ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນລະຫວ່າງວັນທີ 21-23 ມິຖຸນາຜ່ານມາ ທີ່ສະໂມສອນຫ້ອງວ່າການປົກຄອງແຂວງສະຫວັນນະເຂດ ໄດ້ໃຫ້ຄວາມຮູ້ກ່ຽວກັບການຜ່າຕັດຄົນເຈັບມະເຮັງທໍ່ນໍ້າບີ ແລະ ຝຶກອົບຮົມທີມແພດປິ່ນປົວມະເຮັງທໍ່ນໍ້າບີ ໂດຍການເປັນປະທານຂອງທ່ານ ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ໄພວັນ ແກ້ວປະເສີດ ກ່າວວ່າ: ເປັນອີກໜຶ່ງການຮ່ວມມີເພື່ອຊ່ວຍສັງຄົມ ຂອງສປປ ລາວ ແລະ ຣາຊະອານາຈັກໄທ ພາຍໃຕ້ໂຄງການແກ້ໄຂພະຍາດໃບໄມ້ໃນຕັບ ແລະ ມະເຮັງທໍ່ນໍ້າບີຢູ່ ສປປ ລາວ ແລະ ເປັນຜົນສໍາເລັດຂອງການຮ່ວມມືທາງດ້ານການແພດ ຂອງລາວ ແລະ ໄທ ທີ່ໄດ້ເອົາໃຈໃສ່ຮ່ວມໃຈກັນຄົ້ນຄວ້າ ຊອກວິທີປິ່ນປົວພະຍາດໃບໄມ້ໃນຕັບແລ້ວກໍ່ໃຫ້ເກີດເປັນມະເຮັງທໍ່ນໍ້າບີ ດ້ວຍການຜ່າຕັດຄົນເຈັບ ສາເຫດມາຈາກການກິນອາຫານແບບບໍ່ສຸກ ຫຼືກິນດິບກໍ່ໃຫ້ເກີດເປັນພະຍາດໄບໄມ້ໃນຕັບ ແລ້ວແຜ່ຂະຫຍາຍເປັນມະເຮັງທໍ່ນໍ້າບີ, ພະຍາດດັ່ງກ່າວມັກເກີດໃນປະເທດລຸ່ມແມ່ນໍ້າຂອງ ໂດຍສະເພາະປະເທດລາວ ແລະ ປະເທດໄທ; ສ່ວນປະເທດລາວເກີດມີຢູ່ເຂດພາກກາງ ແລະ ພາກໃຕ້ ໂດຍສະເພາະແຂວງສະຫວັນນະເຂດ, ແຂວງຈໍາປາສັກ, ປັດຈຸບັນປະເທດລຸ່ມແມ່ນໍ້າຂອງ ມີອັດຕາສ່ຽງຕິດເຊື້ອພະຍາດໃບໄມ້ໃນຕັບ 40 ລ້ານຄົນ, ໃນນີ້ 10 ລ້ານຄົນ ແມ່ນຕິດເຊື້ອ; ອີງຕາມຂໍ້ມູນຂອງອົງການອະນາໄມໂລກ ໃຫ້ຮູ້ວ່າ: ປັດຈຸບັນ ສປປ ລາວ ມີຄົນເປັນພະ ຍາດໃບໄມ້ໃນຕັບປະມານ 2 ລ້ານຄົນ ສ່ວນໃຫຍ່ມັກເກີດກັບຜູ້ທີ່ມີ ອາຍຸ 35 ປີ ຂຶ້ນໄປ 80%, ການກັ່ນກອງພະຍາດໃບໄມ້ໃນຕັບ ແລະ ມະເຮັງທໍ່ນໍ້າບີໃນຊຸມຊົນທີ່ແຂວງສະຫວັນນະເຂດ ໄດ້ເລີ່ມຈັດຕັ້ງປະຕິບັດມາແຕ່ເດືອນມີນາ 2024 ຊຶ່ງກິດຈະກໍາພາກສະໜາມໃນການກວດມີ 3 ກິດຈະກໍາ ໂດຍມີການກວດຄັດກອງການຕິດພະຍາດໃບໄມ້ໃນຕັບ ແລະ ໃຫ້ການປິ່ນປົວ, ກິດຈະກໍາຄັດກອງດ້ວຍລະບົບອັນຕາຊາວ ແລະ ການເອົາຄົນເຈັບທີ່ສົງໃສເປັນພະຍາດໃບໄມ້ໃນຕັບ ມາກວດເພີ່ມໃຫ້ລະອຽດ. ພາຍຫຼັງທີ່ມີການຝຶກອົບຮົມທີມງານຈະໄດ້ມີການລົງປະຕິບັດຕົວຈິງ ຢູ່ທີ່ໂຮງໝໍແຂວງສະຫວັນນະເຂດ ດ້ວຍການເກັບກໍາຂໍ້ມູນຄົນເຈັບ, ການນໍາຄົນເຈັບມາປິ່ນປົວດ້ວຍການຜ່າຕັດຄົນເຈັບ ທີ່ເປັນມະເຮັງທໍ່ນໍ້າບີ ລະຫວ່າງວັນທີ 22-23 ມິຖຸນາ 2024. ເພື່ອໃຫ້ທີມແພດໝໍຈາກໂຮງໝໍແຂວງສະຫວັນນະເຂດ ມີຄວາມຊໍານານ ສາມາດປິ່ນປົວຄົນເຈັບໃຫ້ຫາຍຂາດໄດ້ໃນໄວໆນີ້ ໂດຍສະເພາະຄົນເຈັບທີ່ເປັນມະເຮັງທໍ່ສົ່ງນໍ້າບີ ທີ່ມີສາເຫດມາຈາກການເປັນພະຍາດໃບໄມ້ໃນຕັບ.
ຂ່າວ: ສະຫວັນນະເຂດ
May be an image of 10 people, dais and text