ໂຮງຫມໍເສດຖາທິຣາດ ນະຄອນຫລວງວຽງຈັນ ຈັດຂະບວນການບໍລິຈາກເລືອດຂອງ 3 ອົງການຈັດຕັ້ງມະຫາຊົນເພື່ອຂ່ຳນັບຮັບຕ້ອນກອງປະຊຸມໃຫຍ່ 3 ຂັ້ນຂອງພັກແລະວັນສໍາຄັນຕ່າງໆຂອງຊາດ ,ຈັດຂຶ້ນໃນຕອນເຊົ້າວັນທີ 7 ສິງຫານີ້ 2024 ທີ່ຫ້ອງປະຊຸມໃຫຍ່ຂອງໂຮງຫມໍ ພາຍໃຕ້ການເປັນປະທານຂອງດຣ ຫວັງນະຄອນ ດິດຕະພົງ ຜູ້ອຳນວຍການໂຮງຫມໍເສດຖາທິຣາດ ,ດຣ ນາງ ຈິລະພາ ແກ້ວຄຳຜຸຍ ຮອງຫົວຫນ້າສະຖາບັນເລືອດແຫ່ງຊາດ ,ມີຄະນະນຳ, ຫົວຫນ້າພະແນກ, ຮອງພະແນກການ ແລະພະນັກງານແພດຫມໍພາຍໃນໂຮງຫມໍເຂົ້າຮ່ວມ.
ດຣ ຫວັງນະຄອນ ດິດຕະພົງ ຜູ້ອຳນວຍການໂຮງຫມໍເສດຖາທິຣາດມີຄຳເຫັນວ່າ: ການບໍລິຈາກເລືອດຄັ້ງນີ້ໄດ້ຮ່ວມກັບສະຖາບັນເລືອດແຫ່ງຊາດສ້າງຂະບວນການລະດົມບໍລິຈາກເລືອດຂອງພະນັກງານແພດຫມໍເຊິ່ງເປັນສ່ວນຫນຶ່ງໃນການປະກອບສ່ວນ ນອກຈາກເປັນຫນ່ວຍປະຈັນບານໃນການປິ່ນປົວຊ່ວຍຊີວິດຂອງຄົນເຈັບແລ້ວ ພະນັກງານແພດໝໍ ພາຍໃນໂຮງໝໍຍັງເຫັນຄວາມສຳຄັນໃນການປະກອບສ່ວນບໍລິຈາກເລືອດເພື່ອສົມທົບກັບສະຖາບັນເລືອດໃນການກະກຽມເລືອດໃຫ້ແກ່ຄົນເຈັບທີ່ຕ້ອງການເລືອດສຸກເສີນ, ນອກນີ້ວຽກງານປິ່ນປົວສຸຂະພາບແມ່ນມີຄວາມສຳຄັນຕໍ່ຄົນເຈັບ ແລະສາມາດຊ່ວຍກອບກູ້ເອົາຊີວິດຄົນເຈັບທີ່ຈຳເປັນຕ້ອງການສົ່ງເລືອດ ແລະສ່ວນປະກອບຂອງເລືອດເພື່ອນຳໃຊ້ເຂົ້າໃນການປິ່ນປົວຄົນເຈັບ ທີ່ເປັນາພະຍາດຕ່າງໆທີ່ເປັນອັນຕະລາຍຕໍ່ຊີວິດຂອງເຂົາເຈົ້າ, ພ້ອມນີ້ຍັງເປັນການສະຫນັບສະຫນູນຂັ້ນຕອນປິ່ນປົວທາງດ້ານການແພດ ແລະການຜ່າຕັດທີ່ສັບສົນ, ນອກຈາກນີ້, ການສົ່ງເລືອດຍັງເປັນການຊ່ວຍຊີວິດຂອງແມ່ທີ່ສູນເສຍເລືອດໃນເວລາຖືພາເກີດລູກ ແລະເດັກນ້ອຍທີ່ຂາດເລືອດອີກດ້ວຍ.
ດຣ ຫວັງນະຄອນ ດິດຕະພົງ ໃຫ້ຮູ້ຕື່ມວ່າ:ໃນທຸກໆປີໂຮງຫມໍເສດຖາທິຣາດໄດ້ຈັດກິດຈະກຳບໍລິຈາກເລືອດຮ່ວມກັບຂະບວນການອື່ນໆ ເປັນຕົ້ນ:ຂະບວນການຕອບໂຕ້ພະຍາດລະບາດຕາມລະດູການກໍ່ຄືພະຍາດໄຂ້ຍຸງລາຍ, ພະຍາດກ່ຽວກັບລະບົບທາງເດີນຫາຍໃຈ ແລະພະຍາດອື່ນໆ. ເຊິ່ງຈຳນວນຜູ້ບໍລິຈາກເລືອດແຕ່ລະຄັ້ງສາມາດລະດົມໄດ້30-40ຖົງ ແລະຄາດຫມາຍຂອງໂຮງຫມໍຄັ້ງນີ້ຈະໃຫ້ໄດ້40 ກວ່າຖົງຂຶ້ນໄປ ແລະໃນຕໍ່ຫນ້າຍັງຈະລະດົມສ້າງຂະບວນການໃຫ້ປະຊາຊົນພີ່ນ້ອງຄົນເຈັບທີ່ມາປິ່ນປົວສາມາດປະກອບສ່ວນໃນການບໍລິຈາກເລືອດກັບໂຮງຫມໍໄດ້.
