ເພື່ອກະກຽມໃຫ້ແກ່ການສ້າງຂະບວນ ການປູກຕົ້ນໄມ້ ໂອກາດວັນປູກຕົ້ນໄມ້ແຫ່ງຊາດ ວັນທີ່ 1 ມິຖຸນາ 2023 ຄະນະນຳຂອງພະແນກກະສິກຳ ແລະ ປ່າໄມ້ແຂວງ ໄດ້ຊຸກຍູ້ໃຫ້ຂະແໜງການກ່ຽວ ຂ້ອງ ຂອງພະແນກ, ລວມທັງບັນດາເມືອງ-ນະຄອນ ແລະບັນດາຫົວໜ່ວຍທຸລະກິດ-ຜູ້ປະກອບການກ້າເບ້ຍໄມ້ ກະກຽມເບ້ຍໄມ້ ເພື່ອສະໜອງໃຫ້ແກ່ການຈັດຂະບວນການປູກຕົ້ນໄມ້ໃນທົ່ວແຂວງ ມີຄວາມພຽງພໍ ແລະບັນລຸຕາມແຜນການຕັ້ງໄວ້ຄື: ປູກຕົ້ນໄມ້ໃຫ້ໄດ້ຫຼາຍກວ່າ 3.655 ເຮັກຕ່າ. ທ່ານ ສີວອນ ວົງຄຳຈັນ ຫົວໜ້າພະແນກກະສິກຳ ແລະ ປ່າໄມ້ແຂວງຫຼວງພະບາງ ໃຫ້ສຳພາດ ຜ່ານລາຍການຮອບບ້ານຜ່ານເມືອງ ຂອງສິທະຍຸກະຈາຍສຽງແຫ່ງຊາດລາວ ໃນເມື່ອບໍ່ດົນຜ່ານມານີ້ວ່າ: ໄລຍະຜ່ານມາ ຄະນະນຳຂອງພະແນກ ໄດ້ເຄື່ອນໄຫວຊຸກຍູ້ ການເກັບກ່ຽວຜົນຜະລິດລະດູແລ້ງ ແລະການກະກຽມການຜະລິດລະດູຝົນ ຄຽງຄູ່ກັບ ການກະກຽມຂະບວນການປູກຕົ້ນໄມ້ ໂອກາດວັນປູກຕົ້ນໄມ້ແຫ່ງຊາດ ໂດຍຈະເລັ່ງໃສ່ປູກທົດແທນປ່າໄມ້ທີ່ໄດ້ຮັບຜົນກະທົບ ຈາກໄຟໄໝ້ລາມປ່າ, ເຊີ່ງຕາມແຜນຈະປູກຕົ້ນໄມ້ໃຫ້ໄດ້ຫຼາຍກວ່າ 3.655 ເຮັກຕ່າ ໃນ 11 ເມືອງ ແລະນະຄອນ ຫຼວງພະບາງ ສຳລັບເບ້ຍໄມ້ທີ່ຈະປູກສ່ວນໃຫຍ່ ແມ່ນຕົ້ນໄມ້ຮັກສາແຫຼ່ງນ້ຳ, ຕົ້ນໄມ້ອຸດສາຫະກຳ ແລະຕົ້ນໄມ້ເສດຖະກິດ, ໂດຍເລັ່ງໃສ່ພື້ນທີ່ ທີ່ໄດ້ຮັບຜົນກະທົບຈາກໄຟໄໝ້ລາມປ່າ, ພື້ນທີ່ຮັກສາແຫຼ່ງນຳ ແລະອື່ນໆ,ສະເພາະຂະບວນການລວມຂອງແຂວງ ຈະຈັດຂື້ນທີ່ບ້ານຊຽງແມນ ເມືອງຈອມເພັດ ໂດຍຈະປູກໃນຂອບເຂດພູນາງ ໃນເນື້ອທີ່ 10 ກວ່າເຮັກຕ່າ ເຊີ່ງເປັນພື້ນທີ່ໄດ້ຮັບຜົນເສຍຫາຍ ຈາກໄຟໄໝ້ລາມປ່າ ໃນລະດູແລ້ງຜ່ານມາ, ໃນນັ້ນ ຈະນຳໃຊ້ເບ້ຍໄມ້ທັງໝົດ 11.000 ເບ້ຍ ສ່ວນໃຫຍ່ຈະເປັນເບ້ຍໄມ້ຮັກສາແຫຼ່ງນ້ຳ ແລະອື່ນໆອີກຈຳນວນໜື່ງ, ສຳລັບຂະບວນການຢູ່ບັນດາເມືອງ-ນະຄອນ ຫຼວງພະບາງ ຄະນະນຳຂອງພະແນກ ໄດ້ຊີ້ນຳໃຫ້ຈັດພິທີພ້ອມກັນ 2 ຂະບວນການ ຄື: ປູກຕົ້ນໄມ້ ໂອກາດວັນປູກຕົ້ນໄມ້ແຫ່ງຊາດ ວັນທີ່ 1 ມິຖຸນາ ແລະປ່ອຍປາ ໂອກາດວັນປ່ອຍປາ ແລະອານຸລັກສັດນ້ຳ-ສັດປ່າແຫ່ງຊາດ ວັນທີ່ 13 ກໍລະກົດ ເພື່ອປະຍັດເວລາ ແລະງົບປະມານ.
ຂ່າວ: ອາພຸດເດດ ບຸບຜາ
