ໂຮງໝໍມິດຕະພາບ ໄດ້ຈັດພິທີສະເຫຼີມສະຫຼອງ ວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດວັນທີ 1 ມິຖຸນາ ຂຶ້ນໃນວັນທີ 31 ພຶດສະພານີ້, ທີ່ໂຮງໝໍດັ່ງກ່າວ ໂດຍການເຂົ້າຮ່ວມຂອງທ່ານ ສອນໄຊ ລາດຊະວົງ ຜູ້ອຳນວຍການໂຮງໝໍມິດຕະພາບ, ມີທ່ານຮອງປະທານສະຫະພັນແມ່ຍິງ ກະຊວງສາທາລະນະສຸກ, 3 ອົງການຈັດຕັ້ງມະຫາຊົນ, ພະນັກງານແພດໝໍ ພ້ອມດ້ວຍຫຼານນ້ອຍເຂົ້າຮ່ວມ.
ທ່ານ ສອນໄຊ ລາດຊະວົງ ກ່າວວ່າ: ການຈັດງານຄັ້ງນີ້ ເພື່ອເປັນການສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດວັນທີ 1 ມິຖຸນາ, ຊຶ່ງກິດຈະກຳໃນຄັ້ງນີ້ມີການກວດສຸຂະພາບໃຫ້ເດັກນ້ອຍ, ກວດແຂ້ວ, ຜົ້ງປາກ, ສັກວັກຊິນ, ຢອດຢາວິຕາມິນອາໃຫ້ເດັກ, ການສະແດງສິລະປະ-ວັນນະຄະດີ, ຢາຍເຂົ້າໜົມເພື່ອເປັນຂອງຕ້ອນຂອງຝາກໃຫ້ກັບຫຼານນ້ອຍ. ພ້ອມນັ້ນໄດ້ຈັດຂະບວນການອອກແຮງງານອ້ອມໂຮງໝໍ ເພື່ອໃຫ້ມີຄວາມສະອາດຈົບງາມ ທັງເປັນການສ້າງຂະບວນການກະກຽມໃຫ້ແກ່ກອງປະຊຸມ 3 ຂັ້ນຂອງໂຮງໝໍ ທີ່ຈະຈັດຂຶ້ນໃນມໍ່ໆນີ້ ເພື່ອໃຫ້ມີບັນຍາກາດຟົດຟື້ນມ່ວນຊື່ນ.
ຈຸດປະສົງເພື່ອເປັນການເຕົ້າໂຮມຄວາມສາມັກຄີ ເປີດໂອກາດໃຫ້ເດັກ ໄດ້ພົບປະກັບຄອບຄົວພໍ່ແມ່ພະນັກງານດ້ວຍກັນ, ກ້າສະແດງອອກຄວາມຮູ້-ຄວາມສາມາດຂອງຕົນ ຊຶ່ງເດັກໃນມື້ນີ້ຈະກາຍເປັນໜໍ່ແໜງຂອງປະເທດຊາດໃນອະນາຄົດ, ຊຶ່ງຢູ່ໃນໂຮງໝໍມິດຕະພາບກໍມີເຮືອນລ້ຽງເດັກ ເຮັດໜ້າທີ່ຮັບຜິດຊອບເບິ່ງແຍງລູກຫຼານພະນັກງານ ແລະ ລູກຫຼານປະຊາຊົນຢູ່ໃກ້ຄຽງຈຳນວນໜຶ່ງ ເພື່ອໃຫ້ຜູ້ປົກຄອງໄດ້ປະຕິບັດໜ້າທີ່ວຽກງານວິຊາສະເພາະ ຂອງຕົນຢ່າງສະດວກສະບາຍ ປະກອບສ່ວນໃນການພັດທະນາປະເທດຊາດ.
ຂ່າວ: ພູວັນ
