ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ໂຮງໝໍໂລກຜີວໜັງ-ກາມະໂລກ ສະເຫລີມສະຫລອງວັນພະຍາດຫລວງສາກົນ

ໃນວັນທີ 31 ມັງກອນ 2020 ໂຮງໝໍໂລກຜີວໜັງ-ກາມະໂລກ, ກະຊວງ ສາທາລະນະສຸກ ໄດ້ຈັດກິດຈະກໍາກວດພະຍາດຜີວໜັງໂດຍບໍ່ເສຍຄ່າ ເພື່ອສະເຫລີມສະຫລອງວັນພະຍາດຫລວງສາກົນ ຊຶ່ງປີນີ້ກົງກັບວັນອາທິດ, ວັນທີ 26 ມັງກອນ ໂດຍມີຈຸດສຸມເພື່ອຢຸດຕິການຈຳແນກ ແລະ ການລຸກຂຶ້ນເພື່ອສິດທິມະນຸດ ຖ້າກວດພົບຜູ້ໃດເປັນພະຍາດຫລວງຈະໄດ້ຮັບການປິ່ນປົວໂດຍບໍ່ເສຍຄ່າ.

ດຣ ນາງ ສີສະຫວາດ ມະນີວົງ, ຫົວໜ້າອຳນວຍການໂຮງໝໍໂລກຜີວໜັງ-ກາມະໂລກ ໃຫ້ສໍາພາດວ່າ:  ພະຍາດຫລວງ ຫລື ຂີ້ທູດ ຫລື  HANSEN ມີສາເຫດມາຈາກການເຕີບໃຫຍ່ຢ່າງຊ້າຯ ຂອງຈຸລິນຊີ Mycobacterium Leprae, ການຕິດຕໍ່ແມ່ນຜ່ານລະອອງຈາກດັງ ແລະ ປາກຂອງຄົນທີ່ເປັນພະຍາດຮ້າຍແຮງ ແລະ ບໍ່ໄດ້ຮັບການປິ່ນປົວ ແຕ່ເປັນພະຍາດທີ່ບໍ່ສາມາດຕິດຕໍ່ໄດ້ໄວ. ຜູ້ຕິດເຊື້ອພະຍາດນີ້ຖ້າປ່ອຍປະບໍ່ໄດ້ຮັບການບົ່ງມະຕິ ແລະ ປິ່ນປົວຖືກຕ້ອງ ພະຍາດສາມາດທຳລາຍເສັ້ນປະສາດ ແລະ ກ້າວໄປສູ່ການອ່ອນເພຍຂອງກ້າມຊີ້ນແຫ່ວລີບ ແລະ ນຳໄປສູ່ການເປັນພິການຕະຫລອດຊີວິດ (ພິການຕາ, ມື ແລະ ຕີນ ) ແລ້ວຄວາມພິການນີ້ອາດຈໍາເປັນຕ້ອງໄດ້ຮັບການຜ່າຕັດ-ປົວແປງ ຫລື ເຖີງຂັ້ນຕັດກຸດ. ສະເພາະຢູ່ລາວແມ່ນມີສະຖານທີ່ປິ່ນປົວພະຍາດຫລວງຢູ່ທຸກແຂວງ ແລະ ສາມາດປິ່ນປົວໃຫ້ ຫາຍຂາດໄດ້ໂດຍບໍ່ເສຍຄ່າ, ໃນນີ້ ຜູ້ທີ່ເປັນຫລາຍໃຊ້ເວລາປິ່ນປົວປະມານ 1 ປີ, ສ່ວນຜູ້ເປັນບໍ່ຫລາຍໃຊ້ເວລາປະມານ 6 ເດືອນ. ສໍາລັບຢາປິ່ນປົວແມ່ນໄດ້ຮັບການສະໜັບສະໜູນຈາກອົງການອະນາໄມໂລກທຸກປີ.  ປັດຈຸບັນ ໂຮງໝໍໂລກຜີວໜັງ-ກາມະໂລກ ສາມາດບໍລິການປິ່ນປົວດ້ວຍເຄື່ອງມືທີ່ທັນສະໄໝ ແລະ ມີແພດທີ່ຊ່ຽວຊານ ເຮັດໃຫ້ຄຸນນະພາບການບໍລິການນັບມື້ດີຂຶ້ນ ແລະ ໃກ້ຄຽງກັບພາກພື້ນ ແລະ ສາກົນ.

ດຣ ນາງ ສີສະຫວາດ ມະນີວົງ ຫົວໜ້າອຳນວຍການໂຮງໝໍໂລກຜີວໜັງ-ກາມະໂລກ, ກະຊວງ ສາທາລະນະສຸກ ໃຫ້ຮູ້ຕື່ມວ່າ: ການສະ ເຫລີມສະຫລອງວັນພະຍາດຫລວງສາກົນ ຈັດຂຶ້ນອາທິດສຸດທ້າຍຂອງເດືອນ ມັງກອນຂອງທຸກປີ ເພື່ອສ້າງຈິດສຳນຶກກ່ຽວກັບພະຍາດທີ່ຫລາຍຄົນຄິດວ່າໄດ້ຖືກລົບລ້າງໄປແລ້ວ, ສະເພາະຢູ່ລາວ ກະຊວງ ສາທາລະນະສຸກ ແລະ ຄູ່ຮ່ວມງານ ເປັນຕົ້ນ: ອົງການອະນາໄມໂລກ, ອົງການຊ່ວຍເຫລືອຈາກປະເທດຝລັ່ງ ແລະ ອົງກອນມູນນິທິອາຊຽນຈາກປະເທດຍິ່ງປຸ່ນ ແລະ ຄູ່ຮ່ວມງານອື່ນໆ ຕ້ອງໄດ້ສືບຕໍ່ຂົນຂວາຍຊັບພະຍາກອນ ແລະ ການສະໜັບສະໜູນນຳໃຊ້ເຕັກໂນໂລຊີ ແລະ ນະວັດຕະກຳໃໝ່ ເພື່ອຮັບປະກັນການບໍລິການທີ່ມີຄຸນນະພາບໃນວຽກງານປ້ອງກັນ, ການບົ່ງມະຕິ, ການປິ່ນປົວ ແລະ ການດູແລຮັກສາໃຫ້ແກ່ຜູ້ທີ່ໄດ້ຮັບຜົນກະທົບຍ້ອນພະຍາດຫລວງໃຫ້ດີຂຶ້ນກ່ວາເກົ່າ.

ຂ່າວ: ບຸນຕຽງ ຈັນທະວົງ