ທ່ານ ດຣ ພູວະນາ ອານຸລັກຄໍາ ຜູ້ອໍານວຍການໂຮງໝໍແຂວງຫຼວງພະບາງ ໄດ້ໃຫ້ສໍາພາດຕໍ່ CMG ວັນທີ 20 ສິງຫາ 2024 ນີ້ວ່າ, ໂຮງໝໍຫຼັງໃໝ່ນີ້ແມ່ນນອນຢູ່ໃນໂຄງການຊ່ວຍເຫຼືອປັບປຸງ ແລະ ຍົກລະດັບໂຮງໝໍແຂວງຫຼວງພະບາງຈາກລັດຖະບານຈີນກໍຄືປະຊາຊົນຈີນ ໃຫ້ການຊ່ວຍເຫຼືອ ໄດ້ຊ່ວຍພັດທະນາລະບົບການບໍລິການຢູ່ໃນໂຮງໝໍ ໂດຍສະເພາະນະໂຍບາຍວ່າດ້ວຍ 5 ດີ 1 ພໍໃຈ ຄືເປົ້າໝາຍຂອງພວກເຮົາໃຫ້ປະກົດຜົນເປັນຈິງແລະຈະກາຍເປັນສູນແຫ່ງການບໍລິການແລະປິ່ນປົວທີ່ທັນສະໄໝ
ທ່ານ ດຣ ພູວະນາ ອານຸລັກຄໍາ ກ່າວວ່າ: ໂຮງໝໍຫຼັງນີ້, ເປັນໂຮງໝໍທີ່ໄດ້ຮັບການອອກແບບ ທີ່ມີຄວາມທັນສະໄໝ ມີອຸປະກອນການແພດຄົບຊຸດ ໄດ້ເລີ່ມລົງມືກໍ່ສ້າງໃນປີ 2022 ມາຮອດປະຈຸບັນແມ່ນສໍາເລັດ 100 %.
ຕຶກອາຄານຫຼັງໃໝ່ນີ້ປະກອບມີທັງໝົດ 7 ຫົວໜ່ວຍ ເພື່ີອຕອບສະໜອງເຂົ້າໃນວຽກງານການບໍລິການສຸຂະພາບໃນໂຮງໝໍແຂວງ ເຊິ່ງເປັນຕຶກອາຄານສະເພາະໃນການໃຫ້ບໍລິການຕໍ່ປະຊາ ຊົນທີ່ເກີດອຸບັດຕິເຫດ ປະກອບມີຫ້ອງສຸກເສີນ, ຫ້ອງຜ່າຕັດກະດູກ, ຫ້ອງ ICU ມີໜ່ວຍງານຜ່າຕັດກະດູກສະເພາະ, ໜ່ວຍງານຫົວໃຈເສັ້ນເລືອດ, ຫ້ອງແຫຍ່ເສັ້ນເລືອດຫົວໃຈ ແລະ ຫ້ອງ ນອນທີ່ໄດ້ມາດຕະຖານ ເປັນຫ້ອງສະເພາະສອງຕຽງ, ຫ້ອງສີ່ຕຽງ.
ນອກຈາກທີມງານຊ່ຽວຊານຝ່າຍລາວແລ້ວ ກໍຍັງມີທີມງານແພດຊ່ຽວຊານ ຈາກໂຮງໝໍເລກໜຶ່ງປະຊາຊົນຈີນແຂວງຢຸນນານສປ ຈີນ ເຊິ່ງຈະມາປະຈໍາຢູ່ໂຮງໝໍພວກເຮົານັບແຕ່ປີ 2024 -2027 ໂດຍສະເພາະຊ່ຽວຊານຜ່າຕັດກະດູກ, ຊ່ຽວຊານຟື້ນຟູຊີບ, ຊ່ຽວຊານກ່ຽວກັບຫົວໃຈເສັ້ນເລືອດ ເຊິ່ງຈະຕອບໂຈດໃນການພັດທະນາລະບົບການບໍລິການຢູ່ໃນໂຮງໝໍໃຫ້ດີຂື້ນຕາມນະໂຍບາຍວ່າດ້ວຍ 5 ດີ 1 ພໍໃຈນັ້ນໃຫ້ປະກົດຜົນເປັນຈິງຕາມເປົ້າໝາຍຂອງພວກເຮົາທີ່ວາງໄວ້ຢູ່ໃນກໍແມ່ນໂຮງໝໍຫຼັງໃໝ່ນີ້.
ນອກຈາກນັ້ນ, ຍັງຈະໃຫ້ບໍລິການແກ່ປະຊາຊົນໃນບັນດາແຂວງພາກເໜືອຕື່ມອີກ, ໂດຍສະເພາະກ່ຽວກັບ ວຽກງານຜ່າຕັດກະດູກ, ກ້າວໄປສູ່ການຜ່າຕັດສະໝອງ. ສໍາລັບການປິ່ນປົວກ່ຽວກັບບັນຫາຫົວໃຈເສັ້ນເລືອດ ແຫຍ່ຫົວໃຈເສັ້ນເລືອດ ໃນຕໍ່ໜ້າ ໂຮງໝໍແຂວງຫຼວງພະບາງ ຈະກາຍເປັນໂຮງໝໍແຫ່ງໜຶ່ງທາງພາກເໜືອຂອງສປປ ລາວ ທີ່ມີການບໍລິການຄົບວົງຈອນຢ່າງມີປະສິດທິຜົນ.
Cr: CMG FM93
