ວັນທີ 17 ມິຖຸນາ 2022 ອົງການແຄຣິຕັສ໌ລຸກຊໍາບວກ ປະຈໍາ ສປປ ລາວ ຕາງໜ້າໂດຍ ທ່ານ ດຣ ບຸນຍັງ ລັດສະໝີ ຜູ້ປະສານງານໂຄງການ ຂອງພະແນກສາທາລະນະສຸກປະຈໍາແຂວງວຽງຈັນ ພ້ອມຄະນະ ໄດ້ນໍາເອົາອຸປະກອນການແພດ ມອບໃຫ້ໂຮງໝໍນ້ອຍບ້ານນາແພງ ແລະ ໂຮງໝໍນ້ອຍບ້ານວັງເຮືອ ເມືອງທຸລະຄົມ ແຂວງວຽງຈັນ, ເຂົ້າຮ່ວມພິທີມອບ-ຮັບມີ ທ່ານ ນາງ ວົງເດືອນ ວັດຕະໂສ ເຈົ້າເມືອງໆທຸລະຄົມ, ທ່ານ ດຣ ຄໍາວິໄລ ຈັນທະລາສີ ຮອງຫົວໜ້າຫ້ອງການສາທາລະນະສຸກເມືອງທຸລະຄົມ, ມີພະນັກງານແພດໝໍໂຮງໝໍນ້ອຍທັງສອງແຫ່ງເຂົ້າຮ່ວມ.
ອຸປະກອນການແພດ ທີ່ນໍາໄປມອບໃນຄັ້ງນີ້ ມອບໃຫ້ໂຮງໝໍບນ້ອຍບ້າານນາແພງ 14 ລາຍການ, ໂຮງໝໍນ້ອຍບ້ານວັງເຮືອ 13 ລາຍການ ເປັນຕົ້ນ: ໝໍ້ອົບອຸປະກອນການແພດ, ເຄື່ອງກວດເລືອດ, ຊິງຊັ່ງເດັກເກີດໃໝ່, ເຄື່ອງຮົມຢາ, ບາຫລອດ, ເຄື່ອງວັດແທກຄວາມດັນ, ເຄື່ອງກວດທ້ອງແມ່ມານ, ບັ້ງອົກຊີ, ຕຽງນອນ ແລະອື່ນໆ.
ໂອກາດນີ້ ຕາງໜ້າໃຫ້ອໍານາດການປົດຄອງ ທ່ານ ນາງ ວົງເດືອນ ວັດຕະໂສ ເຈົ້າເມືອງໆທຸລະຄົມໄດ້ກ່າວສະແດງຄວາມຂອບໃຈເປັນຢ່າງສູງຕໍ່ໂຄງການ ກໍຄືການນໍາຂອງຂະແໜງສາທາລະນະສຸກທຸກຂັ້ນ, ໂດຍຜ່ານຜູ້ປະສານງານໂຄງການ ເຊິ່ງຍາມໃດກໍເປັນຫ່ວງເປັນໃຍຕໍ່ສຸຂະພາບຂອງພໍ່ແມ່ປະຊາຊົນ, ຕໍ່ລູກຫລານ ສູ້ຊົນຍາດແຍ່ງການຊ່ວຍເຫຼືອເຄື່ອງມືຮັບໃຊ້ການປິ່ນປົວ, ເອົາໃຈໃສ່ປັບປຸງຂະຫຍາຍລະບົບຕາໜ່າງສາທາລະນະສຸກທຸກຂັ້ນໃຫ້ມີຄວາມເຂັ້ມແຂງເທື່ອລະກ້າວ, ເຊິ່ງໃນນັ້ນ ເມືອງທຸລະຄົມ ແຂວງວຽງຈັນ ກໍຍັງມີຄວາມຈໍາເປັນ, ມີຄວາມຕ້ອງການອຸປະກອນເຫລົ່ານີ້ ແລະ ພ້ອມຈະຊີ້ນໍາໃຫ້ຫ້ອງການສາທາລະນະສຸກເມືອງ ແລະ ບັນດາໂຮງໝໍທີ່ໄດ້ຮັບການຊ່ວຍເຫຼືອຄຸ້ມຄອງນໍາໃຊ້ໃຫ້ເກີດປະໂຫຍດສູງສຸດ.
