ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ໂຮງໝໍແຂວງຫຼວງພະບາງອາດພົບຄວາມຫຍຸ້ງຍາກຫຼາຍດ້ານ ຖ້າເຊື້ອພະຍາດໂຄວິດ-19 ແຜ່ລະບາດຫຼາຍກ່ວານີ້:

ເພື່ອເປັນການຮອງຮັບຄົນເຈັບທີ່ຕິດເຊື້ອພະຍາດເຊື້ອອັກເສບປອດຈາກຈຸລະໂລກສາຍພັນໃໝ່ ຫຼື ໂຄວິດ-19 ໂຮງໝໍແຂວງຫຼວງພະບາງ ໄດ້ວາງມາດຕະການກັ່ນກອງຄົນເຈັບ ໂດຍຈັດສັນໃຫ້ມີຫ້ອງແຍກດ່ຽວ ແລະ ເຂດກວດພະຍາດສະເພາະຜູ້ທີ່ຕິດເຊື້ອ ຫຼື ສົງໄສເປັນພະຍາດໂຄວິດ-19.

ດ໋ອກເຕີ  ທອງພຸດ ສຸກກະເສີມ, ຜູ້ອຳນວຍການໂຮງໝໍແຂວງຫຼວງພະບາງໃຫ້ຮູ້ວ່າ: ປະຈຸບັນ ສຳລັບ ຫ້ອງແຍກດ່ຽວແມ່ນໄດ້ໃຊ້ເປັນຫ້ອງປີ່ນປົວຜູ້ຕິດເຊື້ອຈຳນວນ 3 ຄົນ, ໄປພ້ອມດຽວກັນນັ້ນກໍ່ໄດ້ຈັດສັນເຂດຮັກສາຜູ້ປ່ວຍທີ່ໄດ້ກັກຕົວເປັນກໍລະນີສົງໄສອີກຈຸດໜື່ງ ໂດຍຈະບໍ່ໃຫ້ພົວພັນກັບຄົນເຈັບທົ່ວໄປ ເພາະອາດຈະເຮັດໃຫ້ເກີດການແຜ່ລະບາດເຊື້ອພະຍາດໄດ້ງ່າຍ; ສ່ວນແພດປີ່ນປົວແມ່ນໄດ້ຈັດເປັນທີມ ຊຶ່ງຈະຜັດປ່ຽນກັນປະຈຳການຕະຫຼອດ 24 ຊົ່ວໂມງ 7 ວັນຕໍ່ອາທິດ.

ພາຍຫຼັງໝົດສິດປະຈຳການ ບັນດາແພດໝໍກໍ່ຍັງຈະໄດ້ຜັກຜ່ອນເກັບຕົວຢູ່ໃນໂຮງໝໍແຂວງອີກ 14 ວັນເພື່ອຕິດຕາມອາການ, ແຕ່ເບິ່ງລວມແລ້ວ ບຸກຄະລາກອນດ້ານການແພດ ແລະ ສະຖານທີ່ຮອງຮັບຄົນເຈັບ ແມ່ນຍັງບໍ່ທັນພຽງພໍໃນປະຈຸບັນ; ຖ້າຫາກມີຄົນເຈັບເຂົ້າມາເພີ່ມ ກໍ່ຈະຕ້ອງໄດ້ມີການຂະຫຍາຍສະຖານທີ່ຮອງຮັບຕື່ມອີກ.

ດ໋ອກເຕີ   ທອງພຸດ ສຸກກະເສີມ, ຜູ້ອຳນວຍການໂຮງໝໍແຂວງຫຼວງພະບາງ ໃຫ້ຮູ້ຕື່ມວ່າ: ນອກຈາກເລື່ອງບຸກຄະລາກອນ ແລະ ສະຖານທີ່ຮອງຮັບຄົນເຈັບແລ້ວ, ໂຮງໝໍແຂວງຫຼວງພະບາງຍັງມີຄວາມຕ້ອງການອີກຫຼາຍດ້ານ, ເປັນຕົ້ນແມ່ນງົບປະມານເພື່ອຊື້ອາຫານໃຫ້ກັບແພດ ແລະ ຄົນເຈັບໃນແຕ່ລະມືື, ລວມທັງອຸປະກອນການແພດທີ່ຈຳເປັນອີກຫຼາຍຢ່າງ, ຊຶ່ງມາຮອດປະຈຸບັນ ແມ່ນໄດ້ຮັບການຊ່ວຍເຫຼືອເບື້ອງຕົ້ນຈຳນວນໜື່ງຢູ່, ເປັນຕົ້ນ ອຸປະກອນການແພດ ຈາກປະເທດເພື່ອນມິດ ແລະ ກະຊວງສາທາລະນະສຸກ, ລວມທັງ ນ້ຳໃຈຂອງປະຊາຊົນຊາວຫຼວງພະບາງທີ່ໄດ້ຕອບສະໜອງອາຫານ, ນ້ຳດື່ມ ແລະ ອາຫານແຫ້ງທີ່ຈຳເປັນ, ແຕ່ອີງໃສ່ຄວາມຮຽກຮ້ອງຕ້ອງການແລ້ວ ແມ່ນຍັງບໍ່ທັນພຽງພໍ ເພາະໂຮງໝໍແຂວງຍັງຈະຕ້ອງສືບຕໍ່ປີ່ນປົວຄົນເຈັບທີ່ກ່ຽວພັນກັບພະຍາດໂຄວິດ-19 ຈົນກ່ວາຈະມີອາການດີຂື້ນ ແລະ ສາມາດກັບໄປດຳລົງຊີວິດໄດ້ຕາມປົກກະຕິ.