ໂຮງໝໍມິດຕະພາບໄດ້ຈັດພິທີສະເຫຼີມສະຫຼອງວັນພະຍາດເສັ້ນເລືອດສະໝອງສາກົນ ແມ່ນວັນສະຫຼອງສາກົນນຶ່ງທີ່ທາງອົງກອນໄດ້ມີການກຳນົດສະຫຼອງໃນວັນທີ 29 ຕຸລາ ຂອງທຸກໆປີ ເຊິ່ງໄດ້ເລີ້ມຕົ້ນຈັດມາແຕ່ປີ 2006 ເປັນຕົ້ນມາ ແລະ ພະຍາດເສັ້ນເລືອດສະໝອງ(Stroke)ທີ່ໄດ້ຖືກປະກາດໃຫ້ເປັນບັນຫາສຸກເສີນທາງດ້ານສາທາລະນະສຸກ Stroke ຫຼືພະຍາດອຸຍັດຕິເຫດເສັ້ນເລືອດສະໝອງ ຫຼື ຈະຮ້ອງວ່າພະຍາດເສັ້ນເລືອດສະໝອງກະທັນຫັນ ແມ່ນພະຍາດທີ່ເກີດຂື້ນຍ້ອນມີການຂັດຂວາງເລືອດທີ່ໄປລ້ຽງສະໝອງກະທັນຫັນ ອາດຈະເປັນແບບບາງພາກສ່ວນ ຫຼື ທັງໝົດຂອງສະໝອງເຮັດໃຫ້ຈຸລັງສະໝອງໄດ້ຮັບບາດເຈັບຫຼືຕາຍ ເຊິ່ງເປັນສາເຫດເຮັດໃຫ້ເກີດອຳມະພາດກະທັນຫັນ ຫຼື ເສຍຊີວິດໄດ້, ພະຍາດStroke ມີ 2 ຊະນິດຄື ເສັ້ນເລືອດອຸດຕັນ ແລະ ເສັ້ນເລືອດແຕກ ແຕ່ຈະມີອາການສະແດງອອກມາຄ້າຍຄືກັນຂື້ນກັບຈຸດທີ່ເສຍຫາຍຂອງສະໝອງ ອາການທີ່ໜັກພົບມີ ໃບໜ້າຂ້າງໃດຂ້າງນຶ່ງບ້ຽວ,ແຂນຂາຂ້າງໃດຂ້າງນຶ່ງອ່ອນແຮງ ມີການເວົ້າຜິດປົກກະຕິ ລີ້ນແຂງ,ຄິດຄຳເວົ້າຍາກ ເວົ້າບໍ່ເຂົ້າເລື້ອງ ຖ້າມີອາການເລົ່ານີ້ແມ່ນໃຫ້ຮີບມາໂຮງໝໍດ່ວນພາຍໃນ 4-5 ຊົ່ວໂມງ ຫລັງມີອາການ ດີທີ່ສຸດແມ່ນໃຫ້ມາໄວກ່ອນ 3 ຊົ່ວໂມງ ເພື່ອທີ່ຈະໃຫ້ຢາເປີດເສັ້ນເລືອດສະໝອງທີ່ອຸດຕັນ ເພື່ອໂອກາດລອດຈາກຄວາມພິການຫຼື ເສຍຊີວິດ,ສ່ວນປັດໃຈສ່ຽງທີ່ເປັນສາເຫດແມ່ນມີ ຄວາມດັນເລືອດສູງ,ສູບຢາ:ເບົາຫວານ,ມີໄຂມັນໃນເສັ້ນເລືອດສູງ,ຕຸ້ຍນໍ້າໜັກເກີນ,ບໍ່ອອກກຳລັງກາຍ,ດື່ມເຫຼົ້າຫຼາຍ,ມັກກິນອາຫານທີ່ມີລົດເຄັມ,ມັນ ຫຼື ຫວານເກີນໄປ,ຜົນກະທົບເສຍຫາຍຂອງStroke ຫຼື ພະຍາດເສັ້ນເລືອດສະໝອງແມ່ນເປັນສາເຫດຫຼັກເຮັດໃຫ້ເກີດຄວາມພິການ ແລະ ເປັນສາເຫດການຕາຍອັນດັບສອງໃນທົ່ວໂລກ,ປະຈຸບັນໃນທົ່ວໂລກມີຄົນເຈັບເປັນປະມານ12.2ລ້ານຄົນຕໍ່ປີ ທີ່ເປັນກໍລະນີໃໝ່ ສະເລ່ຍແມ່ນທຸກ3 ວິນາທີ ມີ1 ກໍລະນີ ມີປະມານ101ລ້ານຄົນທີ່ລອດຊີວິດ ຫຼືເຄີຍເປັນມາກ່ອນ ແລະ ມີປະມານ 6.5 ລ້ານຄົນທີ່ເສຍຊີວິດໃນແຕ່ລະປີ,ໃນປີ 2017 ຜົນກະທົບເກີດຈາກSteokeໃນທົ່ວໂລກສູງເຖີງ451ພັນລ້ານໂດລາ ທຽບເປັນ 0.36% GDPທົ່ວໂລກ, ເພື່ອສົ່ງເສີມ ແລະ ໃຫ້ຄວາມຮູ້ແກ່ພໍ່ແມ່ປະຊາຊົນທົ່ວໄປກ່ຽວກັບອາການ ແລະ ວິທີປະຕິບັດເວລາທີ່ພົບພໍ້ບັນຫາດັ່ງກ່າວເພື່ອໃຫ້ຄົນເຈັບໄດ້ຮັບການປິ່ນປົວໃຫ້ໄວ ແລະ ທັນເວລາ ເພາະທຸກວິນາທີແມ່ນມີຄ່າໃນການໃຫ້ການປິ່ນປົວ ສາມາດຊ່ວຍໃຫ້ລອດພົ້ນຄວາມພິການ ແລະ ສາມາດລຸດຜ່ອນອັດຕາການຕາຍໄດ້.ເຂົ້າຮ່ວມໃນພິທີດັ່ງກ່າວມີ ດຣ.ສອນໄຊ ລາດຊະວົງ ຜູ້ອຳນວຍການໂຮງໝໍມິດຕະພາບ, ດຣ.ເກດມະນີ ເພັດສິລິແສງ ຮອງຜູ້ອຳນວຍການ ພ້ອມດ້ວຍຫົວໜ້າພະແນກ,ຮອງພະແນກ ບັນດາແພດໝໍ ແລະ ພໍ່ແມ່ປະຊາຊົນກໍ່ໄດ້ເຂົ້າຮ່ວມ.
