່ສ້າງໂຮງແຮມແຄນຄູ່ (ຕຶກຕິບເຂົ້າ) ໄລຍະທີ 1: ໃນເດືອນກຸມພາ 2023 ໄດ້ລົງມືກໍ່ສ້າງຕຶກຕິບເຂົ້າປະກອບມີທັງໝົດ 15 ຊັ້ນ, ໃນນັ້ນມີ 2 ຊັ້ນໃຕ້ດິນ ແລະ 13 ຊັ້ນເທິງໜ້າດິນ, ມາເຖິງປັດຈຸບັນ ໄດ້ກໍ່ສ້າງໂຄງສ້າງສຳເລັດ 2 ຊັ້ນໃຕ້ດິນ ແລະ 4 ຊັ້ນເທິງໜ້າດິນ, ສະພາບຄວາມຄືບໜ້າ ແມ່ນມີລັກສະນະຊັກຊ້າ ເນື່ອງຈາກມີສອງບັນ ຫາຄື: ຊັ້ນທີ 5 ຊັ້ນເທິງໜ້າດິນເປັນຊັ້ນທີ່ກວ້າງທີ່ສຸດຂອງຕຶກ, ເຮັດໃຫ້ວຽກໂຄງສ້າງເຫຼັກມີຄວາມລະອຽດອ່ອນ ແລະ ອີກຢ່າງທາງສະຖາບັນອອກແບບແມ່ນຢູ່ໃນຂັ້ນຕອນປັບປຸງແບບການເສີມໂຄງສ້າງເຫຼັກ. ແນວໃດກໍຕາມ, ຮັບປະກັນວ່າໂຄງສ້າງດັ່ງກ່າວແມ່ນຈະສຳ ເລັດການກໍ່ສ້າງໃນທ້າຍເດືອນທັນວາ 2024 ຕາມສັນຍາ ແລະ ຕົ້ນປີ 2025 ເລີ່ມລົງມືຕົບແຕ່ງ ແລະ ຕົ້ນປີ 2026 ແມ່ນສາມາດເປີດໃຊ້ບໍລິການ. ໂຄງການດັ່ງກ່າວປັດຈຸບັນມີກຳມະກອນລາວ 200 ຄົນ, ໃນນັ້ນຄົນຈີນ 50 ຄົນ, ໃນຕົ້ນປີໜ້າໄລຍະຕົບແຕ່ງແມ່ນຈະໄດ້ເພີ່ມກຳມະກອນຄົນລາວເປັນ 500 ຄົນ ແລະ ຈີນ 200 ຄົນ.
ໂຄງການກໍ່ສ້າງຕຶກອະເນກປະສົງແຄນຄູ່ (ໄລຍະທີ 1 ຕຶກຕິບເຂົ້າ) ແມ່ນໜຶ່ງໃນບັນດາໂຄງການ ທີ່ນອນຢູ່ໃນແຜນການກໍ່ສ້າງ ແລະ ພັດທະນາໂຄງການ ເຂດພັດ ທະນາເສດຖະກິດໃໝ່ ສີທັນດອນ ໂດຍໄດ້ມີພິທີວາງສີລາລຶກກໍ່ສ້າງເມື່ອວັນທີ 22 ກຸມພາ 2023, ໂຄງການນີ້ຕັ້ງຢູ່ເຂດ A ຂອງໂຄງການ ກໍຄືເຂດບ້ານທ່າຄໍ້, ເມືອງໂຂງ, ມີໄລຍະຫ່າງຈາກ ນໍ້າຕົກຄອນພະເພັງ 2 ກວ່າກິໂລແມັດ.
ສ່ວນຮູບຊົງຂອງໂຮງແຮມ ໄດ້ຮັບການອອກແບບທາງສະຖາປັດຕະຍະກໍາໃຫ້ມີຮູບຊົງອັນສວຍງາມ ໂດຍຕົວອາຄານໄດ້ນໍາເອົາຮູບຊົງຂອງແຄນ ທີ່ເປັນເຄື່ອງດົນຕີພື້ນເມືອງຂອງປະຊາຊົນລາວ ແລະ ຮູບຊົງຂອງກະຕິບເຂົ້າ ທີ່ເປັນເຄື່ອງໃຊ້ໃນການດໍາລົງຊີວິດປະຈໍາວັນ ຂອງປະຊາຊົນລາວມາແຕ່ບູຮານນະການ ມາເປັນແຮງບັນ ດານໃຈໃນການອອກແບບ. ປະເມີນມູນຄ່າການລົງທຶນ 130 ລ້ານໂດລາ; ຊຶ່ງໃນມູນຄ່າດັ່ງກ່າວແມ່ນບໍ່ລວມຄ່າຕົບແຕ່ງ ແລະ ຈະໃຊ້ເວລາການກໍ່ສ້າງປະມານ 3 ປີ ໂດຍມີຫຼາຍກິດຈະການແມ່ນຈະສາມາດເປີດໃຊ້ບໍລິການໄດ້.
ເມື່ອການກໍ່ສ້າງສຳເລັດ, ເຂດດັ່ງກ່າວ ຈະກາຍເປັນໃຈກາງທາງດ້ານໂຮງແຮມ, ທຸລະກິດ, ການຄ້າ, ວັດທະນະທໍາ, ຄວາມບັນເທີງ ແລະ ສັນຍາລັກຂອງເຂດສີ່ພັນດອນ ກໍຄື ສປປ ລາວ ອີກໜຶ່ງແຫ່ງ ເວົ້າລວມ, ເວົ້າສະເພາະ ຈະເປັນໂຮງແຮມ 5 ດາວ ລະດັບສາກົນແບບສະໄໝ ທີ່ກວມລວມເປັນສະຖານທີ່ພັກຜ່ອນ, ທຸລະກິດ, ການຄ້າ, ການປະຊຸມ, ຄວາມບັນເທີງ, ການສະແດງ, ໂຮງແຮມ ແລະ ອື່ນໆ ປະກອບສ່ວນດຶງດູດເອົານັກທ່ອງທ່ຽວ ເຂົ້າມາທ່ຽວ ສປປ ລາວ, ສ້າງວຽກເຮັດງານທຳ ແລະ ນຳເອົາຜົນປະໂຫຍດມາໃຫ້ປະຊາຊົນທ້ອງຖິ່ນ ກໍ່ຄືການພັດທະນາເສດຖະກິດ-ສັງຄົມ ຢູ່ທ້ອງຖິ່ນ.
